Փիրուզյանի սպանությունը նախապատմություն ուներ

- in Հասարակություն
Dzernashxta

Այսօր առավոտյան ժամը 7:00-ի սահմաններում ձերբակալվել է անցած տարի սեպտեմբերին Թուֆենկյան հյուրանոցի բակում հրազենային վիրավորում ստացած Ալավերդիում հայտնի քրեական հեղինակություն Վահագն Աբգարյանը՝ Ալավերդցի Վահագը։

Մեր տեղեկություններով` նա ձերբակալվել է անցած տարի Ալավերդիի շուկայի տարածքում կատարված սպանությունը կազմակերպելու կասկածանքով։

2017 թվականի հունիսի 13-ին 12:10-ի սահմաններում, Ալավերդու կենտրոնական Թումանյան փողոցի ամենաբանուկ հատվածում «Կատա» սուպերմարկետի շենքում գտնվող և մայրուղուն հարող ծաղկի խանութից արձակված հրազենային կրակոցներից սպանվել է Ալավերդի քաղաքի Զորավար Անդրանիկի 22 շենքի բնակիչ, 30-ամյա Կամո Փիրուզյանը: Կամո Փիրուզյանը շտապօգնության մեքենայով Ալավերդու բժշկական կենտրոնի հիվանդանոց տեղափոխելիս ճանապարհին մահացել էր։ Կամո Փիրուզյանին հրազենային կրակոցներով սպանող անձը տեղում հանձնվել էր ոստիկանությանը:

Փիրուզյանի սպանությունը նախապատմություն ուներ։ Կամո Փիրուզյանի եղբայրը՝ Վարդան Փիրուզյանը, մեղադրվում էր 2016թ.-ի մայիսի 19-ի կեսգիշերին Ալավերդի քաղաքի Զորավար Անդրանիկի 22 շենքի բակում հրազենային կրակոցներով Ալավերդի քաղաքի բնակիչ Վարդան Ավագյանին և Երևան քաղաքի բնակիչ Էդուարդ Պողոսյանին սպանելու համար:

Կամո Փիրուզյանի սպանությունը Ալավերդիում 2016թ.-ի հունիսի 6-ի քաղաքապետի ընտրության ընթացքում սկսված «ռազբորկաների» շարունակությունն էր։

Հիշեցնենք նաև, որ սեպտեմբերի 14-ին օրը ցրեկով վերնիսաժի հարևանությամբ գտնվող Թուֆենկյան հյուրանոցի բակում ավտոմատից կրակոցներ էին արձակվել Վահագն Աբգարյանի ուղղությամբ։ Արձակված կրակոցներից սպանվել էր Վահագն Աբգարյանի անվտանգության աշխատակիցը՝ Գագիկ Մոսինյանը, իսկ մյուսները կրակոցներից չէին տուժել: Ալավերդցի Վահագը կրծքավանդակի հարևանությամբ ծանր հրազենային վիրավում էր ստացել և տեղափոխվել էր հիվանդանոց, որտեղ նրան վիրահատել էին՚ Դեպքից հետո սպանության համար հետախուզվում էր հայտարարվել Ալավերդիի բնակիչներ Ալբերտ Բլբուլյանի, Արմեն Կարադավիդովի եւ Ռաֆիկ Խաչատրյանի նկատմամբ, որոնք հետագայում հայտնաբերվել էին։

Spread the love