COVID-19-ի տարածման արագությունը նվազեցնելու համար յուրաքանչյուր քաղաքացու պատասխանատվության դերի մասին խոսվել է համավարակի առաջին իսկ օրերից:

Կանխարգելիչ նորմերի պահպանումը սկզբում գրեթե լիովին թողնված էր քաղաքացիների անձնական պատասխանատվության հույսին: Եթե լրագրողները հենց առաջին օրերին արձանագրեցին, որ մեծամասամբ նոր հիվանդության վտանգի մեծությունը չի ընկալվել, եւ քաղաքացիների համար նորմերը պահպանելու անհրաժեշտությունն առանձնապես զգալի չէ, ապա իշխանությունն այդ արձանագրեց միայն շաբաթներ անց, երբ մեկ օրում վարակման թվերը շեշտակի աճեցին: Հանրության մեջ նաեւ տպավորություն կար, որ կառավարության անդամներն էլ դիմակների ու սոցիալական հեռավորության՝ իրենց հաստատած նորմերն առանձնապես չեն կարեւորում:

Կառավարության անդամներն առաջին անգամ նիստին դիմակներով մասնակցեցին միայն մայիսի 21-ին: Այս նիստի ժամանակ Առողջապահության նախարար Արսեն Թորոսյանը նշեց, որ չի բացառվում մեզ մոտ իտալական կամ իսպանական սցենարների կրկնությունը, իսկ վարչապետ Նիկոլ Փաշինյանը հայտարարեց. «Կորոնավիրուսի համավարակի հետ կապված մեր գործերը լավ չեն»: Այս արտահայտությունը հետագա օրերին հնչեց ավելի ու ավելի հաճախ։

Ոստիկանությանը հանձնարարվեց խստիվ հետեւել փողոցում սահմանված կանոնների պահպանմանը, տեսչական մարմինները անակնկալ ստուգայցերով շարունակեցին շրջել մանկապարտեզներում, առեւտրի կենտրոններում ու տնտեսական գործունեություն իրականացնող կազմակերպություններում: Այնուամենայնիվ, սահմանված նորմերի պահպանման վերահսկողությունը, մեղմ ասած, չհանգեցրեց նորմերի համատարած պահպանմանը: Եվ վարչապետը կրկին ու կրկին կոչով դիմեց հանրությանը՝ ընդգծելով անձնական պատասխանատվության խնդիրը, բացատրելով, որ հնարավոր չէ ամեն քաղաքացու վերահսկել մի ոստիկանով, մի անվտանգության գործակալով:

Վարակի մասին ապատեղեկատվություն տարածողներին ի պատասխան՝ նա հիշեցրեց, որ մենք միակ երկիրն ենք, ուր վարակի ցավալի հետեւանքների մասին կասկած չպիտի լիներ, քանի որ, ցավոք, կորոնավիրուսից մահացածների տվյալների արտահոսք է տեղի ունեցել. ըստ այդմ, ամեն ոք կարող է համոզված լինել, որ մահացածների՝ օդից վերցված որսացած թվեր չեն հրապարակվում. ամեն մեկ թվի տակ մի մարդկային ընդհատված-ավարտված կյանք է:

Դիմակների դեմ պայքարի ելած, մերձավորների հետ մերձավորագույն շփումներից հետ չկանգնող հանրությունը, սակայն, ծարավ էր առավելագույնս շոշափելի ապացույցների: Այս ոլորտում որոշվեց կատարել եւս մի քայլ՝ նշել մեր երկրի որոշակի գյուղեր, քաղաքներ, փողոցներ ու թաղամասեր, ուր վերջին օրերին տիրապետող է դարձել վարակը:

Երկու օր առաջ վարչապետն ասաց, որ մեկ հասցում կրկնվող դեպքերի առկայությունը վկայում է, որ օջախները բակերում են: Նա ընդգծեց, որ գուցեեւ որոշվի հրապարակել վարակի աղբյուր՝ բակերի հասցեները:

Իսկ երեկ Առողջապահության նախարարը վերջնականապես հայտարարեց, որ այդ հրապարակումները կլինեն: «Վիրուսի ցանցային տարածումը (մենք հիմա համաճարակի հենց այդպիսի փուլում ենք գտնվում) ենթադրում է նաեւ ցանցային պայքար: Այսուհետ ես օրական մի քանի անգամ հրապարակելու եմ վարակված անձանց հասցեի մասին տեղեկատվություն փողոցի կամ թաղամասի ճշտությամբ, որպեսզի մեր քաղաքացիները եւս մեկ անգամ մտածեն, ի վերջո, արժե արդյո՞ք առանց դիմակի շփվել հարեւանների հետ կամ գնալ որեւէ իրենց տանը մոտ տեղ, ինչպես նաեւ արժե արդյո՞ք առանց կենսական անհրաժեշտության իջնել բակ այս կամ այն զբաղմունքի համար»,- գրեց նա ֆեյսբուքի իր էջում:

Եվ այսպես, երեկվանից նա նշել է վարակի հետեւյալ օջախները.

«ԵՐԵՎԱՆ, ԱՎԱՆ, ԻՍԱՀԱԿՅԱՆ ԹՂՄ.

ԱՐՄԱՎԻՐ, ՎԱՂԱՐՇԱՊԱՏ, ՍՈՒՐԲ ՄՈՎՍԵՍ ԽՈՐԵՆԱՑԻ Փ.

ԵՐԵՎԱՆ, ՇԵՆԳԱՎԻԹ, Ն. ՇԵՆԳԱՎԻԹ 10 Փ.

ԱՐԱՐԱՏ ԱՅԳԱՎԱՆ Ս. ՀՈՎՀԱՆՆԻՍՅԱՆ Փ.

ՍՅՈՒՆԻՔ ԳՈՐԻՍ ՎԱՆՔԻ ՏԱՓ Փ.

ԼՈՌԻ ՍՏԵՓԱՆԱՎԱՆ ԵՐԻՏԱՍԱՐԴԱԿԱՆ Փ.

ԳԵՂԱՐՔՈՒՆԻՔ ՍԵՎԱՆ ՆԱԻՐՅԱՆ Փ.

ԿՈՏԱՅՔ ՋՐՎԵԺ 12 Փ.

ԱՐԱԳԱԾՈՏՆ, ԱՇՏԱՐԱԿ ԲԵԿՆԱԶԱՐՅԱՆ Փ.

Եվ ուրեմն, շարունակում ենք իրազեկման աշխատանքները…

Երեկ ինքս Նորք-Մարաշի փողոցներում տեսա տասնյակ առանց դիմակների մարդկանց ու ցավով պետք է արձանագրեմ, որ Նորք-Մարաշ համայնքում կովիդի դեպքերը շատ-շատ են: Տեղադրում եմ տարածման փողոցներից մեկը:

ԵՐԵՎԱՆ, ՆՈՐՔ-ՄԱՐԱՇ, ՆՈՐՔ 7 Փ»:

Իսկ վերջում նշենք, որ սիմվոլիզմի կանոնների համաձայն՝ գրավոր խոսքում ամբողջովին մեծատառերով խոսելը, ինչն այս դեպքում կիրառում է նախարարը, նշանակում է բարձր ճչալ, գոռալ: Գուցե նա հույս ունի, որ այսպես կդառնա լսելի:

Հիշեցնենք, որ կորոնավիրուսով առաջին վարակակիրը Հայաստանում գրանցվել է մարտի 1-ին: Այսօր՝ 3.5 ամիս անց, կորոնավիրուսային հիվանդությամբ հոսպիտալացված է ավելի քան 400 հիվանդ ծանր վիճակում, ավելի քան 100-ը՝ ծայրահեղ ծանր: