2008-ին Հայաստանում իշխանություն չի եղել, Ռոբերտ Քոչարյանն էլ գտնվել է անօգնական մեկի կարգավիճակո՞ւմ

- in Ով ով է ...

Այսօր Երևանում տեղի ունեցած «Մարտի 1-ի գործը հետհեղափոխական Հայաստանում» տեղեկատվական կոնֆերանսի ժամանակ Ռոբերտ Քոչարյանի պաշտպանական թիմը ջանք ու եռանդ չի խնայել երկրորդ նախագահին հնարավորինս «անմեղացնելու» համար։

Ընդ որում՝ պաշտպանական թիմն օգտագործել է քարոզչական նյութեր՝ փորձելով հանրային կարծիք ձևավորել, թե Քոչարյանը Մարտի 1-ի հիմնական «տուժողն» է, իսկ տասնյակ հազարավոր ցուցարները ներկայացվել են «զինված մարդկանց» կարգավիճակում։

Միանգամից աչքի է զարնում այն հանգամանքը, որ պրոֆեսիոնալ իրավաբանները՝ կարծես, սպառված համարելով իրավական զինանոցը, իրենց մարտավարությունը կառուցում են ագրեսիվ հակաքարոզչության վրա։ Այլ խոսքով՝ ոչ այնքան պաշտպանվում է Քոչարյանը, որոքան «մերկացվում» են գորոծղ իշխանությունները կամ այն մարդիկ, ովքեր ակտիվ դերակատար են եղել 2008-ի ընդդիմադիր հարթակում։

Այնպիսի տպավորություն է ստեղծվում, որ 2008-ին Հայաստանում իշխանություն չի եղել, Ռոբերտ Քոչարյանն էլ գտնվել է անօգնական մեկի կարգավիճակում։ Սա իրադարձությունների մտացածին, շինծու մատուցման փորձ է ու տրամագծորեն հակադրվում է հենց Քոչարյանի ստեղծած երբեմնի կերպարին, որը ներկայանում էր «միակ տաղմարդու» իմիջով։

Իրականում իրադարձությունների ընթացքը հուշում է, որ Քոչարյանի գործերը, մեղմ ասած, լավ չեն ու նրան այլ բան չի մնում, քան՝ ագրեսիվ հակաքարոզչությունը։ Բանն այն է, որ շուտով մեկնարկելու է Քոչարյանի հետ անմիջականորեն կապված մեկ այլ դատավարություն, որն այն մասին է, թե ինչպես է երկրորդ նախագահի թիմը փորձում ուղղորդել Մարտի 1-ի գործով քննության ընթացքը։

ՀՔԾ-ն երեկ պաշտոնապես ծանուցել է, որ Վարուժան Մկրտչյանի և Արմեն Թավադյանի վերաբերյալ քրեական գործով նախաքննությունն ավարտվել է։ Ըստ հաղորդագրության, ՀՔԾ-ում քննվող քրեական գործի նախաքննության ընթացքում ձեռք բերված բավարար ապացույցների համակցությամբ հիմնավորվել է, որ Ռոբերտ Քոչարյանի մտերիմ Արմեն Թավադյանը «Մարտի 1»-ի քրեական գործով, ինչպես նաև այդ գործից Քոչարյանի և մյուսների վերաբերյալ անջատված և Երևանի ընդհանուր իրավասության դատարանում քննվող գործով արդարադատության իրականացմանը, դատական համակարգի նորմալ գործունեության ապահովմանն ու գործով ճշմարտության բացահայտմանը խոչընդոտելու դիտավորությամբ նախորդ ամռանը Վարուժան Մկրտչյանի և Քոչարյանի այլ աջակիցների հետ ստեղծել է կազմակերպված խումբ։

«․․․Կազմակերպված խմբի անդամ Վարուժան Մկրտչյանը, խմբի մյուս անդամների, այդ թվում` Արմեն Թավադյանի համաձայնությամբ և գիտությամբ, 2019 թվականի սեպտեմբերին Երևան քաղաքում գործող իր աշխատասենյակ է հրավիրել Ռոբերտ Քոչարյանի և մյուսների վերաբերյալ քրեական գործով տուժողին, վերջինիս առաջարկել 5 միլիոն ՀՀ դրամ կաշառք՝ նշված քրեական գործով տուժողի կարգավիճակից ու տված ցուցմունքներից հրաժարվելու և Ռոբերտ Քոչարյանի օգտին սուտ ցուցմունք տալու դիմաց», – հայտնում են ՀՔԾ-ից:

Հեռու ենք այն մտքից, որ Արմեն Թավադյանն այս դեպքում ավտոնոմ գործունեություն է ծավալել, մանավանդ, որ դե յուրե նրան պատկանող հեռուստաընկերությունն ակտիվորեն գործում է Քոչարյանի գծի մեջ, իսկ Թավադյանն էլ՝ մինչև ազատազրկվելը, համակարգել է երկրորդ նախագահին սատարող տարբեր մարդկաց ու խմբերի գործունեությունը, ինչի մասին անգամ հրապարակումներ եղան։

Սպասվելիք դատավարությունն ինքնին հետաքրքություն ներկայացնում է, սակայն՝ ավելի գոլոբալ հարթության վրա։ Այն գալու է անուղղակիորեն հաստատելու այն հանգամանքը, որ Ռոբերտ Քոչարյանն՝ ազատության մեջ լինելու պարագայում, կարող է էապես խոչընդոտել քննության ընթացքը։ Եթե նրա փոքրաթիվ աջակիցները հիմա են աչքի ընկնում նման «ինքնագործունեությամբ», ապա կարելի է ենթադրել, թե նրա ազատության պարագայում նախաքննության վրա ազդեցության ինչպիսի դրվագների կարող ենք հանդիպել։

Հավանեցիք, տարածեք սոցցանցերում ...

Facebook Comments