Putin

Ռուսաստանի Դաշնության նախագահ Վլադիմիր Պուտինի թեկնածությունն առաջադրվել է Խաղաղության Նոբելյան մրցանակին: Ռուս գրող Սերգեյ Կոմկովը հայտնել է, որ Խաղաղության Նոբելյան մրցանակին՝ Վլադիմիր Պուտինի թեկնածության առաջադրման հայտ է ներկայացրել, հայտնում է «Ռոսբալտ»-ը:

Ավելի ուշ, Պուտինի առաջադրմանը նվիրված մամուլի ասուլիսի ժամանակ կներկայացվեն Նոբելյան միջազգային կոմիտեին ուղղված պաշտոնական դիմումում շարադրված հիմքերը, ինչպես նաև «բոլոր ավանդական կրոնական դավանանքների պաշտոնական ներկայացուցիչների և Ռուսաստանի գիտության և մշակույթի ամենահայտնի գործիչների դիրքորոշումն այս հարցում»:

Նշվում է, որ Կոմկովի դիմումը Նոբելյան միջազգային կոմիտեն ստացել է սեպտեմբերի 10-ին:

Կոմկովը «Նախագահ» թերթի գլխավոր խմբագիրն է, ինչպես նաև Ռուսաստանը պառակտելու ծրագրի մասին վեպի հեղինակը:

Կասկած չկա, որ Կոմկովի նախաձեռնությունը առնվազն համաձայնեցված է Կրեմլի հետ: Իսկ Պուտինի ինչի՞ն է պետք Խաղաղության Նոբելյան մրցանակի ներկայացվելը: Եթե դա զուտ փառասիրություն է, ապա հազիվ թե ՌԴ նախագահը թույլ տար այդպիսի միամիտ դրսեւորում, նկատի ունենալով այն, որ բավական դժվար է իրատեսական գնահատել մրցանակ ստանալու Պուտինի շանսը: Հետեւաբար, կամ Պուտինը նախապես հոգացել է դրա իրատեսականության մասին՝ ինչ-ինչ ճանապարհներով, կամ գրողի միջոցով Նոբելյան Խաղաղության մրցանակի թեկնածության հայտը յուրօրինակ առաջարկ է Արեւմուտքին:

Այդ առաջարկը «հանկարծ» արվել է գրողի միջոցով, ինչպես օրինակ նախկին տեզերագնաց տիկնոջ միջոցով «հանկարծ» արվեց ՌԴ Սահմանադրության փոփոխության փաթեթի մեջ Պուտինի ժամկետը զրոյացնելու դրույթի ներառման առաջարկը, վերջին օրը, երբ Դուման ընդունում էր փաթեթը:

Այժմ, երբ Արեւմուտքի հետ Ռուսաստանի դիմակայությունը մտել է նոր, եւ թերեւս որակապես այլ շրջափուլ, ինչը պայմանավորված է նաեւ աշխարհակարգի վերափոխման աշխույժ փուլի ազդեցությամբ, «հանկարծ» ներկայացվում է Պուտինին Խաղաղության Նոբելյան մրցանակ շնորհելու հայտ:

Դա էլ իր հերթին տեղի է ունենում Ռուսաստանում իշխանության խնդրի հասունացման փուլում, երբ պետք է աստիճանաբար ստացվեն կարեւոր հարցերի պատասխաններ՝ Պուտինն օգտագործու՞մ է զրոյացման միջոցով ստացված գործիքը, թե՞ այդուհանդերձ կայացվում են այլ որոշումներ, մնու՞մ է՝ անընդհատ իջնող վարկանիշի պայմաններում, տնտեսական ու աշխարհքաղաքական բարդացող մարտահրավերների պայմաններում, թե՞ գնում, ինչպե՞ս է ապահովվում նրա անձնական անվտանգությունը նախագահի պաշտոնը թողնելու պարագայում:

Հարցերը շատ են եւ ակնառու է, որ բացի Արեւմուտքի հետ աշխարհքաղաքական եւ աշխարհտնտեսական դիմակայությունից, Պուտինի համար կարեւոր գիծ է նաեւ «այլընտրանքային» տարբերակների դիտարկումը եւ ըստ այդմ ընդհուպ հեռանալու հարցի օրակարգայնությունը՝ անվտանգության երաշխիքների առումով: Իսկ երաշխիքներ կարող են լինել միայն Արեւմուտքից, որովհետեւ մեծ հաշվով իր կենսական խնդիրները Մոսկվան ներկայում ի վիճակի չէ լուծել առանց արեւմտյան աջակցության:

Այդ իմաստով, Պուտինը «հանկարծ» օրակարգ է բերում նոր առաջարկ՝ պատրաստ է հեռանալ, եթե ստանա Խաղաղության Նոբելյան մրցանակ ու երաշխիքներ: Մրցանակակիրները հայտնի են դառնալու 2021 թվականի սեպտեմբերի 10-ին: ՌԴ նախագահը թերեւս օրակարգ է բերում առաջիկա տարվա համար քննարկումների նոր առարկա: Կընդունի՞ Արեւմուտքը, թե ոչ: Ի վերջո ինչ երաշխիք է տալու ինքը Պուտինը, որ կհեռանա մրցանակը ստանալուց հետո:

Spread the love
  •   
  •  
  •  
  •  
  •  
  •  
  •  
  •  
  •  
  •  
  •