Ո՞նց էր Սերժ Սարգսյանի թիմը կենցաղային հարցերով անընդհատ նամակ գրում, նույնկերպ թող զգուշացներ արհավիրքի մասին. Փաշինյան

«Իրականության բացահայտման ճանապարհին այդ հայտարարությունը համարում եմ օգտակար»,- այսօր ԱԺ-Կառավարություն հարցուպատասխանի ժամանակ հայտարարեց վարչապետ Նիկոլ Փաշինյանը՝ ի պատասխան ՔՊ խմբակցության պատգամավոր Վահագն Ալեքսանյանի խնդրանքի՝ մեկնաբանել լրագրողներին Սերժ Սարգսյանի վերջերս արած հայտարարությունը առ այն, թե ինչու է նա կրկին առաջադրվել որպես վարչապետի թեկնածու՝ ի հեճուկս չառաջադրվելու մասին իր խոստման:

Ինչպես նշեց վարչապետը, այդ հայտարարությամբ Սերժ Սարգսյանն ասում է, որ ինքը վարչապետի թեկնածու վերստին առաջադրվելիս իմացել է ԼՂ գլխին կախված «վերահաս արհավիրքի» մասին. «Սա մի հայտարարություն է, որը ոչ միայն վերահաստատում է 2018թ. դրությամբ ԼՂ հարցի բանակցային գործընթացի վերաբերյալ մեր գնահատականը, այլև նոր նյուանս է ավելացնում և ավելի ուժեղացնում այդ գնահատականը: Եթե վարչապետի թեկնածու առաջադրվելու պահին Սերժ Սարգսյանը գիտեր մոտեցող արհավիրքի մասին, առնվազն դա զրոյացնում է այս ընթացքում նրանց այն հայտարարությունները, թե իրենք դիվանագիտական հաղթանակների վիճակում են եղել 2018, 2017թթ.-ներին, որովհետև դիվանագիտական հաղթանակում գտնված լինելը չի նշանակում երկիրը հասցնել վերահաս արհավիրքի իրավիճակին. էդ ո՞ւմ գործողությունների և ո՞ւմ վարած բանակցությունների արդյունքում էր կանգնել այդ արհավիրքը Հայաստանի դռան դեմը: Իսկ ինչո՞ւ այդ արհավիրքի մասին չի տեղեկացել ՀՀ ժողովուրդը»:

Վարչապետը ընդգծեց, որ այդ մասին կարող էին տեղեկացնել գոնե 2018թ. հեղափոխությունից հետո. «Բա եթե էդ արհավիրքը վերահաս էր, 2018թ. մայիսի 9-ից սկսած այդ մարդիկ ասում էին՝ տալիս են-տալիս են, տարան-տարան: Թող տեղեկություն տային, ոչ թե փորձեին կառավարությանն էլ մոլորության մեջ գցել: Էդ ոնց է, որ Սերժ Սարգսյանը պաշտոնանկությունից հետո կարող էր իր կենցաղային հարցերի մասին կառավարությանը նամակ նամակի հետևից գրեր ու չէր կարող գրել՝ կառավարություն, վերահաս արհավիրքի առաջ եք»:
«Եկեք ֆիքսենք, որ 2017թ.-ի նոյեմբեր-դեկտեմբերին և 2018թ. հունվար-փետրվարին ՀՀ-ն և ԼՂ-ն եղել են վերահաս արհավիրքի դեմ հանդիման»,- ընդգծեց Նիկոլ Փաշինյանը: