Ալիևը՝ կնոջ Մեհրիբան Ալիևայի հետ այցելել է շփման գիծ

- in Միջազգային
Ilham Aliev

Ադրբեջանական ANS հեռուստաալիքին տված հարցազրույցի ժամանակ Ադրբեջանի նախագահի աշխատակազմի ղեկավարի տեղակալ, արտաքին կապերի բաժնի պետ Նովրուզ Մամեդովը հայտարարել է, թե «Ղարաբաղյան հակամարտության գոտում իրավիճակի սրացումը չի ազդել Ադրբեջանի հեղինակության վրա և որ աճել են Ադրբեջանի հետ համագործակցել ու երկրում ներդրում անել ցանկացողների թիվը.

«Ադրբեջանի համբերությունը կարող է հատել: Դա տեսնում են, հաշվի են առնում և պետք է հաշվի առնեն բոլոր կողմերը»:

Ուշագրավ է, որ դրանից անմիջապես առաջ Moody’s միջազգային վարկանիշային գործակալությունը Ադրբեջանին շնորհել է բացասական կանխատեսման վարկանիշ` կապված աճող ռիսկերի հետ: Moody’s-ն ընդգծել էր, որ աշխարհաքաղաքական ռիսկերն աճել են ոչ վաղ անցյալում Լեռնային Ղարաբաղում հակամարտության վերաէսկալացման հետ:

APA լրատվական գործակալությունը հայտնել է, որ Ադրբեջանի նախագահ Իլհամ Ալիևը կնոջ Մեհրիբան Ալիևայի հետ միասին երեկ այցելել է  Թարթառի, Բարդայի ու Աղդամի շրջաններում տեղակայված զորամասեր:

Պաշտպանության նախարար Զաքիր Հասանովը գերագույն գլխավոր հրամանատար Իլհամ Ալիևին իրազեկել է շփման գծի շուրջ տիրող վերջին իրավիճակի մասին: Ալիևը զննել է զորամասերի շտաբները, ճաշարաններն ու զորանոցները և նվերներ է բաժանել զինծառայողներին:

Ալիևը նաև հանդիպել ու շփվել է տեղաբնակների հետ և կարգադրել է շուտափույթ վերականգնել հայկական հրետանու հարվածներից ավերված ու վնասված տները:

Այցի արդյունքներով Ալիևը Հայաստանին մեղադրել է «բանակցային գործընթացից շեղվելու» համար, արդարացված է համարել բանակաշինության վրա կատարված ծախսերը, հայտարարել է, թե Ադրբեջանը «երբեք չի հաշտվի» ներկայիս իրավիճակի հետ:

Ադրբեջանական Turan լրատվական գործակալությունը սենսացիոն է որակել Ադրբեջանի արտգործնախարար Էլմար Մամեդյարովի այն հայտարարությունը, որում նա ԼՂ կարգավորման գործընթացում Ռուսաստանի ակտիվացումը նմանեցրել է սառցալեռան, քանի որ երևում է միայն վերնամասը, սակայն ոչ ոք չգիտի, թե ինչ կա ջրի տակ:

Լրատվամիջոցն ընդգծել էր, որ Մամեդյարովի հայտարարությունը հարուցել է փորձագետների ու դիտորդների ակտիվ արձագանքը և միաժամանակ առաջացրել է բազում հարցեր:

Հանրահայտ քաղաքագետ Առասթուն Օրուջլուն լրատվամիջոցի հետ զրույցում ընդգծել է, որ նախարարի հայտարարությունն իր մոտ առաջացրել է բազմաթիվ հարցեր, և պահանջվում են էական ճշգրտումներ. «Ինչո՞ւ է պլանի մասին խոսում Մամեդյարովը և ոչ թե Լավրովը, եթե դա Մոսկվայի պլանն է:

