Սեյրան Օհանյանը հայտնել է, թե ինչի արդյունքում է հայ զինվորն արժանի հակահարված հասցրել թշնամուն

- in Պաշտոնական
Seyran Ohanyan

Մայիսի 20-ին ՀՀ ՊՆ վարչական համալիրում անցկացվել է կենտրոնական ապարատի ղեկավար կազմի խորհրդակցություն, որին հայկական երկու հանրապետությունների զինված ուժերի փոխգործակցության շրջանակում տեսակապի միջոցով մասնակցել է նաև ԼՂՀ ՊԲ ղեկավար կազմը, հայտնում են ՀՀ ՊՆ մամլո ծառայությունից:

Նշվում է, որ պաշտպանության նախարար Սեյրան Օհանյանը նկատել է, որ ապրիլյան քառօրյա պատերազմն ակնհայտորեն ցույց տվեց զինծառայողների բարոյակամային հատկանիշների ամրապնդմանն ուղղված հետևողական աշխատանքի արդյունքները, և հենց այդ հատկանիշների համակցման արդյունքում է, որ հայ զինվորն արժանի հակահարված հասցրեց հակառակորդին:

Հաղորդվում է, որ խորհրդակցության ընթացքում զեկույցով հանդես է եկել ՀՀ ԶՈՒ անձնակազմի հետ տարվող աշխատանքների վարչության պետ, գեներալ-մայոր Ալիկ Ալեքսանյանը, ով բարձր է գնահատել նաև գաղափարադաստիարակչական, իրավական պատրաստության, զինծառայողների իրավակարգի ամրապնդմանը միտված հետևողական աշխատանքների արդյունավետությունը:

Զեկույցով, ըստ հաղորդագրության, հանդես է եկել նաև ՀՀ ՊՆ տեղեկատվության և հասարակայնության հետ կապերի վարչության պետ Վարդան Ավետիսյանը, ով խոսել է նաև քառօրյա պատերազմի ընթացքում և դրան հաջորդած ժամանակահատվածում պետական, մասնավոր և բարեգործական կազմակերպությունների հետ համատեղ իրականացված աշխատանքների մասին, հանդես է եկել կամավորականների և ազատամարտիկների միավորումների հետ համագործակցության առավել սերտացման առաջարկով:

«ՀՀ ԶՈՒ մարտական պատրաստության վարչության պետ, գեներալ-մայոր Տիրան Խաչատրյանն իր հերթին խորհրդակցության մասնակիցներին զեկուցել է զորքերի մարտական պատրաստության վիճակի մասին` ընդգծելով, որ պատշաճ կարգով անցկացվել են մարտական պատրաստության պլանով նախատեսված բոլոր միջոցառումները»,- հայտնում են ՊՆ մամլո ծառայությունից:

Նշվում է,որ քննարկվող թեմաների և զեկույցների շուրջ իրենց տեսակետները, առաջարկություններն ու գնահատականներն են ներկայացրել ԶՈՒ ԳՇ պետ, գեներալ-գնդապետ Յուրի Խաչատուրովը և պաշտպանության նախարարի առաջին տեղակալ Դավիթ Տոնոյանը: Ընդհանուր առմամբ բարձր գնահատելով քառօրյա պատերազմի ընթացքում արձանագրված հաջողությունները` մատնանշվել են շտկման կարիք ունեցող խնդիրները և դրանց լուծման ուղիները:

«Ամփոփելով խորհրդակցությունը` պաշտպանության նախարար Սեյրան Օհանյանը հորդորել է այսուհետ ևս ճշգրիտ, սպառիչ և օպերատիվ կերպով հասարակությանը հասանելի դարձնել զինված ուժերի հաջողությունների և դրանց հիմքում կանգնած զինվորների, սպայական ու ենթասպայական կազմի և հրամանատարության մասին ամբողջական տեղեկատվությունը»,- նշվում է հաղորդագրությունում:

Հավանեցիք, տարածե՛ք սոցցանցերում
20