Իմ քայլը ներկայացրել է Հրայր Թովմասյանի և ՍԴ դատավորների պաշտոնավարումը դադարեցնելու նախագիծը

- in Հրապարակ

Ազգային ժողովի կայքում հրապարակվել է ՀՀ Սահմանադրությունում փոփոխություն կատարելու մասին նախագիծը, որը ներկայացրել են ԱԺ Իմ քայլը խմբակցության պատգամավորները:

Նախագծում առաջարկվում է փոփոխել 213-րդ հոդվածը: Հոդվածի տեքստը ներկայում հետևյալն է՝ «Մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահը և անդամները շարունակում են պաշտոնավարել մինչև իրենց լիազորությունների՝ 2005 թվականի փոփոխություններով Սահմանադրությամբ սահմանված ժամկետի ավարտը: Սահմանադրության 7-րդ գլխի ուժի մեջ մտնելուց հետո Սահմանադրական դատարանի դատավորների թափուր տեղերի համար առաջադրումները կատարում են հաջորդաբար Հանրապետության նախագահը, դատավորների ընդհանուր ժողովը և Կառավարությունը»:

Իմ քայլի պատգամավորներն առաջարկում են շարադրել հետևյալ կերպ՝

Մինչեւ Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի եւ անդամների պաշտոնավարումը դադարում է:

Սահմանադրական դատարանի դատավորների թափուր տեղերի համար առաջադրումները կատարում են հաջորդաբար Կառավարությունը, Հանրապետության նախագահը եւ դատավորների ընդհանուր ժողովը: Սույն փոփոխություններով հոդվածի 1-ին մասի հիման վրա առաջացած թափուր տեղերը համալրելու ընթացակարգը եւ ժամկետները սահմանվում են «Սահմանադրական դատարանի մասին» սահմանադրական օրենքով նախատեսված հատուկ ընթացակարգով, որոնք պետք է ընդունվեն եւ ուժի մեջ մտնեն մինչեւ 2020 թվականի ապրիլի 1-ը:»:

Սահմանադրության սույն փոփոխությունը ուժի մեջ է մտնում պաշտոնական հրապարակմանը հաջորդող օրվանից:

Հավանեցիք, տարածեք սոցցանցերում ...

Facebook Comments