Հայաստանը կարող է դիմել Եվրամիությանը (ԵՄ)՝ անդամակցելու հայտ ներկայացնելու համար, իսկ երկրի ինտեգրման հետագա որոշումը կախված է ԵՄ բոլոր երկրների հավանությունից:
Այս մասին «Իզվեստիա» թերթին տված հարցազրույցում հայտարարել է Եվրահանձնաժողովի ներկայացուցիչ Պետեր Ստանոն։
«Երկրներն իրավունք ունեն ձգտել հասնել իրենց ժողովրդի ավելի լավ ապագայի: Ինչ վերաբերում է ԵՄ անդամակցությանը, յուրաքանչյուր եվրոպական երկիր, նրա ժողովուրդն ու կառավարությունը պետք է որոշի, թե ցանկանո՞ւմ է դիմել՝ ԵՄ-ին միանալու համար»,- ասել է Ստանոն։
Նրա խոսքով, երբ տվյալ պետությունը ԵՄ-ին անդամակցելու հայտ է ներկայացնում, անդամ երկրները դիտարկում են այն, այնուհետև համապատասխան որոշում են կայացնում՝ հիմնվելով ԵՄ պայմանագրերի և սահմանված չափանիշների վրա։
504 կողմ, 4 դեմ և 32 ձեռնպահ ձայներով Եվրախորհրդարանը բանաձև է ընդունել, որով առաջարկվում է Հայաստանին Եվրամիության անդամակցության թեկնածուի կարգավիճակ տալու հնարավորություն տալ:
Բանաձևով Եվրամիության կառույցներին կոչ է արվում աջակցել Հայաստանի հետ գործակցության ընդլայնմանը ոչ միայն տնտեսական, այլև քաղաքական երկխոսության, անվտանգության և այլ ոլորտներում:
Ընդգծվել է, որ Ժամանակն է նաև Հայաստանի հետ վիզաների ազատականացման վերաբերյալ երկխոսություն սկսել:
Բանաձևով եվրապատգամավորներն աջակցություն են հայտնել Բաքու-Երևան հարաբերությունների կարգավորմանը, որը հիմնված կլինի Ալմա-Աթայի հռչակագրին համապատասխան սահմանների փոխադարձ ճանաչման սկզբունքի վրա:
Բանաձևում մեջբերվել է ՀՀ վարչապետի՝ ավելի վաղ The Telegraph-ին տված հարցազրույցում արած հայտարարությունն առ այն, որ Հայաստանի Հանրապետությունը պատրաստ է Եվրամիության հետ լինել այնքան մոտիկ, ինչքան ԵՄ-ն դա հնարավոր կհամարի:
Միաժամանակ ասվում է, որ Ադրբեջանը չի կարող համարվել Եվրամիության վստահելի գործընկեր՝ հաշվի առնելով Լեռնային Ղարաբաղում իրականացրած էթնիկ զտումները:
Բաքվին ուղղված կոչով առաջարկվել է երկխոսել Լեռնային Ղարաբաղի հայերի հետ, ապահովել նրանց անվտանգությունը և վերադարձի իրավունքը, ազատել Ադրբեջանում պահվող՝ Հայաստանի և Լեռնային Ղարաբաղի բնակիչներին:
Նիկոլ Փաշինյանը հայտարարել է, որ ԵԽ ընդունած բանաձևը Հայաստանում հանրային քննարկման առարկա պետք է դառնա՝ ակնկալելով արձագանքներ:
Բաց մի թողեք
Արևմուտքն, ի վերջո, Ադրբեջանի նկատմամբ ազդեցության լծակներ գործի կդնի՞
Թուրքիան՝ օկուպացված Շուշիում, բացել է երկրաշարժի մոնիթորինգի կայան
Ուկրաինայի խնդիրը, կարծես, մտնում է նոր ծիր, որի մի կողմում Վատիկանն է, մյուսում՝ Չինաստանը