18/10/2021

News and Analitics

Մինսկում կայացել է Միրզոյանի, Բայրամովի և Լավրովի հանդիպումը

Բելառուսի մայրաքաղաք Մինսկում հոկտեմբերի 14-ին ռուսական կողմի նախաձեռնությամբ տեղի է ունեցել Հայաստանի, Ռուսաստանի ու Ադրբեջանի ԱԳ նախարարների հանդիպումը։

Ինչպես տեղեկացրին ՀՀ արտաքին գործերի նախարարությունից, ԱԳՆ ղեկավարները քննարկել են Լեռնային Ղարաբաղի հակամարտությանն առնչվող խնդիրներ, այդ թվում՝ 2020թ․ նոյեմբերի 9-ի եռակողմ հայտարարության իրականացման ընթացքը։

«ՀՀ ԱԳ նախարար Արարատ Միրզոյանը բարձր է գնահատել Ռուսաստանի միջնորդական ջանքերը՝ միտված կրակի դադարեցմանը, և արցախահայության անվտանգության ապահովման համատեքստում կարևորել է ՌԴ խաղաղապահների ներկայությունը Լեռնային Ղարաբաղում։

Միաժամանակ, նախարար Միրզոյանը կողմերի ուշադրությունն է հրավիրել այն հանգամանքին, որ նոյեմբերի 9-ի հայտարարության որոշ դրույթներ դեռևս իրականացված չեն, և այս համատեքստում ընդգծել է հայ ռազմագերիների և այլ պահվող անձանց շուտափույթ ու անվերապահ հայրենադարձման անհրաժեշտությունը»,- ասվում է հաղորդագրության մեջ։

ՀՀ ԱԳՆ-ից տեղեկացնում են, որ, անդրադառնալով Նյու Յորքում ԵԱՀԿ Մինսկի խմբի համանախագահների միջնորդությամբ և մասնակցությամբ տեղի ունեցած հանդիպմանը՝ նախարար Միրզոյանը ևս մեկ անգամ վերահաստատել է, որ Լեռնային Ղարաբաղի հակամարտության համապարփակ և տևական կարգավորումը պետք է իրականացվի ԵԱՀԿ Մինսկի խմբի համանախագահության ձևաչափի և այդ ձևաչափին տրված միջազգային մանդատի շրջանակներում՝ կողմերին հայտնի սկզբունքների ու տարրերի հիման վրա։

ՌԴ-ի արտաքին գործերի նախարարության ղեկավար Սերգեյ Լավրովը Մինսկում հանդիպում կանցկացնի հայաստանցի պաշտոնակից Արարատ Միրզոյանի հետ:

«Վերջերս ձեզ հետ մանրամասն շփվել ենք Մոսկվայում, բայց այսօր կարելի է քննարկել թե՛ երկկողմ բնույթի, թե՛, անշուշտ, տարածաշրջանի ինչ-որ լրացուցիչ հարցեր: Ղարաբաղը միշտ պետք է արժանանա մեր ուշադրությանը»,- ասել է Ռուսաստանի նախարարը հանդիպման սկզբին:

Ինչպես սպասվում է, ավելի ուշ Մինսկում ՌԴ-ի, Ադրբեջանի եւՀայաստանի արտգործնախարարությունների ղեկավարները կանցկացնեն եռակողմ հանդիպում, հաղորդել է ՏԱՍՍ-ը: