Ինտելեկտուալ մակարդակը «միջինից միջին է»

Երեւանի առաջին ատյանի դատարանի դատավոր Տաթեւիկ Մուրադյանը դատապարտյալ Սուրիկ Աֆյանի վաղաժամկետ ազատման հարցով որոշում է կայացրել նրա բացակայությամբ` առանց դատապարտյալին դատարան բերելու, գործը քննելով գրավոր ընթացակարգով: Այս մասին Հրապարակ թերթին հայտնել է Աֆյանը՝ զանգահարելով կալանավայրի տաքսոֆոնից:

Նա կարծում է, որ իր հանդեպ դատարանն անարդար է վարվել, պնդում է, որ ինքն ուզում էր «նորմալ ներկայացնել իր կյանքը կալանավայրում, իր գործը», սակայն դատարանը նրան չի լսել, ձեւական քննություն է կատարել: Նա պատմեց, որ առողջական խնդիրների պատճառով գտնվում է «Դատապարտյալների հիվանդանոց» ՔԿՀ-ում, որի պետի ժամանակավոր պաշտոնակատարը` Ռոբերտ Թամարյանը, Աննա Հակոբյանի վարսավիրի ամուսինն է:

Վերջինս չի ցանկանում պայմանական վաղաժամկետ ազատման ներկայացնել իրեն: Ե՛վ ՔԿՀ-ն, ե՛ւ Պրոբացիոն ծառայությունը բացասական եզրակացություն են գրել Աֆյանի վարքի վերաբերյալ՝ նշելով, որ նա «կրթական միջոցառումներին մասնակցելու ցանկություն չի հայտնել», որ նրա ինտելեկտուալ մակարդակը «միջինից միջին է»: Ինքն էլ վիրավորվել է այս բնորոշումներից ու դիմել է դատարան, որ չեղյալ համարեն պետի բնութագիրը: Այստեղ էլ Աֆյանն անհաջողություն է ունեցել` ի դեմս դատավոր Տաթեւիկ Մուրադյանի: Նա ոչ միայն գրավոր ընթացակարգով է քննել իր բողոքն ու իր բացակայությամբ, անգամ չի ծանոթացել Աֆյանի անձնական գործին: Նրա անձնական գործի տվյալները դատական նյութերում բացակայում են, ինչն արձանագրել է Վերաքննիչ դատարանը, որը բեկանել է առաջին ատյանի որոշումը եւ գործն ուղարկել  նույն դատարան` նոր քննության:

Աֆյանը դատարանին է ներկայացրել այն միջոցառումների ցանկը, որոնց մասնակցել է՝ ննջեցյալների հոգու փրկության արարողություն, առցանց էքսկուրսիա Չարենցի ու Սիլվա Կապուտիկյանի տուն-թանգարաններ, դոմինոյի ներհիմնարկային մրցաշար, ՍՊԻԴ-ի վերաբերյալ դասընթաց, շախմատի առաջնություն:

Աֆյանը Կոտայքի մարզի Ջրաբեր  գյուղից է, նախկինում 5 անգամ դատապարտված: 24-ի ապրիլին դատապարտվել է 4 տարի 6 ամսով` փորձել է գողություն անել  Սեւանի հացի գործարանից, մոտեցել է չհրկիզվող պահարանին, փորձել է այն բացել, բայց տեսնելով այլ անձանց, հանցագործությունն ավարտին չի հասցրել` փախել է, ոչինչ չհափշտակելով:

Նա մասնակցել է 44-օրյա պատերազմին, ՊՆ-ից ունի դրական բնութագիր, բայց ոչինչ չի օգնել դատապարտյալին՝ ստանալու իրեն օրենքով հասանելիքը: Նա ոչ մի տեղ չի աշխատում, այն խեղճ, անթիկունք մարդկանցից է, որոնց հանդեպ օրենքը գործում է ողջ խստությամբ: