23/04/2024

Վրաստանը դեռևս ռազմական հակամարտության մեջ ներքաշվելու վտանգի առաջ է. Ղարիբաշվիլի

Վրաստանը դեռևս կանգնած է ռազմական հակամարտության մեջ ներքաշվելու և Ռուսաստանի դեմ «երկրորդ ճակատ» բացելու վտանգի առաջ, ասել է իշխող «Վրացական երազանք» կուսակցության նախագահ Իրակլի Ղարիբաշվիլին։

«Աշնանը կայանալիք խորհրդարանական ընտրությունները շատ կարևոր են մեր երկրի համար, մենք պահպանել ենք կայունությունը, խաղաղությունը և տնտեսական զարգացումը, սակայն այն ռիսկերը, որոնք կային նախորդ և անցյալ տարի անվտանգության և պատերազմի մեջ երկրի ներգրավվածության հետ կապված, «Երկրորդ ճակատի» բացման հետ կապը չի անհետացել։

Ես խոսեցի այս խնդիրների մասին ընտրողների հետ և ասացի, որ «Վրացական երազանքի» հաղթանակը մեր ժողովրդի միակ այլընտրանքային լուծումն է՝ պահպանելու խաղաղությունը, կայունությունը և զարգացումը»,-քաղաքացիների հետ հանդիպումից հետո լրագրողներին ասել է Ղարիբաշվիլին։

2022 թվականի փետրվարին Ղարիբաշվիլին, որն այն ժամանակ զբաղեցնում էր վարչապետի պաշտոնը, հայտարարեց, որ Վրաստանը չի միանա Արևմուտքի կողմից կիրառված հակառուսական պատժամիջոցներին՝ ի պատասխան Ուկրաինայում ռուսական հատուկ գործողության։ Շուտով Վլադիմիր Զելենսկին որոշեց Թբիլիսիից հետ կանչել Ուկրաինայի դեսպանին։

Նախկինում Վրաստանի իշխող կուսակցությունների ներկայացուցիչները բազմիցս հայտարարել են, որ ուկրաինացի պաշտոնյաները և ընդդիմադիր «Միացյալ ազգային շարժում» կուսակցության նրանց համակիրները ցանկանում են Վրաստանում «երկրորդ ճակատ» բացել Ռուսաստանի դեմ։