• Fri. Apr 23rd, 2021

Human Rights Watch-ը` Ադրբեջանի կողմից Լեռնային Ղարաբաղում իրականացված անօրինական գրոհների մասին

Լեռնային Ղարաբաղում վեցշաբաթյա զինված հակամարտության ընթացքում ադրբեջանական ուժերի կողմից բժշկական հաստատությունների վրա կատարված անօրինական հարձակումների մասին տեղեկություններ ու փաստեր է ստացել Human Rights Watch մարդու իրավունքների պաշտպան կազմակերպությունը:

Կազմակերպության զեկույցի համաձայն, բազմակի անգամ հարվածներ է հասցվել Մարտակերտի հանրային հիվանդանոցին, ինչպես նաեւ քաղաքի արվարձաններից մեկում գտնվող զինվորական հոսպիտալին:

Այն փաստը, որ Ադրբեջանն այդ հարձակումների ընթացքում կիրառել է իսրայելյան արտադրության LAR-160 մակնիշի արբանյակային կառավարման հրանոթային համակարգ, խոսում է այն մասին, որ հիվանդանոցները նշանառության տակ են հայնտվել դիտավորյալ կերպով: Ըստ Ռոյթըրզից ստացված հաղորդագրությունների, երկու գրոհների արդյունքում հիվանդանոցները կրել են վնասներ: Բարեբախտաբար չեն եղել զոհեր կամ վիրավորներ:

Տեղում կատարված հետաքննոթյան ու վերլուծությունների, ինչպես նաեւ արբանյակային լուսանկարների հիման վրա Human Rights Watch-ը եկել է այն եզրակացության, որ զինվորական հաստատությունները քաղաքում եւ հիվանդանոցների մոտ տեղակայելով, Լեռնային Ղարաբաղի ու Հայաստանի իշխանությունները վտանգի տակ են դրել քաղաքացիական անձանց:

Կազմակերպությունը գրանցել է նաեւ սեպտեմբերի 28-ին ադրբեջանական ուժերի կողմից հայկական շտապ օգնության ավտոմեքենայի դեմ կատարված դիտավորյալ հարձակումը, որի արդյունքում զոհվել է ռազմական մի բժիշկ: Ըստ Հայաստանի իշխանությունների, բժշկական առնվազն ինը հաստատություն է վնասվել Ստեփանակերտում, Մարտակերտում ու Ասքերանում:

Ըստ նույն զեկույցի, ադրբեջանական հրետանին հարվածել է նաեւ Աղաբեկալանջի զինվորական հոսպիտալը, որը նույնպես իրականացվել է որպես դիտավորյալ կերպով ընտրված թիրախ: Այստեղ եւս, ինչպես զենքի բեկորներն են ապացուցում, դրանք արձակվել են արբանյակային կառավարման համակարգերով: Ինչպես Ստոքհոլմի խաղաղության հետազոտությունների միջազգային հաստատությունն է հայտնում, դրանք իրականացվել են իսրայելյան արտադրության LAR-160 համակարգերով, որոնք կիրառել են EXTRA մակնիշի հրթիռներ: Այդ համակարգերը, ըստ նշված հաստատության, Ադրբեջան են տեղափոխվել 2005-2006 թվականների ընթացքում: Դրանք ունեն մինչեւ տասը մետրի ճշգրտություն:

Human Rights Watch կազմակերպությունն արձանագրել է ադրբեջանական ուժերի կողմից նաեւ մի շարք այլ հատվածներում իրականացված գրոհներ, որոնց ժամանակ նպատակային կերպով ընտրվել են քաղաքացիական թիրախներ եւ բժշկական հաստատություններ: LAR-160 տիպի հրթիռների կողմից արձակված նաեւ կասեթային ռումբեր են կիրառվել ընդդեմ Լեռնային Ղարաբաղի, ասված է զեկույցում, որտեղ նշվում է միջազգային պայմանագրով դրանց կիրառումն արգելված լինելու հանգամանքը: Ինչպես զեկույցում է ասված, նման ռումբերը, ընկնելով, հաճախ չեն պայթում եւ փաստորեն վերածվում են ականների, որոնք կարող են պայթել պատերազմից հետո: