Վեդիի ջրատարում զոհված տղաներից մեկի քույրը երեկ է ծնվել

Վեդիի ջրատարում տեղի ունեցած ողբերգական վթարից զոհված պատանիներից մեկի՝ Սպարտակի քույրը երեկ է ծնվել։ 

Տղաները Արարատի մարզի Նոր Կյանք գյուղից էին։ Գյուղից պատմեցին, որ զոհված տղաները երեքն էլ օրինակելի երեխաներ են եղել և տեղի ունեցածն իրենց համար համակերպվելու չէ։

Օգոստոսի 27-ին, ժամը 14։03-ին Արարատի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Նոր ուղի գյուղի վերջնամասում տեղի է ունեցել ՃՏՊ՝ ավտոմեքենան հայտնվել է ջրատարում։ Պարզվել է, որ Վեդի-Նոր ուղի ավտոճանապարհի 9-րդ կմ աջակողմյան հատվածում «Mercedes-Benz» մակնիշի ավտոմեքենան (վարորդ՝ Ս․ Շ․, ծնված 2008 թ.) դուրս է եկել ճանապարհի երթևեկելի հատվածից և գլխիվայր հայտնվել ջրանցքում: Փրկարարները քարշակման միջոցով կողաշրջել են ավտոմեքենան, դուրս բերել վարորդի և ուղևորներից մեկի (Վ․ Ս․, ծնված 2010 թ.) դիերը, ամբարձիչի միջոցով ջրանցքից դուրս բերել ավտոմեքենան և մյուս ուղևորի (Է․ Ղ․, ծնված 2008 թ.) դին, հոսանքազրկել ավտոմեքենան և մոտեցրել ավտոքարշակին։

Նոր Կյանքի վարչական շրջանի ղեկավար Արամ Արտաշյանն էլ ավելի վաղ փոխանցել էր, որ Էրիկի, Վիտալիի, Սպարտակի հոգեհանգիստը վաղն է լինելու Նոր Կյանքի վարչական շենքում։