Մոսկվայում բերման է ենթարկվել Միհրան Պողոսյանը, նա մոտ ապագայում արտահանձնվելու է

Մոսկվայում բերման է ենթարկվել Հայաստանի դատական ակտերի Հարկադիր կատարման ծառայության նախկին պետ, գեներալ-մայոր Միհրան Պողոսյանը։

Այս մասին հայտնում է Mash «Տելեգրամ» ալիքը՝ հիշեցնելով, որ Հայաստանում նա հետախուզվում է ինը քրեական հոդվածներով հանցագործությունների համար:

Ալիքի տվյալներով՝ պաշտոնյային երեկ կեսօրին Տվերսկայա փողոցում կանգնեցրել են ճանապարհային ոստիկանության աշխատակիցները։ Նա իր հետ ունեցել է փախստականի վկայական։

Պողոսյանին բերման ենթարկելու մասին արդեն տեղեկացրել են Հայաստանի ոստիկանության կենտրոնական գրասենյակ, նշվում է, որ նա մոտ ապագայում արտահանձնվելու է Ռուսաստանի Դաշնությունից։ Միաժամանակ, ռուսական կողմը նախկինում մերժել էր Պողոսյանին Հայաստանին արտահանձնելու խնդրանքը։

Ռուսաստանում Պողոսյանը զբաղվում է ապրանքների մեծածախ առևտրով, բեռնափոխադրումներով, մեքենաների վարձույթով և լիզինգով։

Հայաստանում, ի թիվս այլ հարցերի, Պողոսյանը մեղադրվում է ապօրինի ձեռնարկատիրության արդյունքում 1,3 մլն դոլարի հարկերից խուսափելու համար։ Իսկ մայիսի 17-ին հանրապետությունում առգրավվել է 250 մլն եվրո արժողությամբ մեկ տոննա կոկաին, որը բերել էր էկվադորյան մրգեր ներկրող ընկերությունը: Բանանի ներմուծմամբ զբաղվող ընկերությունը պատկանում է Պողոսյանին։

Հայաստանի իրավապահներից այս առնչությամբ դեռ մեկնաբանություն ստանալ չի հաջողվել: