Եվ ես սա ձեզ ասում եմ՝ որպես Կոշ քրեակատարողական հիմնարկի նախկին կալանավոր

- in Հասարակություն
Nikol Pashinyan

Ելք խմբակցության ղեկավար Նիկոլ Փաշինյանը խորհրդարանում Կոռուպցիայի կանխարգելման հացերով հանձնաժողովի նախագծի քննարկման ժամանակ կոշտ պատասխան տվեց ՀՅԴ-ական պատգամավոր Անդրանիկ Կարապետյանին, ով «գործ տվողներ» էր անվանել կոռուպցիոն դեպքերի մասին հայտնող անձանց. «Ես այսօր ստիպված էի երկրորդ անգամ ձայն խնդրել և ելույթ ունենալ որպես Կոշ քրեակատարողական հիմնարկի նախկին կալանավոր և իմ տարակուսանքը հայտնել այն մասին, որ և նախորդ գումարման, և ընթացիկ գումարման Ազգային ժողովում ժամանակ առ ժամանակ հնչում են մտքեր ու արտահայտություններ, որոնք ստիպում են ինձ զգալ այնտեղ՝ Կոշ քրեակատարողական հիմնարկի պատերից ներս»:

Նիկոլ Փաշինյանը նշեց, որ անընդհատ օգտագործվում է «գործ տվողներ» արտահայտությունը. «Եկեք մի բան ֆիքսենք՝ գործ տալը դա հանցագործ աշխարհին հատուկ հասկացություն է, իսկ հանցագործ աշխարհի գործառնական նշանակությունը թալանելն է, գողանալը, նաև սպանելը: Մենք ի՞նչ ուղերձներ ենք մեր հանրությանն ուղղում: Մեր բանակում ունեցած բազմաթիվ պրոբլեմները հենց այս խնդրի հետ են կապված, որ հենց մեկը տեսնում է, որ մյուսը տանկից վառելիք է գողանում, պետք է զեկուցագիր գրի ղեկավարությանը, կողքից ասում են՝ արա, հո դու գործ տվող չես: Որ պոստում փամփուշտի արկղերը կամ դատարկ են, կամ մեջը հող ա լցրած, և պետք է համապատասխան զեկուցագրերով տեղեկացնել, ասում են՝ արա, հո դու գործ տվող չես: Եվ մարդկանց ճակատագրեր են դրված զոհասեղանին: Եվ ընդհանրապես ես կարծում եմ սա արդեն էթիկայի հարց է, էս ի՞նչ հասկացություններով են Ազգային ժողովում առաջնորդվում»:

Ըստ Նիկոլ Փաշինյանի, պատգամավորները չպետք է թույլ տան, որ նման ամբիոնից հնչեն ելույթներ, որոնք պատերի տակ պպզողներին թույլ կտան ավելի պինդ պպզել՝ իրենց զգալով ՀՀ տերեր. «Եվ ես ձեզ պատասխանատու կերպով ասեմ՝ որպես Կոշ քրեակատարողական հիմնարկի նախկին կալանավոր, որ գործ տալու մասին ազդարարողներն իրենք վազում ու շատ ակտիվ գործ են տալիս իրենց իսկ տրամաբանության սահմաներում ստեր գրելով ու մարդկանց նկատմամբ զրպարտանք ու վատ բաներ անելով, հենց էդ հանցագործ աշխարհի ներկայացուցիչները, հենց էդ գողականները, ովքեր միֆ են ստեղծել: Իմ համոզմունքը հետևյալն է, որ չակերտավոր գործ տվողների դեմ պայքարողներն ամենամեծ գործ տվողներն են: Եվ ես սա ձեզ ասում եմ՝ որպես Կոշ քրեակատարողական հիմնարկի նախկին կալանավոր»:

Մարիամ ՄԱՆՈՒԿՅԱՆ

Spread the love
  • 53
    Shares