ԱԱԾ-ն մշակույթի նախարարությունում ուսումնասիրություններ չի իրականացնում

Ազգային անվտանգության ծառայությունը մշակույթի նախարարությունում ուսումնասիրություններ չի իրականացնում, քանի որ հնարավոր չարաշահումների վերաբերյալ իրավական հիմքեր նորանշանակ նախարարը չունի: Ազգային ժողովում լրագրողների հետ զրույցում այս մասին ասաց ՀՀ մշակույթի նախարար Լիլիթ Մակունցը:

«Նախարարությունում չարաշահումների հետ կապված իրավական հիմքեր ես չեմ կարող տրամադրել: Այսինքն, ես չեմ կարող օգտագործել չարաշահումներ բառը, որը իրավական տերմին է: Ես պետք է դրա համար հիմքեր ունենամ, բայց իրավական հիմքեր ես չունեմ»,-ընդգծեց Մակունցը:

Այնուամենայնիվ, Լիլիթ Մակունցն ընդգծեց, որ եղել են բյուջեի միջոցները ոչ բարեխիղճ ծախսելու դեպքեր, այսինքն՝ նախատեսվածից ավելի միջոցառումների պլանավորում, ինչը բյուջեի առումով հանգեցրել է ճգնաժամի: «Միգուցե, նրանք դա բարի նպատակներով են արել, ցանկացել են ավելի շատ միջոցառումներ անցկացնել, սակայն ստացվում է, որ այս առումով բավականին սխալ քաղաքականություն է տարվել»,- ասաց նախարարը՝ պարզաբանելով, որ խոսքը 2018թ. հունվարից մինչև իր պաշտոնավարումն ընկած ժամանակահատվածի մասին է:

Հարցին՝ հնարավո՞ր է որոշ ծրագրեր վերանայվեն, նախարարը պատասխանեց. «Հիմա մենք որդեգրում ենք հետևյալ քաղաքականությունը. այն ծրագրերը, որոնք նախնական հաստատված են եղել, բայց վերջնական չեն, մենք փորձում ենք դրանք վերանայել և խնայողություններ անել: Դրանց մի մասի համար գումարներ արդեն հատկացված են, մյուս մասի համար՝ դեռ ոչ»:

Հայաստանի մշակույթի նախարար Լիլիթ Մակունցն անդրադարձել է Հայաստանի Հանրապետության օրհներգն ու զինանշանը փոխելու մասին խոսակցություններին: Խորհրդարանում լրագրողների հետ զրույցում նախարարն ընդգծեց, որ այդ հարցով քննարկումներ չեն ունեցել, բայց հաստատեց, որ շատ մարդիկ այդ մասին բարձրաձայնում են:

«Բարձրաձայնվում են և՛ օրհներգի, և՛ զինանշանի փոփոխության հետ կապված հարցեր: Սակայն այդ հարցը մեկ օրում կամ մեկ մարդու միջոցով չպետք է լուծվի, մենք քննարկում պետք է ծավալենք: Այս պահին դեռ չենք ձեռնարկել, բայց անպայման կունենանք քննարկում»,–  նշեց նախարարը:

Նա շեշտեց, որ պատրաստվում են անդրադառնալ խնդրին, քանի որ հարցը գնալով հանրայնանում է, և շատ մարդիկ են դրա մասին բարձրաձայնում:

Spread the love