Ապա՝ ի՞նչ շրջաններ նկատի ուներ նախարարը, երբ խոսեց Ադրբեջանի տարածքից հայկական զորքերի դուրսբերման անհրաժեշտության մասին: Խոսքը Ղարաբաղին հարակից շրջանների՞, թե՞ նաև բուն Լեռնային Ղարաբաղի մասին է:

Անհասկանալի է նաև ԵԱՀԿ-ի դերը տվյալ հարցում: Ինչո՞ւ է փուլային պլանն առաջ քաշում Մինսկի խմբում համանախագահող միայն մեկ երկիրը և ոչ թե երեք երկրներն էլ: Ի՞նչ են նշանակում Ռուսաստանի առաջարկում այսբերգի վերնամասի մասին Մամեդյարովի խոսքերը:

Կարծում եմ, որ նախարարը ցանկացել է բարյացակամություն հայտնել բուն պլանին, սակայն հասկացնել է տվել, որ այնտեղ կան պահեր, որոնք ձեռնտու չեն Բաքվին: Անտեսանելի մասը Ադրբեջանի համար ոչ ձեռնտու դետալներն են, այն է` ՀԱՊԿ ու ԵԱՏՄ հրավիրելը: Սերգեյ Լավրովը Բաքվում գտնվելիս բաց կերպ ակնարկել էր այդ մասին:

Եվ վերջապես՝ դա վերաբերում է խաղաղապահների հարցին: Դժվար է կարգավորման ռուսական պլանը պատկերացնել առանց նրա խաղաղապահ զորքերի մասնակցության, իսկ դա շատ վտանգավոր պահ է»:

Օրուջլուն կարծիք է հայտնել, որ Արևմուտքը և առաջին հերթին ԱՄՆ-ը չեն համաձայնվի տարածաշրջանում ռուս խաղաղապահների տեղակայմանը:

Քաղաքական մեկնաբան Ռաուֆ Միրկադիրովն իր հերթին կարծում է, որ ռուսական առաջարկը սառցալեռան հետ համեմատելով` Մամեդյարովն ավելի շուտ ակնարկել է Ռուսաստանի առաջարկներում ոչ բոլոր պահերի բաց լինելու մասին. «Հնարավոր է` կան Ռուսաստանի առաջարկած ինչ-ինչ ընդհանուր սկզբունքներ, որոնք նախատեսում են ԼՂ-ի շուրջ տարածքների ազատում, այդ իմաստով դրանք համապատասխանում են Ադրբեջանի շահերին:

Միևնույն ժամանակ, չկա առաջարկների մանրակրկիտ մշակում և մասնավորապես հստակ չեն հանրաքվեի անցկացման ձևի ու ժամանակի մասին հարցերը (եթե այն պլանի մաս է), խաղաղապահների տեղակայման ու նրանց կազմի հարցերը»:

Միրկադիրովը մտահոգիչ է համարել նաև այն փաստը, որ Հայաստանն անմիջապես մերժել է Լավրովի պլանը` դա որակելով որպես դեմարշ:

Minval.az-ի փոխանցմամբ՝ Ադրբեջանի նախագահ Իլհամ Ալիևը Թարթառի շրջան կատարած այցի ժամանակ հայտարարել է, թե տարեսկզբին Ղարաբաղյան բանակցային գործընթացում գրանցվել է առաջընթաց:

«Մենք չենք ցանկանում պատերազմ: Մենք ցանկանում ենք հակամարտությունը կարգավորել խաղաղ ճանապարհով: Սակայն անիմաստ է բանակցել հանուն բանակցությունների պատրանք ստեղծելու: Մենք հավատարիմ ենք ապրիլի 5-ին ձեռք բերված հրադադարի մասին համաձայնագրին»,- ասել է նա:

Ալիևի խոսքով՝ հայկական կողմի հրետակոծություններից վնասվել է ավելի քան 500 տուն, ավելի քան 100 տուն ավերվել է ամբողջովին:

Spread the love