19/10/2021

News and Analitics

Մահացել է Անահիտ Թոփչյանը

Այսօր՝2021 թվականի սեպտեմբերի 20-ին, Երևանում մահացել է հայ հայտնի դերասանուհի,նաև արձակագիր, թարգմանիչ, բացառիկ հմայքով մտավորական, ՀՀ վաստակավոր արտիստուհի Անահիտ Թոփչյանը (օրիորդական ազգանունը՝ Մկրտչյան) ամուսնու՝գրաքննադատ, արձակագիր, հրապարակախոս Ալեքսանդր Թոփչյանի մահվանից օրեր անց։

Անահիտ Թոփչյանը ծնվել է 1947 թ․ օգոստոսի 21-ին Արթիկում, 1998 թվականից ՀՀ գրողների միության անդամ է։ 1967–1991 թվականներին աշխատել է Երևանի Հ. Ղափլանյանի անվան դրամատիկական թատրոնում։ Խաղացել է ավելի քան 100 դեր կինոյում, հեռուստաթատրոնում, ռադիոթատրոնում և թատրոնում։ 1990 թ. հիմնադրել է հեղինակային թատրոն, որի շրջանակներում հյուրախաղերով շրջագայել է բազմաթիվ երկրներում (Ֆրանսիա, ԱՄՆ, Շվեյցարիա, Գերմանիա, Կանադա, Լիբանան, Սիրիա, Կիպրոս)` լինելով թատերական բեմադրիչ, տեքստի հեղինակ, դերասան և գեղարվեստական ղեկավար։

1990 թվականից տպագրվել է հայ և արտասահմանյան մամուլում՝ հանդես գալով հրապարակախոսական, արվեստաբանական հոդվածներով և գեղարվեստական արձակով։Նա ընտիր տիրապետում էր ֆրանսերենին և ունի բազմաթիվ հաջողվա թարգմանություններ ֆրանսիական գրականության ընտիր նմուշներից։ Նրա պատմվածքները ևս թարգմանվել են ֆրանսերեն, իսպաներեն, գերմաներեն, անգլերեն, ռումիներեն, հունարեն, վրացերեն։ Հեղինակել է «Lady S.D.F.», «Հայելի», «Մենախոսություն գժանոցից», «Անհասցե տիկինը» ժողովածուները, «Անհետացում», «Տագնապ» վեպերը։ 2012 թվականին նրա «Մարաթոն» պատմվածքը բեմադրվել է Փարիզի Դ. Միյոյի անվան թատրոնում։