Վաղը տեղ-տեղ սպասվում է թույլ ձյուն. Եղանակային տատանումները գյուղատնտեսության համար վտանգ չեն ներկայացնում

- in Սոցիալական
177
amanor-dzyun

Հանրապետության տարածքում հունվարի 10-ին Շիրակում, Կոտայքում, Արագածոտնում, Արարատում և Արմավիրում սպասվում է թույլ ձյուն: 11-14-ը սպասվում է առավելապես առանց տեղումների եղանակ:

Քամին՝ հյուսիս-արևմտյան՝ 3-8 մ/վ արագությամբ: Օդի ջերմաստիճանը 11-ին, բացառությամբ Արարատյան դաշտի, կնվազի 3-5 աստիճանով, այնուհետև էապես չի փոխվի:

Երևանում հունվարի 10-ին սպասվում է թույլ ձյուն: 11-14-ը սպասվում է ամպամածություն, գիշերը և առավոտյան` նաև մառախուղ:

Հայաստանի տարբեր մարզերում եղանակային տատանումները գյուղատնտեսության համար վտանգ չեն ներկայացնում:

Այս մասին «Արմենպրես»-ի հետ զրույցում նշեց «Ագրարագյուղացիական միավորում» ՀԿ նախագահ Հրաչ Բերբերյանը` անդրադառնալով ՀՀ ԱԻՆ Հիդրոմետ ծառայության տարածած այն տեղեկատվությանը, ըստ որի, մի շարք քաղաքներում օդի ջերմաստիճանը բարձրացել է: Հունվարի 8-ին Կապանում և եղել է +15, Իջևանում` +12, Դիլիջանում, Գորիսում՝ +11: Ջերմաչափը +15 է ցույց տվել ԼՂՀ մայրաքաղաք Ստեփանակերտում:

«Այն հատվածներում, որտեղ օդի ջերմաստիճանը +15 է, ծառերի արթնացման վտանգ դեռ չկա: Այդ նույն վայրերում երեկոները ջերմաստիճանն իջնում է, ցերեկվա մի քանի ժամը չեն կարող վիճակը փոխել»,-ասաց Հրաչ Բերբերյանը:

Ինչ վերաբերում է ձմռան առաջին ամսվա ընթացքում գրանցված եղանակային պայմաններին, ապա նա նշեց, որ, ընդհանուր առմամբ, գյուղատնտեսական տեսանկյունից սովորական ձմեռ է, որևէ արտառոց բան չկա:

«Կարող ենք ասել, որ ներկայում գյուղատնտեսության համար որևէ վտանգ չկա: Կարծում եմ, որ հաջող մուտք կգործենք նոր տարի: Կարևորը, որ ձյան տեղումներով պայմանավորված ջրամբարներում կունենանք լուրջ ջրաքանակի կուտակում: Ինչ վերաբերում է, սառնամանիքներով պայմանավորված, ժամանակին այգեթաղ իրականացնելուն, ապա ֆերմերները հիմնականում ժամանակին այդ գործն արել են, ռիսկայնության խնդիր չկա: Ըստ նախնական ուսումնասիրությունների` դեռ լուրջ խնդիրներ չունենք»,-հավելեց Հրաչ Բերբերյանը: