Պայթյունի հետևանքով ծայրահեղ ծանր վիճակում գտնվողների մեջքն ու վերջույթները գրեթե ամբողջությամբ այրված են․ մանրամասներ

Գազալցակայանի պայթյունի հետևանքով վերակենդանացման բաժանմունքում գտնվող երկու տուժածի կյանքի համար բժիշկները պայքարում են։

Այս մասին լրագրողների հետ զրույցում հայտնել է ՀՀ ԱՆ «Այրվածքաբանության և մաշկաբանության ազգային կենտրոն» ՓԲԸ–ի տնօրեն Հովհաննես Հովհաննիսյանը։

Ըստ նրա՝ տուժածներն ունեն մարմնի մակերեսի 60 տոկոսի այրվածք, այդ թվում՝ թոքային հյուսվածքի վնասում․ «Նրանք ունեն 3-4-րդ աստիճանի այրվածքների խորություն: Նրանց վիճակը ծայրահեղ ծանր է, կյանքի պայքար է գնում հիմա: Ծանր վիճակում գտնվողները շոկային վիճակում են, դրա համար մենք միջամտում ենք, որ անջատենք իրենց գիտակցությունը, որ ցավային ռեակցիան շատ արտահայտված չլինի»։

Մյուս 4 տուժածների վիճակը, ըստ բժշկի, գնահատվում է միջին ծանրության, կայուն:

«Նրանք գտնվում են բաժանմունքում, վիրակապություններ և համապատասխան բուժում են ստանում: Նրանց մոտ այրվածքի մակերեսը 20-25 տոկոս է՝ մոտավորապես 2-րդ աստիճանի խորությամբ: Այս պացիենտները ոտքի վրա են, գիտակցությունը տեղն է, իրենք իրենց սպասարկում են: Հիմա որոշակի միջամտություններ ենք կատարում, որից հետո հարազատներին թույլ կտանք մոտենալ»,- ասել է նա:

Հարցին՝ ո՞ր հատվածներում են այրվածքներ ստացել, վերջինիս նշել է՝ դա կախված է նրանից, թե բոցի պահին տուժածները ինչ դիրքով են եղել: Հիմնականում այրվածքները ուսագոտու շրջանում են և վերջույթներին։

Ծայրահեղ ծանր վիճակում գտնվողների մոտ գրեթե ամբողջությամբ այրված են վերջույթներն ու մեջքը: Տուժածներից 6-ը միջին տարիքի տղամարդիկ են, մեկը՝ կին, որը ծայրահեղ ծանր վիճակում գտնվողներից մեկի կինն է: Նա դուրս է գրվել, դրսում է:

Հովհաննիսյանը նկատել է, որ կարևոր է վիճակի փոփոխությունը 5-7-րդ օրը և 7-10-րդ օրը, երբ թունավորումը հասնում է իր մաքսիմալ աստիճանին․ «Այս օրերին մենք սպասում ենք պացիենտի վիճակի վատացում: Այս պահին գնահատել, թե ի՞նչ է լինելու, չենք կարող»։