Danakaharutyun

Երևանի ընդհանուր իրավասության դատարանի՝ Շենգավիթ վարչական շրջանում գտնվող նստավայրում Դավիթ Բալայանի նախագահությամբ շարունակվեց Կարեն Հ.-ի գործի դատական քննությունը:

39-ամյա Կարեն Հ.-ին մեղադրանք է առաջադրված առանձին դաժանությամբ կատարված սպանության համար՝ ՀՀ քրեական օրենսգրքի 104 հոդվածի 2-րդ մասի 5-րդ կետով:

Ըստ մեղադրանքի՝ Կարեն Հ.-ն առանձին դաժանությամբ սպանել է իր նախկին մտերմուհուն՝ Մարիամ Դ.-ին:

Առաջադրված մեղադրանքի համաձայն՝ կին ու երեք անչափահաս երեխա ունեցող Կարեն Հ.-ն մտերմացել էր Մարիամ Դ.-ի հետ, և 2015 թվականին ծնվել է նրանց համատեղ դուստրը: Երեխան բնակվել է հոր՝ Կարենի ընտանիքում, իսկ երեխայի մոր՝ Մարիամի հետ եղել են տարաձայնություններ՝ Կարեն Հ.-ն, ըստ մեղադրանքի, խոչընդոտել է երեխայի հետ մոր տեսակցություններին:

Տարաձայնությունները Մարիամի հետ եղել են շարունակական, և, ըստ մեղադրանքի, 2018 թվականի օգոստոսի 30-ի վաղ առավոտյան՝ ժամը 7-ն անց 33-ի սահմաններում Կարեն Հ.-ն այցելելով Երևանի Արարատյան փողոցի տներից մեկում Մարիամի Դ.-ի վարձակալած բնակարան, դանակի շուրջ 70 հարված հասցնելով, առանձին դաժանությամբ սպանել է նրան, մարմինը ծածկել է ծածկոցով ու հեռացել է:

Կարեն Հ.-ի խափանման միջոցը կալանավորումն է: Նա դատարան է ներկայացվում հաշմանդամի սայլակով՝ հայտարարելով, թե չի կարողանում տեղաշարժվել:

Առաջադրված մեղադրանքը Կարեն Հ.-ն չի ընդունում: Նա հայտարարել է, թե դեպքի օրվա վաղ առավոտյան գնացել էր Մարիամի տուն՝ նրան օդանավակայան տանելու, բայց տան շեմին անծանոթ տղամարդկանց կողմից ինքն ու Մարիամը ենթարկվել են հարձակման, ինքը ստացել է վնասվածքներ ու փախել է: Կարենը խնդրել է պարզել իրենց վրա հարձակված անծանոթ տղամարդկանց ինքնությունը…

Երևանի Արարատյան փողոցում գտնվող՝ Մարիամ Դ.-ի վարձակալած բնակության վայրի մուտքի դուռը եղել է շրջակայքում տեղադրված տեսահսկող սարքերի տեսադաշտում:

Ըստ տեսանյութերի զննության արձանագրությունների՝ 2018 թվականի օգոստոսի 30-ին, ժամը 7-ն անց 32-ին Արարատյան փողոցի տվյալ հատվածում հայտնվել է կապույտ «Շևրոլե» մեքենա: Մինչ այդ որևէ անձ մուտք չի գործել Մարիամ Դ.-ի տուն: Ժամը 7-ն անց 36-ին Մարիամի տան մուտքի դռանն է մոտեցել կապույտ շապիկով մի տղամարդ, ձախ ձեռքին՝ ինչ-որ առարկա, կանգնել է մուտքի դռան մոտ, շարժվել է դեպի պատուհանը, նորից մոտեցել է մուտքի դռանն ու ներս է մտել: Դրանից հետո որևէ այլ անձ Մարիամի տուն չի մտել:

Ժամը 9-ն անց 15-ին նույն կապույտ շապիկով տղամարդը ճոճվելով դուրս է եկել Մարիամի տանից, քայլել է Արարատյան փողոցով:

Նրա ձախ ձեռքին ինչ-որ առարկա կար, աջ ձեռքով գրպանից ինչ-որ իր է հանել ու անհետացել է տեսախցիկի տեսադաշտից:

