Մոսկվայում հայերի և ադրբեջանցիների միջև տեղի ունեցած բախումների հետևանքով բերման են ենթարկվել ընդանուր առմամբ մոտ 1000 հայազգի քաղաքացի:

Նրանց մեծ մասին արձանագրություն կազմելուց հետո ազատ են արձակել, իսկ 15 մարդ ենթարկվել է տարբեր չափերի (1000-1500 ռուբլի) վարչական տուգանքի, մեկ մարդ կալանավորվել է 10-ը օրով, քանի որ ունեցել է վաղօրոք դատվածություն, իսկ 8 քաղաքացի դեռևս գտնվում են կալանքի տակ՝ երկու ամիս ժամկետով, մինչև նախաքննության ավարտը:

Այս մասին փոխանցեց Ռուսասատանի Հայերի Միության մոսկովյան գրասենյակի ղեկավար Շահեն Պետրոսյանը:

«Բերման ենթարկված քաղաքացիների մեծ մասը եղել են նրանք, ովքեր կազմել էին ավտոմեքենաների շարասյուն և շրջում էին քաղաքաում դրոշներով: Նրանց հրավիրել են ոստիկանություն չարտոնված ակցիա անցկացնելու համար և արձանագրություն կազմելուց հետո բաց են թողել: Այս պահին կալանքի տակ են գտնվում նրանք, ովքեր կասկածվում են ադրբեջանցիների ռոստորաններ ներխուժելու և խուլիգանական գործողություններ կատարելու համար: Նշվում է հիմնականում երկու ռեստորան՝ «Բակինսկի դվորիկ» և «Հազար ու մի գիշեր»»,-ասաց Շահեն Պետրոսյանը:

Կալանավորված քաղաքացիները ըստ այդմ մեղադրվում են ՌԴ քրեական օրենսգրքի 213 հոդվածի 2-րդ մասով՝ խուլիգանության, զենքի կամ այլ առարկաների գործադրմամբ հասարակական կարգը խախտելու համար:

Բոլոր հայազգի քաղաքացիների պաշտպանությամբ զբաղվում են Ռուսասատանի Հայերի Միության մոսկովյան գրասենյակին կից իրավաբանների ասոցացիայի և այլ հայկական իրավաբանական կազմակերպությունները՝ «АРМРОСС», «ОМЕГА Групп»:

Տեղի ունեցած դեպքերի առիթով այս պահին կան հայազգի երկու տուժող՝ BMW մակնիշի մեքենայի վարորդ Գարիկ Գրիգորյանը և Էրիկ Անանյանը: Նրանց նույնպես տրմադրվել է իրավաբան: Տուժողների գործով կան մեծ թվով բերման ենթարկված և կալանավորված ազգությամբ ադրբեջանցի քաղաքացիներ, որոնցից 7-ը մեղադրվում են կանխամտածված սպանության փորձ կատարելու համար:

Այս պահի դրությամբ «դեպորտի» ենթարկված հայազգի քաղաքացիներ չկան: