Մոսկվան Հայաստանին սպառնում է ԻՊ գրոհայիններո՞վ

- in Վերլուծական

Սիրիայում եւ Իրաքում պարտությունից հետո «Իսլամական պետությունը» հետաքրքրությունը տեղափոխում է դեպի Ղազախստանի, Ուզբեկստանի, Տաջիկստանի, Ղրղզստանի եւ Հայաստանի տարածք, ասել է ՌԴ ՆԳՆ ծայրահեղականության դիմակայության գլխավոր վարչության պետ Օլեգ Իլյինիխը։

Իլյինիխի խոսքով՝ ԻՊ գործիչները պլաններ են փայփայում կազմավորելու համաշխարհային ահաբեկչական ցանցեր, «քնած» օղակներ, որոնք կկարողանային ահաբեկչական գրոհներ իրականացնել ողջ աշխարհում:

Իլյիխինի այս հայտարարությանը արձագանքել է Հայաստանի Ազգային անվտանգության ծառայությունը: ԱԱԾ հայտարարության մեջ ասվում է, որ «Մշտական հիմունքներով իրականացվում է այլ տարածաշրջաններում միջազգային ահաբեկչական կառույցների գործունեության մանրակրկիտ վերլուծություն և ՀՀ անվտանգության դեմ որևէ նախանշանային երևույթի բացահայտման պարագայում դրանք անմիջապես կկանխվեն՝ նաև գործընկեր հատուկ ծառայությունների հետ սերտ համագործակցությամբ: Միջազգային ահաբեկչության դեմ պայքարի ոլորտում ՀՀ ԱԱԾ-ն ակտիվորեն համագործակցում է բազմաթիվ երկրների գործընկեր հատուկ ծառայությունների հետ, այդ թվում ԱՊՀ հակաահաբեկչական կենտրոնի ձևաչափով»,- ասվում է ԱԱԾ հայտարարության մեջ:

ՌԴ ՆԳՆ պաշտոնյայի թվարկած երկրների շարքում աչքի է զարնում այն, որ բացակայում է Ադրբեջանը, որը նույնպես ԱՊՀ անդամ է: Կենտրոնասիական իսլամադավան երկրների պարագայում կան որոշակի այսպես ասած նախադրյալներ: Բանն այն է, որ այս երկրներից շատ քաղաքացիներ միացել էին ԻՊ-ին, եւ Սիրիայում ու Իրաքում ԻՊ պարտությունից հետո նրանք կարող են վերադառնալ իրենց երկրներ, կազմելով «ահաբեկչական ցանցի օղակներ»:

Ընդհանրապես, համաշխարհային մամուլում պարբերաբար քննարկվում է այդ հարցը, թե ուր են մեկնելու ԻՊ անդամները: Հայտնի է, որ ԻՊ-ն բաղկացած էր տարբեր խմբավորումներից, եւ Մերձավոր Արեւելքի շրջանում հիմնական խաղացողներն ունեին «իրենց» խմբավորումները: Օրինակ, հայտնի է, որ ԻՊ գրոհայինների մի զգալի մասը բնակություն է հաստատել Թուրքիայում, բնականաբար մնալով Անկարայի քաղաքականության գործիք:

Մոսկվան ունե՞ր իր «բաժնեմասը» ԻՊ-ում: Մամուլի հրապարակումներից հայտնի է, որ ԻՊ շարքերում կան հարյուրավոր ադրբեջանցիներ, որոնց զենք էր մատակարարվում Բաքվից: Ընդ որում, նրանց մեծ մասը ռուսական Հյուսիսային Կովկասից էին, ՌԴ իշխանությունների կողմից են տեղում հավաքագրվել եւ Սիրիա ու Իրաք ուղարկվել Սոչիի օլիմպիադայից անմիջապես առաջ: ՌԴ իշխանություններն ընդունել են այս հանգամանքը: Դա նշանակում է, որ այդ անձինք իրենց հայտնի են: Ո՞ւր են վերադառնալու այդ անձինք, եւ ինչու ցուցակում չկա Ադրբեջանը:

Այս ֆոնին, ՌԴ ՆԳՆ պաշտոնյայի հայտարարությունը ստանում է Հայաստանին բացահայտ սպառնալիքի երանգ:

Մոսկվան վերջին շրջանում անցել է «փափուկ ուժի» լայնածավալ կիրառմանը, ստեղծելով Լազարեւսկի կոմիտեն, ուժեղացնելով քարոզչությունը Հայաստանի դեմ: ՌԴ ՆԳՆ բարձրաստիճան պաշտոնյայի հայտարարությունը արդյոք այս շարքից է:

Հայաստանի վարչապետը Արցախում պատերազմի վերսկսման պատասխանատվությունը դրեց Մոսկվայի վրա, հայտարարելով, որ եթե Ռուսաստանը չցանկանա՝ ռազմական գործողությունները չեն վերսկսվի: Գուցե այս առիթով էլ նման մի հայտարարության ժամանա՞կն է, թեեւ ՀՀ ԱԱԾ արձագանքի մեջ նշմարվում է նման ակնարկ: