Թուրքիայում գտել են Ռուսաստանի հետ հարաբերությունները վերականգնելու հնարքը

- in Հրապարակ
turkey russia

Թուրքիայում գտել են Ռուսաստանի հետ հարաբերությունները վերականգնելու հնարքը։ Թուրքիայի իշխող կուսակցության համախոհները սկսել են ակտիվորեն մեղադրել Թուրքիայի ռազմաօդային ուժերի ղեկավար Աբիդին Ունալին՝ կապված ռուսական Սու-24 մարտական ինքնաթիռը խոցելու հետ։

Նրանք սոցցանցերում կամպանիա են ծավալել Ունալի դեմ։ Այդպիսով, Թուրքիայի նախագահ Ռեջեփ Էրդողանը ցանկանում է իր վրայից հեռացնել բոլոր կասկածներն ու մեղադրանքները, և Թուրքիայի ռազմաօդային ուժերի գեներալին դարձնել ռուսական ինքնաթիռի կործանման միակ մեղավորը։

Թուրքիայի նախագահի շրջապատը պահանջում է գեներալի հրաժարականը, որն իբրև թե ինքնուրույն որոշում է կայացրել ռուսական Սու-24 ինքնաթիռի վրա հարձակման մասին, ինչը հանգեցրեց Ռուսաստանի հետ հարաբերությունների վատթարացմանը։

Սոցցանցերում ակտիվիստները գրում են, որ ոչ կոմպետենտ ու տանուլ տված Ունալը թաքնվել է Էրդողանի թիկունքում ու չի ցանկանում ընդունել իր մեղավորությունը։

Հիշեցնենք, որ ավելի վաղ Թուրքիայի վարչապետ Ահմեթ Դավութօղլուն հայտարարել էր, որ անձամբ ինքն է արձակել սահմանախախտ ինքնաթիռը ոչնչացնելու մասին հրամանը։

Ռուսաստանի Դաշնության խորհրդում կոչ են անում համապարփակ պատժամիջոցներ սահմանել Թուրքիայի դեմ, որը հրաժարվում է փոխհատուցում վճարել Սու-24 ինքնաթիռի խոցման համար։

Դաշնության խորհրդի պաշտպանության հարցերով հանձնաժողովի առաջին փոխնախագահ Ֆրանց Կլինցևիչը հայտարարել է. «Վերջ, Ռուբիկոնը հատված է։ Այստեղ կես քայլերով գործը գլուխ չես բերի։ Մեր պատասխանը պետք է լինի լուրջ և ընդգծում եմ, որ Թուրքիայի դեմ պետք է սահմանվեն համապարփակ սահմանափակիչ միջոցներ»։ Սենատորը կարծիք է հայտնել, որ Անկարայի հետ ներողություն խնդրելու և փոխհատուցում վճարելու մասին բանակցելը ոչ միայն պարզապես անիմաստ է, այլև՝ նվաստացուցիչ։

Հավանեցիք, տարածե՛ք սոցցանցերում
20