13/07/2024

Վրաստանի կառավարությունը վտանգի տակ է դնում իր ռազմավարական գործընկերությունը ԱՄՆ-ի հետ․ Զուրաբիշվիլի

Վրաստանի կառավարությունը վտանգի տակ է դնում իր ռազմավարական գործընկերությունը ԱՄՆ-ի հետ։

Այս մասին հայտարարել է հանրապետության նախագահ Սալոմե Զուրաբիշվիլին՝ կապված վրաց-ամերիկյան զորավարժությունները անորոշ ժամանակով հետաձգելու ԱՄՆ որոշման հետ։

ԱՄՆ պաշտպանության նախարարությունը ուրբաթ ավելի վաղ հայտարարել էր, որ ԱՄՆ-ի և Վրաստանի համատեղ զորավարժությունները, որոնք նախատեսված էին 2024 թվականի ամռանը, հետաձգվել են՝ ռազմավարական հարաբերությունների վերանայման պատճառով։

«Նրանք (Վրաստանի կառավարությունը) վտանգեցին եվրոպական ուղին՝ ընդունելով ռուսական օրենքը (օտարերկրյա գործակալների մասին օրենք), և այժմ սպառնալիքի տակ են դնում մեր ռազմավարական գործընկերությունը, որի վրա հիմնված է մեր պաշտպանական ուժերի հզորացումը և մերձեցումը ՆԱՏՕ-ի չափանիշներին»,- ասել է Զուրաբիշվիլին:

ԱՄՆ պաշտպանության նախարարությունը զորավարժությունները հետաձգելու որոշումը հիմնավորել է նրանով, որ վրացական իշխանությունները հայտարարել են ԱՄՆ-ի և Արևմուտքի կողմից «երկրորդ ճակատ» բացելու փորձերի մասին՝ ուկրաինական իրավիճակի հետ կապված Ռուսաստանի վրա ճնշումը մեծացնելու նպատակով։

Ամերիկյան կողմը պնդել է, որ նման հայտարարությունները սուտ են և որոշել, որ այժմ հարմար ժամանակը չէ Վրաստանում լայնամասշտաբ զորավարժություններ անցկացնելու համար։