25/07/2024

Աբսուրդայի՞ն, թե՞ իրատեսական. Պուտինն առաջ է քաշել Ուկրաինայում պատերազմի ավարտի իր պայմանները

Ռուսաստանի նախագահ Վլադիմիր Պուտինը նշել է Ուկրաինայի հետ խաղաղ բանակցություններ սկսելու երկու հիմնական պայման՝ ուկրաինական զորքերի դուրսբերում Դոնեցկի, Լուգանսկի, Զապորոժիեի և Խերսոնի շրջաններից, ինչպես նաև Կիևի՝ ՆԱՏՕ-ին միանալուց հրաժարվելը։

Armtimes.com-ը գրել է․ Հայտարարությունն արվել է Շվեյցարիայում խաղաղության գագաթնաժողովի մեկնարկի նախօրեին, որտեղ Ռուսաստանը հրավիրված չէ։

Կիևում Պուտինի առաջարկն անիրատեսական և աբսուրդային են անվանել:

«Հենց Կիևը հայտարարի, որ պատրաստ է և սկսի զորքերի իրական դուրսբերումը Դոնեցկի, Լուգանսկի, Զապորոժիեի և Խերսոնի շրջաններից, ինչպես նաև կհայտարարի ՆԱՏՕ-ին միանալուց հրաժարվելու մասին, մենք անմիջապես հրադադար կհրամայենք և կսկսենք բանակցություններ»,- ասել է Պուտինը՝ ելույթ ունենալով արտաքին գործերի նախարարության ղեկավարության հետ հանդիպմանը:

Միաժամանակ, նա հատկապես ընդգծել է, որ ուկրաինական զորքերը պետք է ամբողջությամբ լքեն այդ շրջանների տարածքները, թեպետ, ինչպես հայտնի է, ռուսական զորքերը միայն մասամբ են վերահսկում դրանք։

Ըստ Պուտինի պայմանի՝ Ուկրաինան պետք է հրաժարվի ՆԱՏՕ-ին միանալու ծրագրերից, ունենա «չեզոք, ոչ դաշնակցային, միջուկային զենքից զերծ կարգավիճակ», ապահովի ռուսախոսների իրավունքները, ենթարկվի «ապազինացման», «ապառազմականացման» և ընդունի «տարածքային նոր իրողությունները»։

ՌԴ նախագահը նաև նշել է, որ հակամարտության խաղաղ կարգավորման վերաբերյալ համաձայնությունները պետք է արձանագրվեն միջազգային պայմանագրերում, բացի այդ, պետք է չեղարկվեն Ռուսաստանի դեմ սահմանված բոլոր պատժամիջոցները։

Այս դեպքում, վստահեցրել է Պուտինը, ուկրաինական հակամարտությունը ոչ միայն կսառեցվի, այլ վերջնականապես կավարտվի։ Նա ուկրաինական զորքերին խոստացել է ապահովել անվտանգ դուրսբերում ցանկացած վիճելի տարածքից:

Ինչու այս մասին հայտարարվեց «Խաղաղության գանգաթնաժողով»-ից առաջ

Պուտինը հայտարարել է հակամարտությունը դադարեցնելու իր պայմանների մասին Ուկրաինայի կողմից կազմակերպված խաղաղության գագաթնաժողովի նախօրեին, որը մեկնարկել է Շվեյցարիայի Բուրգենստոկ քաղաքում։

Շվեյցարիայի կառավարությունն ավելի վաղ հայտնել է, որ խաղաղության գագաթնաժողովին կմասնակցի 100 պատվիրակություն, այդ թվում՝ 92 երկիր և ութ կազմակերպություն։ Սակայն դրան Ռուսաստանի ներկայացուցիչները չեն հրավիրվել։ Բացի այդ, հանդիպմանը հրաժարվել են մասնակցել Չինաստանը, Բրազիլիան և Սաուդյան Արաբիան։

Խաղաղության գագաթնաժողովի քննարկումները կտևեն երկու օր, և ակնկալվում է, որ դրանք կավարտվեն ամփոփիչ կոմյունիկեի ընդունմամբ, որը կվերաբերի «ուկրաինական խաղաղության բանաձևի» երեք կետերին՝ պարենային անվտանգության, ռադիացիոն և միջուկային անվտանգության, ինչպես նաև հումանիտար հարցեր՝ բոլոր բանտարկյալների և տեղահանվածների, այդ թվում՝ ուկրաինացի երեխաների ազատ արձակում։

Ակնկալվում է, որ այդ որոշումները Մոսկվա կբերվեն միջնորդ երկրների օգնությամբ, որոնք կանցկացնեն «միջնորդություն Ռուսաստանի և Ուկրաինայի միջև» այն սխեմայի համաձայն, որը նախկինում գործում էր «հացահատիկային միջանցքի» ստեղծման շուրջ բանակցությունների ժամանակ։

