Երևանի պետական հենակետային բժշկական քոլեջն այսօր

Naira Nersisyan bjshkakan qolej

Երևանի պետական հենակետային բժշկական քոլեջի ուսումնական աշխատանքների գծով փոխտնօրեն Նաիրա Ներսիսյանի հետ զրուցում ենք այս ուսումնական հաստատության այս տարվա ընդունելության, աշխատանքների ու ծրագրերի մասին:

Հայաստանում միջնակարգ բժշկական կրթությամբ կադրերի պատրաստումը   սկսվել է դեռևս 1921 թվականից՝ բժիշկ Գրիգոր Արեշյանի նախաձեռնությամբ, Երևանի թիվ 1 ծննդատան բազայի հիման վրա: Այն հետագայում դարձել է բժշկական բազային ուսումնարանի հիմնաքարը, որի շուրջ միավորվել են բժշկական կրթությամբ կադրեր պատրաստող տարբեր կրթօջախներ և ձևավորվել որպես  բժշկական ուսումնարան, որը առ այսօր գործում է նույն տեղում. Երևան, Կորյունի փող. 10 շենք:

Հետագայում նույն բժշկական ուսումնարանի բազայի հիման վրա ստեղծվել են բժշկական ուսումնարաններ և  մասնաճյուղեր տարբեր շրջաններում, որոնք հետագայում առանձնացել են ու վերակազմավորվել որպես  առանձին բժշկական ուսումնական հաստատություններ:

1978 թվականին մեր ուսումնական հաստատությունն արժանացել է բազային բժշկական ուսումնարանի կոչմանն, իսկ ՀՀ կառավարության որոշմամբ և Առողջապահության նախարարի հրամանով, 2003 թվականին վերակազմավորվել է  որպես ,,Երևանի պետական հենակետային բժշկական քոլեջ,, ՊՈԱԿ-ի:

Կարելի է ասել  գրեթե մեկդարյա պատմություն ունի հենակետային բժշկական քոլեջը, և մեծ ներդրում ունի միջին մասնագիտական կրթությամբ բժշկական բարձր որակավորում ունեցող  կադրերի պատրաստման գործում:

1992 թվականից Երևանի բժշկական հենակետային քոլեջի տնօրենն է Մկրտիչ Մկրտչյանն, ով նաև ղեկավարում է ՀՀ պետական բժշկական քոլեջների տնօրենների խորհուրդը:

Երևանի պետական հենակետային բժշկական քոլեջում 2017-18 թթ. ընդունելությունը կազմակերպվում է անվճար և վճարովի հիմունքներով՝ հետևյալ մասնագիտությունների գծով.

Բաժինները ըստ մասնագիտությունների Ուսման տևողությունը
Միջնակարգ կրթությամբ Հիմնական կրթությամբ
Քույրական գործ 3 տարի 4 տարի
Մանկաբարձական գործ 3 տարի 4 տարի
Դեղագործություն 2 տարի 3 տարի
Ատամնատեխնիկական գործ 2 տարի 3 տարի
Բուժական կոսմետոլոգիա 2 տարի 3 տարի

Քոլեջ կարող են դիմել հիմնական, միջնակարգ, նախնական մասնագիտական, միջին մասնագիտական և բարձրագույն մասնագիտական կրթություն ունեցող անձինք: Քոլեջում ընդունելությունը իրականացվում է ընդունելության քննության «Կենսաբանություն» առարկայի արդյունքների հիման վրա, ընդունելության կարգով սահմանված մրցութային հիմունքով:

Շրջանավարտները ստանում են համապատասխանաբար բուժրոջ/բուժեղբոր, մանկաբարձի, դեղագործի, ատամնատեխնիկի և բուժքույր/բուժեղբայր-կոսմետոլոգի որակավորում: Ուսուցումը՝ առկա է (ստացիոնար), հայերեն լեզվով:

Ուսումնական գործընթացն իրականացվում է միջազգային կրթական չափանիշներին համապատասխանող չափորոշիչներով և ծրագրերով:

Գերազանց և բարձր առաջադիմությամբ շրջանավարտներն իրավունք ունեն ուսումը շարունակելու ՀՀ պետական բուհերի երկրորդ կուրսերում հեռակա ուսուցմամբ քոլեջի և մի շարք բուհերի միջև կնքված պայմանագրերի համաձայն:

Երևանի պետական հենակետային բժշկական քոլեջը ունի  հարուստ նյութատեխնիկական բազա, իրականացրել է կրթական բազում բարեփոխումներ,  այստեղ ուսանողների համար ստեղծված են լավագույն պայմանները որակյալ կրթություն ստանալու համար: Երևանի պետական հենակետային բժշկական քոլեջի ուսանողների ուսումնագործնական պարապմունքները և պրակտիկաները անցկացվում են Երևանի և մարզերի գրեթե բոլոր խոշոր կլինիկաներում, պոլիկլինիկաներում, ծննդատներում, դեղատնային ցանցերում և կոսմետոլոգիական առաջատար կենտրոններում:

Ուսանողների ամենամեծ ձեռքբերումը քոլեջում գիտելիքն է, ընտրած մասնագիտության մեջ հմտանալը, համապատասխան կարողությունների ձեռք բերելը, ինչի արդյունքում էլ շրջանավարտն իր տեղն է գտնում աշխատաշուկայում:

Երևանի պետական հենակետային բժշկական քոլեջի շրջանավարտները դիպլոմներ ստանալուց հետո կարող են աշխատանքի անցնել ինչպես հանրապետության, այնպես էլ արտասահմանյան բուժհաստատություններում, քանի որ քոլեջի ավարտական դիպլոմը  ճանաչվում է ԱՄՆ բոլոր նահանգներում, ԱՊՀ բոլոր և Եվրոպայի մի շարք երկրներում: Բազմաթիվ դրական արձագանքներ ենք ստանում տարբեր երկրների բուժհիմնարկներից, որտեղ աշխատում են մեր շրջանավարտները:

Քոլեջում դիմորդի փաստաթղթերն ընդուվում են 2017թ. հունիսի 26-ից մինչև ընդունելության քննության օրվանից 2 օր առաջ, ամեն օր, բացի կիրակի օրերից ժամը 9:00-16:00: Ընդունելության քննությունները սկսվում են օգոստոսի 1-ից:

Մանրամասների համար կարող եք այցելել ԵրևանԿորյունի փող., 10 շենք:

Spread the love
  • 45
    Shares