• Mon. Mar 8th, 2021

Մինչ Կրեմլից հերքում են, Թուրքիան խոսում է Ղարաբաղում իր զինծառայողների պարեկության մասին

Byhttp://Mitk.am

Nov 24, 2020

Թուրքիան շարունակում է աշխատանքը Ղարաբաղում հրադադարի ռեժիմի վերահսկման մեխանիզմների ուղղությամբ, դիտակետերի միջեւ պարեկություն կիրականացվի, ասել է Թուրքիայի պաշտպանության նախարար Հուլուսի Աքարը:

«Հրադադարի ռեժիմի վերահսկման մեխանիզմների ուղղությամբ աշխատանքը շարունակվում է: Լեռնային Ղարաբաղում դիտակետերի միջեւ, որոնք պետք է կառուցվեն, պարեկություն կիրականացվի», ասել է Աքարը, տեղեկացնում է ՌԻԱ Նովոստին:

Թուրքիայի նախագահ Էրդողանը նոյեմբերի 11-ին հայտարարել էր, որ Անկարան եւ Մոսկվան հուշագիր են ստորագրել Ղարաբաղում հրադադարի ռեժիմի վերահսկման կենտրոնի վերաբերյալ, նրանք կմասնակցեն «համատեղ խաղաղապահ առաքելությանը»:

Հիշեցնենք, որ ավելի վաղ ՌԴ նախագահի մամուլի քարտուղար Դմիտրի Պեսկովը հայտարարել էր, որ Մոսկվան եւ Անկարան կաշխատեն Ղարաբաղի հարցով Ադրբեջանի տարածքում գտնվող մոնիտորինգային կենտրոնի միջոցով, «համատեղ խաղաղապահ ուժերի մասին խոսք չի եղել»: Նա հատուկ նշել էր, որ այդ կենտրոնը լինելու է «բուն Ադրբեջանի տարածքում»: Ընդ որում, ռուս-թուրքական այս հեռակա «վեճը» խաղաղապահների ու կենտրոնի տեղակայման շուրջ շարունակվում է նոյեմբերի 9-ից սկսած: Հարցերը դեռ չե՞ն կարգավորվել, թե Թուրքիան հասել է իր նպատակին, կամ վստահ է, որ հասնելու է դրան: