Ռուսաստանի նախագահի մամուլի քարտուղար Դմիտրի Պեսկովը մարտի 6-ին պնդել է, որ Ռուսաստանում ավելի շատ հայ է ապրում, քան Հայաստանում։
«Փաստերի ստուգման հարթակն» ուսումնասիրել է ՌԴ և ՀՀ վիճակագրական տվյալները՝ պարզելու այդ երկրում ապրող հայերի թիվը։
ՌԴ-ում վերջին մարդահամարի տվյալները
Ռուսաստանի պետական վիճակագրական դաշնային ծառայության համաձայն, վերջին մարդահամարն այդ երկրում անցկացվել է 2020-2021 թվականներին, տվյալները վերջնական ամփոփվել ու հրապարակվել են 2022 թվականին․ ըստ այդ մարդահամարի, ՌԴ-ում հայերի թիվը կազմել է մոտ 950 000։
Նշենք, որ ըստ մարդահամարի անցկացման մեթոդաբանության, ՌԴ-ում բնակչության էթնիկ կազմի տվյալները ստացվել են՝ «Ձեր ազգային պատկանելիությո՞ւնը» հարցի պատասխանների հիման վրա՝ համաձայն ՌԴ սահմանադրության 26-րդ հոդվածով սահմանված՝ մարդու սեփական ազգությունը որոշելու և նշելու իրավունքի։
Այսպիսով, ՌԴ-ում 950 000 մարդ է ապրում, որն իրեն ազգությամբ համարում է հայ, և այդ երկրի պաշտոնական տվյալները հիմնվում են հենց այդ փաստի վրա։
Հատկանշական է, որ նախորդ՝ 2010 թվականի մարդահամարի տվյալներով, այդ թիվը կազմել է 1,182 մլն մարդ․ փաստացի, այդ երկրում իրենց հայ համարողների թիվը զգալիորեն կրճատվել է վերջին 10 տարում։
ՀՀ պաշտոնական տվյալները
Հայաստանի Հանրապետության 2022 թվականի մարդահամարի տվյալներով՝ մեր երկրում բնակչության ճնշող մեծամասնությունը՝ 2․932 մլն մարդուց 2,875 մլն-ը, ազգությամբ հայ են։
Այսպիսով, ՌԴ և ՀՀ պաշտոնական տվյալները հակասում են ՌԴ նախագահի մամուլի քարտուղարի պնդումներին․ Հայաստանում, համաձայն այդ տվյալների, 3 անգամ ավելի շատ հայ է ապրում, քան ՌԴ-ում։
Նանե Մանասյան
Բաց մի թողեք
Ալիևի անհավատալի արկածներն Իտալիայում՝ ոչ միայն որպես Ադրբեջանի նախագահ, այլև՝ ՌԴ նախագահի «լիազոր ներկայացուցիչ»
Մոսկվան Ադրբեջանի եւ Թուրքիայի հետ որեւէ «ոչ պակաս ընդգրկուն» պայմանավորվածությամբ չի հարվածի «թիկունքից»
«Դիմադրության» շարժման «սրբազան» շարունակությունը․ առաջիկա հավաքին իրական շահառուները դուրս կգա՞ն «փարդի հետևից»