Դեռ պարզ չէ՝ Պուտինի հայտարարությունը կփոխի՞ գագաթնաժողովի օրակարգը։

Հիտլեր, ագրեսոր, օկուպանտ. Ուկրաինայի և Արևմուտքի արձագանքը

Հրադադարի մասին Պուտինի առաջարկը վերջնագիր է, որին չի կարելի վստահել, հայտարարել է Ուկրաինայի նախագահ Վլադիմիր Զելենսկին։ Նրա կարծիքով, Պուտինը չի դադարեցնի ռազմական հարձակումը, եթե նույնիսկ կատարվեն հրադադարի իր պահանջները:

«Այս հաղորդագրությունները նույնն են, ինչ Հիտլերն ուներ… Հարյուր տարի էլ չի անցել այն պահից, երբ նա ասաց. «Տվեք ինձ Չեխոսլովակիայի մի մասը, և դրանով ամեն ինչ կավարտվի»: Ոչ, սա սուտ է, պատմականորեն հաստատված։ Դրանից հետո նա ուներ Լեհաստանիի պահանջ՝ «Տվեք ինձ Լեհաստանի մի մասը»: Դրանից հետո եղավ ողջ Եվրոպայի օկուպացիան»,-ասել է Զելենսկին։

Այն, որ Վլադիմիր Պուտինի բոլոր վերջնագրերը նախկինում մեկ անգամ չէ, որ հնչել են Մոսկվայի կողմից, և վերջին հայտարարություններում նորություն չկա, հայտարարել է նաև Ուկրաինայի ԱԳՆ-ն։

Միաժամանակ, ըստ պաշտոնական Կիևի, ՌԴ-ում ուշադրություն են դարձրել իրենց հայտարարության ժամին։

«Շվեյցարիայում կայանալիք խաղաղության գագաթնաժողովի նախօրեին նման ազդանշաններ շպրտելով՝ Պուտինը միայն մեկ նպատակ ունի՝ թույլ չտալ աշխարհի առաջնորդներին և երկրներին մասնակցել այս գագաթնաժողովին։ Այն փաստը, որ Պուտինի հայտարարությունները հայտնվեցին գագաթնաժողովից ընդամենը մեկ օր առաջ, վկայում է այն մասին, որ Ռուսաստանը վախենում է իրական խաղաղությունից»,- ասվում է Ուկրաինայի ԱԳՆ հայտարարության մեջ։

Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը Ռուսաստանի նախագահի առաջ քաշած պայմաններն անվանել է «ագրեսորների ստանդարտ խմբի պահանջ», որի բովանդակությունը «խիստ վիրավորական է միջազգային իրավունքի համար» և խոսում է « Ռուսաստանի ներկայիս ղեկավարության՝ իրողությունները համարժեք գնահատելու անկարողության մասին»։

Ուկրաինայի արևմտյան դաշնակիցները նույնպես քննադատել են Վլադիմիր Պուտինի հնչեցրած առաջարկը։

ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ «Ուկրաինան չէ, որ պետք է զորքերը դուրս բերի ուկրաինական տարածքից, այլ Ռուսաստանն է, որ պետք է դուրս բերի իր զորքերը օկուպացված ուկրաինական հողից»: Նա Պուտինի հնչեցրած կետերն անվանել է «ոչ թե խաղաղության առաջարկ», այլ «ավելի շատ ագրեսիայի, ավելի շատ օկուպացիայի» առաջարկ։

«Դա ցույց է տալիս, որ Ռուսաստանի նպատակն է վերահսկել Ուկրաինան, և դա եղել է Ռուսաստանի նպատակը այս պատերազմի հենց սկզբից, և դա միջազգային իրավունքի կոպտագույն խախտում է, դա է նաև պատճառը, որ ՆԱՏՕ-ի դաշնակիցները շարունակում են աջակցել Ուկրաինային»,- նշել է ՆԱՏՕ-ի գլխավոր քարտուղարը:

Սթոլթենբերգը նաև ասել է, որ Կրեմլի ղեկավարի առաջարկը չի արվել «բարի կամքի ոգով»։ Ըստ նրա՝ Մոսկվան ցանկանում է ավելի մեծ ռազմական հաջողություններ, որպեսզի Ուկրաինան զիջի իր տարածքի զգալի մասը՝ նույնիսկ ավելին, քան ներկայումս վերահսկում է Ռուսաստանի Դաշնությունը։

ԱՄՆ պաշտպանության նախարար Լլոյդ Օսթինն էլ հայտարարել է, թե Ռուսաստանի նախագահ Վլադիմիր Պուտինը «ի վիճակի չէ» Ուկրաինայից պահանջել դադարեցնել պատերազմը։

«Նա ի վիճակի չէ թելադրել Ուկրաինային, թե նա ինչ պետք է անի խաղաղության հասնելու համար», – ասել է Օսթինը Բրյուսելում ՆԱՏՕ-ի կենտրոնակայանում լրագրողների հետ զրույցում: Նրա խոսքով, Ռուսաստանի նախագահը կարող է ավարտել պատերազմը «նույնիսկ այսօր, եթե իսկապես որոշի դա անել»։