Միհրան Պողոսյանը ՀՔԾ-ին առաջարկել է իրեն հարցաքննել տեսակապի միջոցով

- in Պնակալեզներ
Mihran Poghosyan qetrin

ՀՀ ԱԺ նախկին պատագամավոր Միհրան Պողոսյանը ՀՀ հատուկ քննչական ծառայությանն առաջարկել է իրեն հարցաքննել տեսակապի միջոցով, քանի որ գտնվում է արտերկրում:

Այս մասին մեր հարցին ի պատասխան ասաց ՀՀ հատուկ քննչական ծառայության մամուլի քարտուղար Մարինա Օհանջանյանը՝ հավելելով, որ Պողոսյանը հրավիրվել էր հարցաքննության, սակայն չէր ներկայացել:

Օհանջանյանն ասաց, որ Պողոսյանի տեսակապի միջոցով հարցաքննելու առաջարկը մերժվել է՝ այդպիսի ընթացակարգ ՀՀ քրեական դատավարությամբ նախատեսված չլինելու հիմքով: «Վարույթն իրականացնող մարմինը Միհրան Պողոսյանին կրկին հրավիրել է հարցաքննության՝ առաջարկելով հայտնել ՀՀ վերադառնալու ժամկետների մասին»,- հավելեց Օհանջանյանը:

Մի քանի օր առաջ տեղեկացրել էինք, որ Օֆշորի գործը վերաբացելուց հետո ՀՀ հատուկ քննչական ծառայությունը փորձում է կապ հաստատել ՀՀ ԱԺ նախկին պատգամավոր Միհրան Պողոսյանի հետ՝ նրան հարցաքննության հրավիրելու համար:

Սույն թվականի հունվարին հայտնի դարձավ, որ Միհրան Պողոսյանի՝ Պանամայում գրանցած օֆշորային ընկերությունների վերաբերյալ հարուցված քրեական գործը վերաբացվել է:

2016 թվականին «Հետքը» գրեց, որ այդ ժամանակ ՀՀ գլխավոր հարկադիր կատարող, արդարադատության գեներալ-մայոր Միհրան Պողոսյանն ընկերություններ ունի Պանամայի օֆշորային գոտում։ Համաձայն գաղտնազերծված փաստաթղթերի՝ ՀՀ գլխավոր հարկադիր կատարողը բաժնետեր էր Պանամայում գրանցված երեք ընկերությունների՝ «Սիգթեմ ռեալ իսթեյթ ինքորփորեյթիդ» (Sigtem Real Estates Incorporated), «Հոփքինթեն թրեյդինգ ինքորփորեյթինգ» (Hopkinten Trading Incorporated), «Բանջիո ինվեստ» ԲԸ (BANGIO INVEST S.A.):

Հրապարակումից հետո մեծ աղմուկ բարձրացավ, ինչից հետո՝ 2016թ. ապրիլի 18-ին Պողոսյանը հրաժարական տվեց ԴԱՀԿ պետի պաշտոնից:

2016թ-ի մայիսին ՀՔԾ-ն հարուցել էր քրեական գործ ՀՀ քրեական օրենսգրքի 310 հոդվածի հատկանիշներով (Ձեռնարկատիրական գործունեությանն ապօրինի մասնակցելը, պատժվում է ազատազրկմամբ առավելագույնը երկու տարի ժամկետով), իսկ 2017 թվականի հունվարի 23-ին ՀՔԾ-ն որոշում կայացրեց Պողոսյանի նկատմամբ քրեական հետապնդում չիրականացնելու և քրեական գործով վարույթը կարճելու մասին՝ նրա արարքում հանցակազմի բացակայության հիմքով:

Հավանեցիք, տարածեք սոցցանցերում ...