Հայաստանի ազգային ֆիլհարմոնիկ նվագախումբը տասը համերգով հանդես կգա Չինաստանի բեմերում

- in Մշակույթ
Erazhshtutyun

Հայաստանի ազգային ֆիլհարմոնիկ նվագախումբը գեղարվեստական ղեկավար և գլխավոր դիրիժոր Էդուարդ Թոփչյանի ղեկավարությամբ հյուրախաղերով կմեկնի Չինաստան:

Նվագախմբի ելույթները ծրագրված են 2019 թվականի դեկտեմբերի 27-ից մինչև 2020-ի հունվարի 9-ը: Նվագախումբը տասը համերգով հանդես կգա Չինաստանի ինը քաղաքների համերգասրահներում:
«Սա բացառիկ շրջագայություն է իր ծավալներով, մշակութային և քաղաքական նշանակությամբ: Բոլորս գիտենք, որ մշակութային քաղաքականությունը հզոր զենք է յուրաքանչյուր պետության համար, հատկապես այնպիսի կոլեկտիվի միջոցով, որը բարձրակարգ է: Մասնագետներն են փաստում, որ Ֆիլհարմոնիկ նվագախումբը վերջին տարիներին բարձր կատարողական վարպետության է հասել, իսկ այս շրջագայությունը լուրջ մեկնարկ կարող է լինել նաև հայ-չինական հարաբերությունների զարգացման տեսանկյունից»,- դեկտեմբերի 23-ին լրագրողների հետ զրույցում ասաց ՀՀ կրթության, գիտության, մշակույթի և սպորտի նախարարի տեղակալ Արա Խզմալյանը:

Նրա խոսքով`հարյուր հազարավոր չինացիներ առաջին անգամ են լսելու «Հայաստան» բառը, և վստահ է, որ այն էմոցիոնալ ներգործությունը, որն ունենալու է նվագախումբը չինացիների վրա, չինացիներին թույլ կտա հետաքրքրվել Հայաստանով, ինչու չէ, նաև այցելել մեր երկիր:

Խզմալյանը հիշեցրեց, որ 2020 թվականին Հայաստանի մշակույթի օրեր են անցկացվելու Չինաստանում, և այս շրջագայությունը կարող է այդ օրերի փայլուն մեկնարկ լինել:

Փոխնախարարը հավելեց, որ պետությունը մեծ աջակցություն է ցուցաբերել շրջագայության կազմակերպման գործում: Նա նշեց, որ հրավիրող կողմն է նախաձեռնել այցը, ինչը մի քանի անգամ բարձրացնում է շրջագայության կարևորությունն ու միջազգային նշանակությունը. դա ձեռքբերում է:

«Ելույթներ ենք ունենալու Չինաստանի լավագույն դահլիճներում`Շանհայի Մեծ թատրոնից մինչև Պեկինի ազգային օպերայի թատրոն: Ծրագրում ընդգրկված են Խաչատրյանի «Դիմակահանդես»-ի, «Սպարտակ»-ի, Չայկովսկու «Շչելկունչիկ»-ի, Պրոկոֆևի «Ռոմեո և Ջուլիետ»-ի ու Ռիմսկի-Կորսակովի «Շեհերազադե»-ի համերգային կատարումները»,-ասաց նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը:

Նա ընդգծեց, որ ոչ բոլոր համերգներին են ներկայանալու մենակատարի հետ: «Երբ մենակատար է լինում, համերգը բավականին թեթևանում է նվագախմբի համար, քանի որ երկու բաժին ծանր ստեղծագործություններ նվագելը հեշտ չէ, բայց մյուս կողմից՝  նման պատիվ ամեն նվագախմբի չի տրվում»,-խոստովանեց դիրիժորը:

Հյուրախաղերը կազմակերպվել են Չինաստանի Armstrong International Music և Անգլիայի Wright Music Management գործակալությունների միջնորդությամբ և ՀՀ ԿԳՄՍ նախարարության աջակցությամբ:

Հայաստանի ազգային ֆիլհարմոնիկ նվագախումբը 2019 թվականի համերգային տարին ավարտեց համաշխարհային մեծության աստղ դաշնակահարուհի Խատիա Բունիաթիշվիլու հետ համատեղ համերգով, որը տեղի կունենա դեկտեմբերի 23-ին Արամ Խաչատրյան համերգասրահում:

«Բունիաթիշվիլին բացառիկ մենակատար է, որի հետ ներկայացնելու ենք Ռախմանինովի թիվ 2 դաշնամուրային կոնցերտը, իսկ համերգի երկրորդ բաժնում` Ռիմսկի-Կորսակովի «Շեհերեզադե» ստեղծագործությունը»,- դեկտեմբերի 23-ին լրագրողների հետ զրույցում տեղեկացրեց Ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը:
Նա նշեց, որ տարին իրենց համար շատ հետաքրքիր էր: «Երեք օպերային նախագիծ ենք իրականացրել: Կարծում եմ` «Օթելլո»-ն ցնցող էր, Երևանյան միջազգային երաժշտական փառատոնն էր տպավորիչ,  հիանալի էր «Երևանյան հեռանկարներ» միջազգային երաժշտական փառատոնի շրջանակում համագործակցությունը տարբեր մենակատարների հետ:  Գլխավոր ձեռքբերումներից մեկն այն է, որ բոլոր համերգներին լավ հանդես եկանք: Ելույթներ ունեցանք այնպիսի դիրիժորների հետ, ինչպիսիք են Անդրեյ Բորեյկոն և այլք»,-շեշտեց գեղարվեստական ղեկավարն ու գլխավոր դիրիժորը: Թոփչյանի խոսքով`իր կարևորագույն նպատակը նվագախմբի մակարդակը բարձր պահելն է: «Ամեն օր այս մտքով գալիս եմ փորձի և այդ մտքով հեռանում: Մեր նվագախումբ շատ լավ է նվագում, և դա մեծագույն ձեռքբերում է»,- եզրափակեց Էդուարդ Թոփչյանը:
Հավանեցիք, տարածեք սոցցանցերում ...