«Պատնեշները պետք է քանդել, որպեսզի կարողանանք մթնոլորտ փոխել երկրում». հարցազրույց

Vardan Oskanyan

Այսօր խորհրդարանում պատգամավորներից կիզակենտրոնում ՀՀ էքս արտգործնախարար Վարդան Օսկանյանն էր, ով լրագրողների ընդհանուր խմբի հարցերին ի պատասխան մասնավորեց նոր կուսակցություն ստեղծելու շարժառիթների ու ՀՀ երկրորդ նախագահ Ռոբերտ Քոչարյանի առնչությունների մասին հարցերին, մինչդեռ աշխարհաքաղաքական կողմնորոշումներին վերաբերող մեր հարցմանն ի պատասխան ասաց ընդամենը. Կոմլիմենտար քաղաքականություն» բառակապակցությունը: Ավելի ուշ պարոն Օսկանյանին խնդրեցինք փոքր-ինչ մանրամասնել իր կողմից ստեղծվող նոր կուսակցության դիրքորոշումները մեր տարածաշրջանին առնչվող խնդիրների հետ կապված:

– Պարոն Օսկանյան, հաշվի առնելով Ձեր անցած ճանապարհը, փորձն ու գիտելիքները արտաքին քաղաքականության ոլորտում և Ձեր պատկերացումները երկրի ապագայի նկատմամբ, ՄԻՏՔ.am-ին առավելապես հետաքրքրում է Ձեր արտաքին քաղաքականության դիրքորոշումը` նոր կուսակցությունը կողմնակի՞ց է լինելու Հայաստանի ԵԱՏՄ-ին անդամակցությանը: Հաշվի առնելով նաև այն հանգամանքը, որ Դուք հանրությանշրջանում առավելապես ընկալվում եք որպես Արևմտյան քաղաքականության կողմնակից գործիչ, ինչպիսի՞ն է լինելու անձամբ Ձեր դիրքորոշումը:

– Հանրության նման տպավորությունը միշտ չէ, որ իրականությանը համապատասխանում է: Ճիշտ է, որ ես Արևմուտքում եմ սովորել, բնականաբար, ենթադրում են, որ այդպիսի հանձնառություն ունեմ: Սակայն շատերը չգիտեն թերևս, որ խորհրդային շրջանում` 1972 – 80 թթ., սովորել եմ Երևանում, Պոլիտեխնիկ ինստիտուտում: Եվ այդ երկուսի համադրումն է, որ արտաքին քաղաքականությունում իմ դիմագիծն է կազմել: Այնպես որ` կոմպլեմետրազիզմը կլինի հիմնական ուղենիշն արտաքին քաղաքականության մասով, որը կիրառվել է շուրջ տասը տարի, և կարծում եմ, Հայաստանի համար շատ դրական արդյունքներ է արձանագրել: Երբ առաջնորդվում ես կոմլիմենտարիզմի սկզբունքով, վարվող քաղաքականությունն էլ փորձում ես դրա շրջանակներում դիտարկել, որի պայմաններում կարելի է, այնուամենայնիվ, որոշակի փոփոխություններ անել: Այս պահին այլ մանրամասների մեջ չեմ ցանկանում մտնել, շատ վաղ է և հավակնոտ կարող է թվալ: Պարզապես, առավել քան երբևէ այսօր կոմլիմենտար արտաքին քաղաքականության անհրաժեշտությունը կա Հայաստանում: Դրա հիմնական գրավականը հրապարակայնությունն է, ճիշտ կիրառումն է: Այսօր այդ հավասարակշռությունն ինչ որ տեղ խախտվել է: կարծում եմ` կոմլիմենտարիզմի ճանապարհով կկարողանանք այն վերականգնել:

– Պարոն Օսկանյան, Պուտին – Սարգսյան վերջին հանդիպման ժամանակ, թերևս եզակի դեպք է արձանագրվել, առ այն, որ պուտինը հայտարարել է, թե որոշակի օբյեկտիվ խնդիրներ կան հայ – ռուսական հարաբերություններում: Ըստ Ձեզ, ի՞նչ խնդիրների մասին է խոսքը …

– Հիմա իսկապես ժամանակը չէ այդպիսի մանրամասնությունների մեջ մտնելու համար: Ցանկացած երկկողմ հարաբերություններում, որքան էլ այն բարձր մակարդակի վրա լինի, ոչինչ 100 տոկոսով սահուն չի լինում: Վստահ եմ, որ միշտ էլ խնդիրներ կարող են լինել, որոնք փորձվում են հարթվել: Կարծում եմ, այն ինչ Պուտինն ասել է, նման հարցեր եղել են …

– Իսկ ի՞նչ եք կարծում, ավելի ճիշտ չէ՞ր լինի նոր կուսակցություն ստեղծելու փոխարեն Հայաստանում հայտնի մեկ անձի կուսակցություններից որևէ մեկը վերցնել ու ավելի արագ վերակազմավորել, որովհետև նորի գրանցման դեպքում, այն էլ` խորհրդարանական ընտրություններից մեկ տարի առաջ, հնարավոր է իշխանությունները խնդիրներ առաջացնեն այն գրանցելու հարցում: Եվ ի՞նչ ֆինանսական միջոցներով եք պատրաստվում նոր կուսակցություն ստեղծել և պահել:

– Հուսամ, թե չէ, օրենքի պահանջը շատ հստակ է, եթե բավարարում ես, ապա պատճառ չկա չգրանցելու համար: Ես ուզում եմ նաև կուսակցական նոր մշակույթ բերել: Մենք ճակատագրակն փուլում ենք` ունենք նոր Սահմանադրություն, նոր Ընտրական օրենսգիրք է գրվում, բոլորն ասում են` նոր էջ ենք բացում: Ելնելով մեր երկրի շահերից` փորձենք ընձեռնված հնարավորությունից օգտվել և փորձենք, տեսնենք, իսկապես ուզում են անել այնպես, ինչպես խոսում են: Ժամանակը ցույց կտա: Նախապես ենթադրություններ չանենք: Իմ կողմից նոր կուսակցություն ստեղծելու նպատակներից մեկը նոր մշակույթ բերելն է: օրինակ, ես համարում եմ, որ երկրում ժողովրդավարությունը հենց կուսակցություններից է սկսվում, որտեղ նոր սերնդին տեղ պետք է տրվի, կուսակցության լիդերը հավերժ չպետք է մնա և եթե ձախողություն է ունենում, ապա պետք է իր տեղը զիջի:

Ինչ վերաբերում է ֆինանսներին, ապա ես կարող է դիմեմ գործարարներին, որպեսզի ֆինանսավորեն, բայց դա չի նշանակում, որ նա անպայման պետք է ներգրավվի կուսակցության համամսնական ցուցակում: Նա կարող է կուսակցության գաղափարախոսության մեջ տեսնել փոքր և միջին բիզնեսի շահերի հետապնդումը և միայն դրա համար իր ֆինանսներով նպաստի, որպեսզի այդ կուսակցությունը կայանա: Մենք, այ, սրան պիտի հասնենք, այսօր, այո, այդպես չէ: Տարբեր գործարարներից կարելի է փոքր չափերի գումարներ ակնկալել ու դրանով լուծել բոլոր խնդիրները: Պատնեշները պետք է քանդել, որպեսզի կարողանանք մթնոլորտ փոխել երկրում:

Զրուցեց` Սիմոն ՍԱՐԳՍՅԱՆԸ

Spread the love

Leave a Reply

This site uses Akismet to reduce spam. Learn how your comment data is processed.