ՔՊ-ականները նեղսրտել են, որ ռուս գեներալը զանգահարել է փոխքաղաքապետին

Հունիսի 14-ի երեկոյան Գյումրիում տեղի ունեցած ուժեղ քամու և կարկուտի հետևանքով մի շարք թաղամասեր զգալի վնասներ են կրել։ Քաղաքում ստեղծված իրավիճակի վերաբերյալ, ինչպես տեղեկանում ենք Գյումրու քաղաքապետարանի ֆեյսբուքյան էջից, Գյումրիում տեղակայված ռուսական 102-րդ ռազմաբազայի հրամանատար, գեներալ-մայոր Ալեքսանդր Վիտալիևիչ Բեզբորոդովը հեռախոսազրույց է ունեցել փոխքաղաքապետ Գագիկ Մանուկյանի հետ։

«Զրույցի ընթացքում ռուս գեներալը հետաքրքրվել է ստեղծված վիճակով և, հանդես գալով սեփական նախաձեռնությամբ, առաջարկել է ռազմաբազայի աջակցությունը՝ տեխնիկայի և մարդկային ռեսուրսների տրամադրման տեսքով՝ քաղաքի մաքրման և վնասների վերացման աշխատանքներին նպաստելու համար։

Փոխքաղաքապետ Գագիկ Մանուկյանը քաղաքապետ Վարդան Ղուկասյանի անունից շնորհակալություն է հայտնել ցուցաբերած ուշադրության և պատրաստակամության համար՝ ընդգծելով, որ նման աջակցությունը վկայում է գործընկերային ջերմ հարաբերությունների և փոխադարձ հարգանքի մասին»,-ասված է հաղորդագրությունում՝ միաժամանակ տեղեկացվում է, որ առայժմ համայնքային ծառայությունները կարողացել են սեփական ուժերով վերահսկել իրավիճակը, սակայն անհրաժեշտության դեպքում ռազմաբազայի օգնությունն անպայման կդիտարկվի։

Hraparak.am-ը նկատել է, որ քաղաքապետարանի էջում հայտնված այս գրառմանը հատկապես ակտիվ են արձագանքել ՔՊ-ականները, բացահայտ ցույց են տվել  իրենց դիրքորոշումը հայ-ռուսական հարաբերությունների հետ կապված։ ՔՊ-ական պատգամավոր Կարեն Սարուխանյանն է գրառմամբ կիսվել՝ մեկնաբանություն թողնելով․«Ապապետության հերթական դրսևորումներից մեկը Գյումրու լադիմիրատենչ համայնքային իշխանության կողմից»,-գրել է նա։

Նկատենք, որ նորանշանակ քաղաքապետ Վարդան Ղուկասյանի օրոք նկատելիորեն աշխուժացել են Գյումրիի և ռուսական համայնքի փոխշփումները, կարծես վերականգնվում են նախկին տարիների սերտ կապերը։