• Sun. Mar 7th, 2021

Սերժ Սարգսյանը հրաժարականով սարքե՞լ է Նիկոլ Փաշինյանի գլխին

Byhttp://Mitk.am

Nov 24, 2020

ԱԺ փոխնախագահ Լենա Նազարյանն Առավոտին տված հարցազրույցում նշում է, թե  հեղափոխությունից հետո իրենց «հող հանձնելու» համար մեղադրող «նախկինները» ուրեմն գիտեին, որ այդ ամենը կոտրվելու էր իրենց (հետհեղափոխական իշխանության) գլխին: Ըստ նրա, նախկինները ձգել են հարցը, հետաձգել պատերազմը:

Հարց է առաջանում, իսկ հետհեղափոխական իշխանությունը չգիտե՞ր, կամ չէ՞ր պատկերացնում այդ վտանգը: Լենա Նազարյանն այդ առնչությամբ ասում է. «Նիկոլ Փաշինյանը պատկերացնում էր: Վարչապետ ընտրվելուց հետո առաջին այցը Ստեփանակերտ էր: Ստեփանակերտի ասուլիսը նորից նայեք, խնդրում եմ: Վարչապետ Նիկոլ Փաշինյանն այնտեղ ասում է, որ մենք պետք է ավելացնենք Արցախի եւ Հայաստանի անվտանգությունը: Այսինքն, իր համար պարզ էր, որ կա՛մ մենք հանձնում ենք այդ 7 շրջանները, կա՛մ պատրաստվում ենք պատերազմի: Եվ վարչապետն անկեղծորեն ինքը չի հավատացել, որ 7 շրջանների հանձնումը առանց Լեռնային Ղարաբաղի կարգավիճակի հստակեցման, արդար ու շահեկան է մեզ համար»:

Ստացվում է, որ ՀՀ երրորդ նախագահ Սերժ Սարգսյանը լավ հասկանալով, որ հայ ժողովուրդը դեմ է իրեն՝ հրահրել է հեղափոխություն, որպեսզի իշխանությունը փոխանցի ղարաբաղյան կլանից դուրս որևէ մեկին, ով էլ կբախվի և բախվեց այսօրվա իրավիճակին:

Բանն այն է, որ այս պատերազմը կամ առանց պատերազմի Արցախի 7 շրջանների հանձնումը ԵԱՀԿ Մինսկի խմբի համանախագահների շրջանակներում նախապատրաստվել է Ռոբերտ Քոչարյանի ու Սերժ Սարգյանի կողմից՝ հասկանալով, որ իրենք չեն կարող գնալ այդպիսի քայլի, իսկ իրենց վարկանիշն այնպիսին է, որ մարտնչելով էլ խնդրին չկա լուծում, շախմատա-քաղաքական հերթական պարտյայում զինվորով թագուհի են դուրս եկել՝ ի դեմս Նիկոլ Փաշինյանի ու, գուցե Ալիևի հետ պայմանավորվածությամբ, ու ոչ միայն նրա, այլև Պուտինի ու Էրդողանի, վերջնականապես լուծել են Լեռնային Ղարաբաղի հիմնախնդիրը:

Ահա, թե ինչու էին անընդմեջ շրջանառության մեջ դրել, թե Նիկոլ Փաշինյանը կծախի Արցախը, որովհեև գիտեին, որ հասունացրել են նոյեմբերի 9-ին ստորագրված հայտարարությունը: Թերևս այն գրվել է դեռևս 2018-ի հեղափոխությունից առաջ էլ …

Հիմա էլ այդ ուժերը 16 կուսակցություններին հրապարակ նետելով փորձում են վերադառնալ ու իրենց ավերակածը թագավորե՞լ: Ով ով, բայց հայ ժողովուրդը մանկուրտ չէ և՝ գիտակցում է, որ ոչ մի դեպքում չի կարելի թույլ տալ սկզբում Ռոբերտ Քոչարյանի, ապա Սերժ Սարգսյանի քաղաքական կարուսելի գործակցությանը: