Բարձրագույն դատական խորհուրդն այսօր մերժեց Վերաքննիչ քրեական դատարանի դատավոր Ալեքսանդր Ազարյանին ենթարկել կարգապահական պատասխանատվության։ Միջնորդությունը, հիշեցնենք, ներկայացրել էր արդարադատության նախարար Ռուստամ Բադասյանը, որի համար հիմք էին հանդիսացել «5-րդ ալիք» հեռուստաընկերության սեփականատեր Արմեն Թավադյանի խափանման միջոցի գործով դատական նիստի ընթացքում դատավոր Ալեքսանդր Ազարյանի հնչեցրած խոսքերը։

«Հույս ունեի, որ չէիք իջնի ՀՔԾ պետի մակարդակին և չէիք քննադատի օրինական ուժի մեջ մտած դատական ակտը»,- դատական նիստի ժամանակ ասել էր Ազարյանը։ Արդարադատության նախարարն էլ գտել էր, որ դատավորի արտահայտությունն անհարգալից վերաբերմունք է ՀՔԾ պետ Սասուն Խաչատրյանի, ինչպես նաև ՀՔԾ աշխատակիցների նկատմամբ։

Ազարյանը՝ հակառակը, ԲԴԽ նախորդ նիստի ժամանակ հայտարարեց, որ ինքը Հատուկ քննչական ծառայության պետին չի վիրավորել, պարզապես «իրերը կոչել է իրենց անուններով»։ Նրա խոսքերով՝ ՀՔԾ պետը, լինելով իրավաբան, պաշտոնյա, կասկածի տակ է դրել և վիճարկել իր կայացրած և օրինական ուժի մեջ մտած դատական ակտերի օրինականությունը՝ կապված Մարտի 1-ի հետ։

Ուշագրավ է, որ որոշման տակ ստորագրել են միայն խորհրդի դատավոր անդամները՝ Մեսրոպ Մակյանը, Ռուբեն Վարդազարյանը, Սերգեյ Չիչոյանը և Անի Մխիթարյանը:

Բարձրագույն դատական խորհրդի անդամ Հայկ Հովհաննիսյանը ասաց, որ ԲԴԽ որոշման տակ ստորագրել են միայն այն անդամները, որոնք դեմ են քվեարկել միջնորդության բավարարմանը, դա Դատական օրենքի կարգավորումն է։ Սակայն նախարարի միջնորդությունը բավարարելուն կողմ են քվեարկել խորհրդի բոլոր 5 գիտնական-անդամները։ «Իսկ որպեսզի նախարարի միջնորդությունը բավարարվի, անհրաժեշտ էր ԲԴԽ անդամների ձայների 2/3-ը, մեր դեպքում 9-ից 7 ձայն։ Հետևաբար՝ որոշումը համարվեց չընդունված։ Քվեարկությամբ յուրաքանչյուր անդամ դրսևորել է իր դիրքորոշումը, ավելին ասել պարկեշտ չեմ համարում»,- ասաց Հովհաննիսյանը։

Մեր դիտարկմանը՝ ինչպես է գնահատում այն փաստը, որ դատավոր Ազարյանի վերաբերյալ հարցի քննության ժամանակ է հենց նման պատկեր արձանագրվում, երբ ԲԴԽ դատավոր անդամները դեմ արտահայտվեցին դատավորին կարգապահական պատասխանատվության ենթարկել, իսկ իրավաբան-գիտնական անդամները՝ կողմ։ Սա չի՞ նշանակում, որ որոշակի կողմնակալ վերաբերմունք ամեն դեպքում առկա է և այս դեպքում դեր է խաղացել, Հովհաննիսյանը պատասխանեց, որ իրավունք չունի մեկնաբանելու մեր այս հարցը։ «Մենք խորքային խնդիրները շրջանցում ենք, ինձ համար կոնկրետ գործերն ընդամենը հետևանքային ախտանիշեր են, թե համակարգային առումով ինչ պետք է շտկել, փոխել, կատարելագործել։ Եվ մինչև մենք չիրականացնենք այնպիսի քայլեր, որոնք կհանգեցնեն համակարգային փոփոխությունների, մենք նույնիսկ մեկ քայլ առաջ չենք գնա դեպի մարդկանց երազած արդարադատությանը»,- ասաց Հովհաննիսյանը՝ ակամայից հիշելով Չարենցին՝ «Պատմության քառուղիներով մենք քայլել ենք երկար. անղեկ, ցաքուցրիվ, անգաղափար»։

Հիշեցնենք, որ Վերաքննիչ դատարանի դատավոր Ալեքսանդր Ազարյանը ՀՀ երկրորդ նախագահ Ռոբերտ Քոչարյանին կալանքից ազատած դատավորն է:

Ուշագրավ է, որ Ազարյանը խոսում է ՀՔԾ պետի մասին և ընդգծում, որ Սասուն Խաչատրյանը, լինելով իրավաբան, պաշտոնյա, կասկածի տակ է դրել և վիճարկել իր կայացրած և օրինական ուժի մեջ մտած դատական ակտերի օրինականությունը՝ կապված Մարտի 1-ի հետ։ Նկատենք, սակայն, որ Սասուն Խաչատրյանը միակը չէ, որը կասկածի տակ է դնում Ազարյանի կայացրած ու օրինական ուժի մեջ մտած դատական ակտը։

Անցած տարի հունվարի 26-ին ՀՀ գլխավոր դատախազությունը Վճռաբեկ դատարանից պահանջեց հռչակել Մարտի 1-ի իրադարձություններին մասնակցելու համար դատապարտված նախկին քաղբանտարկյալ Արամ Բարեղամյանի անմեղությունը: Արամ Բարեղամյանին 2008 թվականին գործող «պրակտիկայի» համաձայն, այսինքն՝ մեկ ոստիկանի ցուցմունքի հիման վրա 6 տարվա անազատության էր դատապարտել հենց Ալեքսանդր Ազարյանը։ Վերջինս չէր սպասել, որ անգամ փակվեն Բարեղամյանի՝ գլխին ուժեղ հարվածից ստացած պատռվածքի կարերը։ Ազարյանի դեպքից 7 օր անց Բարեղամյանին հիվանդանոցից կալանելու որոշում էր կայացրել։ Բարեղամյանը մեղավոր էր ճանաչվել իշխանության ներկայացուցչի նկատմամբ բռնություն գործադրելու և նրա առողջությանը ծանր մարմնական վնասվածք պատճառելու համար և դատապարտվել 6 տարվա ազատազրկման: Սակայն այս տարվա մայիսին Վճռաբեկ դատարանը բեկանեց ՀԱԿ վարչության անդամ Արամ Բարեղամյանի դատավճիռը՝ այն կրկին քննության ուղարկելով Առաջին ատյանի դատարան:

Դատավոր Ազարյանի իրականացրած արդարադատությունից տուժած Բարեղամյանն ապշած է, որ որոշ գործիչներ Ազարյանին համարում են լավ դատավոր, լավ իրավաբան: «Ազարյանը նախկին իշխանությունների բութ գործիքն էր և կա: Իրեն չի հետաքրքրում՝ հետևում մարդ կա, ընտանիք կա: Ոնց հրամայում են, տենց անում է, դրա լավը ո՞րն ա, դրա ուժեղ իրավաբանը ո՞րն ա»,- անցած տարի լրատվամիջոցներից մեկի հետ զրույցում ասել էր Բարեղամյանը։

Բացի Բարեղամյանի գործից, դատավոր Ալեքսանդր Ազարյանը Մարտի 1-ի գործով ևս 8 մեղադրական դատավճիռ է կայացրել, որոնք բոլորն էլ հերթով բեկանվում են Վճռաբեկ դատարանի կողմից, և այդ գործերով մեղադրյալները հերթով արդարացվում են։ Այդ անձանց գործերը նաև Մարդու իրավունքների եվրոպական դատարանում են։ ՄԻԵԴ-ում Արամ Բարեղամյանի գործը ևս ընթացքի մեջ է: Անկախ ներպետական ատյաններում գործի ընթացքից, գործը ՄԻԵԴ-ում շարունակվելու է և որոշում կայացվելու։ Վստահաբար, ՄԻԵԴ-ը ևս ճանաչելու է Բարեղամյանի խախտված իրավունքները։