Ժամը 9-ն անց 46-ին վերը հիշատակված կապույտ «Շևրոլե» մեքենան հայտնվել է տեսախցիկի տեսադաշտում, ղեկին երևացել է նույն կապույտ շապիկով տղամարդը, հետո մեքենան դուրս է եկել տեսախցիկի տեսադաշտից:

Մարիամի ծանոթ Համլետ Ա.-ն մասնակցելով տեսանյութի զննությանը՝ նշել է, թե կապույտ շապիկով տղամարդը Մարիամի երեխայի հայրն է՝ Կարեն Հ.-ն:

Կարեն Հ.-ն եղել է «Պանտերա Սեքյուրիթի» ընկերության տնօրենը:

Դատարանը քրեական գործում առկա գրավոր ապացույցների հետազոտման փուլում է:

Քրեական գործը բաղկացած է վեց հատորից:

Դատական այս նիստին հետազոտվեցին հիմնականում Կարեն Հ.-ի նկատմամբ հարուցված կատարողական վարույթի փաստաթղթերը:

Կարեն Հ.-ն իր ու Մարիամի համատեղ երեխային պահում էր իր տանը և խոչընդոտում էր երեխայի հետ մոր հանդիպումներին:

Մարիամը դիմել էր դատարան, դատարանը երեխայի բնակության վայր էր ընտրել հոր բնակության վայրը, միաժամանակ հաստատել էր մոր իրավունքը՝ տեսակցելու երեխային, մասնակցելու նրա դաստիարակությանը: Սակայն Կարեն Հ.-ն խոչընդոտել է, մոր ու երեխայի հանդիպումները չեն կայացել:

Մարիամը դիմել է հարկադիր կատարման ծառայություն, 2018 թվականի փետրվարի 2-ին հարուցվել է կատարողական վարույթ:

Արգելվել է Կարեն Հ.-ին՝ խոչընդոտել երեխայի ու մոր շփմանը: Սահմանվել է, որ մայրը երեխային կարող է տեսակցել շաբաթը մեկ անգամ՝ ուրբաթ օրերին, ժամը 12-ից 14-ը: Կատարողական վարույթն ուղարկվել է Կարեն Հ.-ի բնակության վայրի տարածքային ծառայություն:

2018 թվականի մարտին կողմերը հրավիրվել ու ծանոթացվել են որոշմանը: Սակայն հետագա շաբաթների ու ամիսների ընթացքում այդպես էլ մայրը չի կարողացել շփվել երեխայի հետ: Ամեն շաբաթ կազմվել են արձանագրություններ՝ մոր և երեխայի տեսակցությունը չկայանալու մասին:

Կարեն Հ.-ն որոշ դեպքերում չի պատասխանել հեռախոսազանգերին: Նրա ընկերություն կատարված զանգերին պատասխանել է աշխատակցուհին ու տվել է տարբեր պատասխաններ՝ որ վերջին շրջանում Կարեն Հ.-ին չի տեսել, որ Կարեն Հ.-ն ասել է՝ թող պաշտոնապես գրությամբ տեղեկացնեն, որ պատասխանեմ:

Կարեն Հ.-ի բնակության վայրի մուտքի դուռը փակ է եղել, հարևաններն ասել են, որ նա տեղափոխվել է:

Մի դեպքում Կարեն Հ.-ն դիմել էր հարկադիր կատարման ծառայություն՝ հայտնելով, թե աշխատանքի վայրից գործուղվում է Մեղրի 2018 թվականի փետրվարի 24-ից մինչև մարտի 4-ը: Իր հետ մեկնում են նաև կինն ու կրտսեր դուստրը: Եթե երեխայի մայր Մարիամը ցանկանում է այդ ընթացքում երեխային տեսակցել, թող գա… Մեղրի…

Մարիամն ու նրա ներկայացուցիչ փաստաբանը դիմումներ են գրել Մարդու իրավունքների պաշտպանին, գլխավոր դատախազին, այլ պատկան մարմիններին՝ ներկայացնելով ստեղծված իրավիճակը ու խնդրելով միջոցներ ձեռնարկել, որպեսզի մայրը, ի կատարումն դատարանի որոշման, կարողանա տեսակցել մանկահասակ երեխայի հետ:

Այդ ընթացքում շաբաթ շաբաթի հետևից հարկադիր կատարողը շարունակել է արձանագրություններ կազմել՝ մոր ու երեխայի տեսակցության չկայացման վերաբերյալ: Եթե անգամ հաջողվել է կազմակերպել տեսակցությունը, այն խափանվել է, կողմերը դիմումներ են գրել՝ միմյանց մեղադրելով տեսակցությունը խափանելու համար՝ Կարեն Հ.-ն Մարիամին մեղադրել է տեսակցության պահին իր ու իր հարազատների հասցեին վիրավորական արտահայտություններ անելու, աղմուկ բարձրացնելու համար, Մարիամը նշել է, թե Կարենը ակնհայտորեն երեխային հասկացնում է, որ իրեն մոտ չգա…

Հրապարակվեց գլխավոր հարկադիր կատարողի կողմից հանրապետության գլխավոր դատախազին ուղղված գրությունը առ այն, որ Կարեն Հ.-ի գործողությունները կարող են պարունակել հանցակազմի տարրեր, եթե այդպես է՝ դրանց պետք է տրվի քրեաիրավական գնահատական:

Հարկադիր կատարողը Կարեն Հ.-ին նախազգուշացրել է դատարանի որոշման կատարմանը խոչընդոտելու համար նախատեսված քրեական պատասխանատվության մասին:

Կարեն Հ.-ն հարկադիր կատարողին ուղղորդել է բոլոր հարցերով դիմել իր փաստաբանին…

Ի վերջո՝ հարուցվել է քրեական գործ, Մարիամը ճանաչվել է տուժող, իսկ Կարեն Հ.-ն ներգրավվել է որպես մեղադրյալ: Նա հրաժարվել է ստորագրել որոշումը…

Փոքրիկ երեխայի ծնողների տևական հակամարտությունն ավարտվել է Մարիամի սպանությամբ, որի համար առաջադրված մեղադրանքը Կարեն Հ.-ն չի ընդունում…

Հրապարակվեց հեռախոսազանգերի վերծանման արձանագրություն: Նշված հեռախոսում առկա հաղորդագրություններն ու ձայնագրությունները քննիչը ներբեռնել էր իր համակարգչի մեջ, դրանց մի մասը, որն ըստ քննիչի՝ առնչվում էր այս գործին, առանձնացվել ու թղթային տեսքով կցվել է քրեական գործին: Ահա այդ հեռախոսային հաղորդագրությունները դատարանում հրապարակելու հարցը դարձավ իրավական քննարկման առարկա: Բանն այն է, որ հաղորդագրությունները գրված են լատինատառ, ռուսատառ, բայց՝ հայերեն:

Ամբաստանյալի շահերի պաշտպանն առարկեց այլատառ տեքստի հրապարակման դեմ՝ հիմնվելով օրենքի պահանջի վրա, որ դատավարության լեզուն հայերենն է, իսկ ներկայացված տեքստերը հայատառ չեն. «Ես այդ տառերը չեմ ճանաչում»,- ասաց պաշտպանը:

Մեղադրող դատախազն ասաց՝ հայատառ չէ, բայց հայերեն է, ես կընթերցեմ:

Պաշտպանը շարունակեց առարկել:

Նախագահողը նշեց՝ հայատառ չէ, բայց օտարալեզու էլ չէ, օրենքը պահանջում է՝ օտարալեզու տեքստը թարգմանել, բայց տվյալ դեպքում՝ ի՞նչ լեզվից ի՞նչ լեզվով թարգմանվի:

Քննարկման արդյունքում դատարանը որոշեց, որ մեղադրանքի կողմի ներկայացրած այդ ապացույցը չի կարող հրապարակվել, քանի որ հայատառ չէ, չնայած՝ հայերեն է: Մինչև հաջորդ նիստը եթե մեղադրանքի կողմը նույն տեքստը կարողանա ներկայացնել հայատառ, կարող է և այն հրապարակել…

Դատական հաջորդ նիստը տեղի կունենա դեկտեմբերի 4-ին:

Հավանեցիք, տարածեք սոցցանցերում ...