Դիլիջան ազգային պարկի ծառագողերը նոր հնարքներ են մտածել

- in Սոցիալական
qami

Անցած տարվա վերջերից Դիլիջան Ազգային Պարկի ծառագողերը մասսայաբար նոր հիմարություն են սկսել։ Ցանկացած փչակ կամ ներս ընկած մաս ունեցող ծառ կրակի են տալիս, որպեսզի հետո որպես թափուկ հանեն ու օրենքի հետ խնդիր չունենան։ Շատերի վրա նույնիսկ կացինով իրենց նշանն են դնում, որ մյուս գողերը ձեռք չտան։

Այս մասին տեղյակ ենք պահել բազմաթիվ պաշտոնատար անձանց, տեղեկացնում է Բնապահպանի տուն նախաձեռնության Ֆեյսբուքի էջը։

ՉՀԱՐԳԵԼԻ ծառագողեր, խոստանում ենք ձեզ, որ կանենք ամեն ինչ, որպեսզի այս ծառերից և ոչ մի հատը ձեզ չհասնի։ Ազգային Պարկի տնօրենը խոստացել է, որ դրանք կուղղվեն կարիքավոր ընտանիքներին ու դպրոցներին։

Իսկ շուտով ընդհանրապես ձեր ոտքը անտառից կկտրվի։ Շատ չի անցնի, և անտառ կմտնեն միայն այն մարդիկ, ում համար ծառը սեփական տունը տաքացնելու միջոց է և ոչ թե տասնյակներով կտրել-ծախելու ու փող աշխատելու աղբյուր։ Եվ այդ ժամանակ ամեն ինչ տեղը կընկնի և մենք էլ հանգիստ սրտերով կգնանք այստեղից։

Իսկ քանի դեռ այդ օրը չի եկել, քանի դեռ աղվեսները հավաբնում հերթապահություն են անում, քանի դեռ հավերը պակասում են, մենք այստեղ են՝ գիշեր թե ցերեկ։

Հիշեցնում ենք նաև, որ մեր աշխատակիցների տեսախցիկներն ու հեռախոսները օնլայն վիճակով, այսինքն՝ ուղիղ եթերով, ձայնագրում են ամեն վայրկյանը ինտերնետում։ Ինչը նշանակում է, որ եթե հին սովորությունների համաձայն տաս հոգով հարձակվեք մեկի վրա, վնասեք, խլեք կամ կոտրեք նկարահանող սարքը, ձեր անչափ գեղեցիկ դեմքն ու մեքենայի համարները միևնույնն է մնալու են ինտերնետում և հասանելի են լինելու ոստիկանությանը։ Դե մենք էլ, իհարկե, ԱՆՊԱՅՄԱՆ հետևելու ենք, որպեսզի դուք անպատիժ չմնաք։

Հավանեցիք, տարածեք սոցցանցերում ...