Նարեկ Զեյնալյանը մանդատը դնելուց հետո առաջին հարցազրույցը տվեց «Հրապարակին»

ԱԺ ՔՊ խմբակցության անդամ, Առողջապահության հանձնաժողովի նախագահ Նարեկ Զեյնալյանն այսօր մանդատից հրաժարվելու դիմում է ներկայացրել ԱԺ նախագահին: Մենք կապվեցինք Զեյնալյանի հետ եւ նա պատասխանեց մեր մի քանի հարցին:

-Պարոն Զեյնալյան, լուրեր են շրջանառվում, որ առողջապահության նախարար դառնալու պատճառով եք նաեւ համաձայնել մանդատը վայր դնելու «խնդրանքին», նման առաջարկ չե՞ք ստացել։

-Ոչ, չեմ ստացել, դրանք կեղծ լուրեր են։

– Ինչու՞ Ձեզ ստիպեցին մանդատը վայր դնել: Արգիշտի Քյարամյանի մասին խորհրդարանում ունեցած բավականին ծանր ելույթի համա՞ր են Ձեզ պատժում, ինչո՞ւ եք հեռանում խորհրդարանից։

-Նման ելույթներ շատ են եղել, պատգամավորական գործունեությունը ենթադրում է նաեւ ծանր ելույթներ, քննադատող ելույթներ, դա կապ չունի։

-Բայց Ձեզ ստիպե՞լ են՝ վայր դնել մանդատը։

-Ինձ ոչ ոք չի ստիպել, որ մանդատս վայր դնեմ։ Ես իմ նախաձեռնությամբ եմ դադարեցրել պատգամավորական գործունեությունը։

-Ինչո՞ւ հիմա որոշեցիք դադարեցնել պատգամավորական գործունեությունը, եթե Ձեր անձի շուրջ պրոցես չկար եւ «արշալույսները խաղաղ» էին։

-«Արշալույսների» խաղաղ լինել- չլինելը կապ չունի, ես եկել եմ այդ որոշմանը եւ գնացել եմ այդ քայլին։ Իմաստը ո՞րն է դավադրություն փնտրել։

-Շարունակելո՞ւ եք ՔՊ-ական լինել, մասնակցո՞ւմ եք կուսակցական նիստերին։

-Ես կուսակցության անդամ եմ, եւ շարունակում եմ մնալ «Քաղաքացիական պայմանագիր» կուսակցության անդամ։ Ֆորմատից կախված մասնակցում եմ կուսակցության նիստերին։

-Իսկ ինչո՞վ եք զբաղվելու` որոշե՞լ եք։

-Կորոշեմ առաջիկայում։

-Առողջապահության ոլորտո՞ւմ։

-Դեռ չեմ որոշել։