13/07/2024

Ռուսաստանը կդադարեցնի մասնակցությունը ԵԱՀԿ Խորհրդարանական վեհաժողովին

Ռուսաստանի Պետդուման և Դաշնության խորհուրդը համատեղ հայտարարություն են ընդունել Եվրոպայի անվտանգության և համագործակցության կազմակերպության Խորհրդարանական Վեհաժողովի (ԵԱՀԿ ԽՎ) աշխատանքներին երկրի Դաշնային ժողովի պատվիրակության մասնակցությունը կասեցնելու և 256 հազար եվրո անդամավճարը մուծելուց հրաժարվելու վերաբերյալ:

Այս մասին հայտնել են ռուսական լրատվամիջոցները:

«Չնայած ռուսական պատվիրակության բազմակի դիմումներին և առաջարկներին՝ ԵԱՀԿ ԽՎ ղեկավարության առաջնահերթությունները վկայում են, որ կարծիքների կառուցողական փոխանակման և միավորող օրակարգ ձևավորելու պայմաններ ստեղծելու փոխարեն այս հարթակը ներկայումս օգտագործվում է որպես քաղաքականացված գործիք՝ հակառուսաստանյան կուրսի նպատակային իրականացման համար, ներառյալ Ուկրաինայում տեղի ունեցող իրադարձությունների պատճառահետևանքային կապի միտումնավոր խեղաթյուրումը»,- ասված է փաստաթղթում:

Ռուսաստանը պնդել է, որ ԵԱՀԿ ԽՎ-ն երկար տարիներ անտեսում է Ուկրաինայում և Բալթյան երկրներում ազգային փոքրամասնությունների իրավունքների ոտնահարման, մայրենի լեզվով հաղորդակցվելու և կրթվելու ազատության հետ կապված խնդիրները, ուշադրություն չի դարձնում նացիստների և նրանց աջակիցների հերոսացմանը, Բրյուսելում և Վաշինգտոնում ձևավորված տեսակետները չկիսող լրագրողների նկատմամբ բռնարարքներին և նրանց սպանություններին:

«Ռուսաստանը պնդում է, որ երկրի պատվիրակությունը բազմիցս մտածածին պատրվակներով զրկվել է երկխոսությունը շարունակելու, ԵԱՀԿ ԽՎ լիագումար նիստերի և ղեկավար մարմինների աշխատանքներին լիարժեք և հավասարազոր մասնակցության, որոշումների կայացմանը մասնակցելու հնարավորությունից։

Ռումինիան ցուցադրաբար վիզաներ չի տրամադրել Ռուսաստանի պատվիրակության անդամներին՝ Բուխարեստում կայանալիք ԵԱՀԿ ԽՎ ամենամյա նստաշրջանին մասնակցելու համար»,- ըստ լրատվամիջոցների, ասված է հայտարարության մեջ:

Ռուս օրենսդիրները միաժամանակ, հայտարարել են, որ իրենց մասնակցության կասեցման ընթացքում Վեհաժողովի կանոնակարգում փոփոխություններ կատարելու ցանկացած գործողություն, որը միտված է լինելու ՌԴ-ին վնասելուն իրավաբանորեն կհամարվի անվավեր:

Սրան զուգահեռ, Ռուսաստանը նաև հայտարարել է, որ պատրաստ է վերսկսել աշխատանքները ԵԱՀԿ ԽՎ-ում, եթե կազմակերպության ղեկավարությունը և մի շարք երկրներ վերանայեն եվրոպական անվտանգության հրատապ խնդիրների լուծման նկատմամբ իրենց մոտեցումները: