Հարցեր կար, որ տեղում դրանց սրությունը ավելի էմոցիոնալ զգացի. Փաշինյան. Տեսանյութ

ՀՀ վարչապետ Նիկոլ Փաշինյանը Տավուշի մարզի մի շարք գյուղերի բնակիչների հետ հանդիպումից հետո «Ազատության» հետ զրույցում կիսով չափ մանրամասնել է, թե ինչ խոսակցություն է եղել:

Նա կարծիք է հայտնել, որ մտահոգություններ կան, որ բնակիչները լրագրողներին չեն ասել, սակայն իրեն ասել են:

Այս կերպ է նա մեկնաբանել հարցը, թե այն մտահոգությունների մասին, որոնք բնակիչները բարձրաձայնում են լրագրողների հետ զրույցում, իրեն ասե՞լ են:

«Ամբողջ հանդիպումը տեսագրված է, կհրապարակվի, բայց հասկանալիորեն այն հատվածները, որոնք այլ զգայունություններ ունեն, գաղտնիքի տարրեր են պարունակում, դրանք չեն հրապարակվի»,- վստահեցրել է Կառավարության ղեկավարը:

Վերջինս ընդգծել է, որ ամենակարևոր ասելիքը վերջին ասուլիսի ժամանակ ասածն է եղել. «Հայաստանի այն նույն ուրվագիծը, որ ցույց եմ տվել այնտեղ, ցույց եմ տվել նաև այստեղ, և ասելիքը կառուցված էր դրա վրա»:

Վարչապետը շեշտել է, որ բնակիչների բարձրացրած այնպիսի մի հարց չպետք է լինի, որը մնա անպատասխան:

«Եթե մնա անպատասխան, նշանակում է, որ մենք լուծում չունենք հարցի: Որոշ հարցերի, այո, պատասխանով էինք եկել, որոշ հարցերի հետ կապված էլ ես մարդկանց ուղիղ ասացի, որ ես այսօր եկել եմ ոչ միայն հարցերին պատասխանելու, այլ նաև հարցերը հավաքելու և Կառավարության սեղանին որպես օրակարգ դնելու և դրանց պատասխանի շուրջ մտածելու և պատասխանով վերադառնալու համար»,- ասել է նա:

Վարչապետը նաև նկատել է՝ հարցեր են եղել, որ տեղում դրանց սրությունը, այսպես ասած, ավելի էմոցիոնալ և ավելի գործնական է զգացել:

«Հարցեր կան, որոնք պետական գաղտնիքների հետ են առնչվում, ամենակարևորը, որ մարդկանց մտահոգությունները և անվտանգությունը և ապագայի նկատմամբ հավատը մենք պետք է գործնականում, տեղում ցույց տալով, կառուցակարգերով հիմնավորենք»,- նշել է Կառավարության ղեկավարը:

Ավելի վաղ հայտնել էինք, որ վարչապետը հանդիպել է Ոսկեպարի, Բաղանիսի և հարակից բնակավայրերի բնակիչների, ինչպես նաև՝ Կիրանց համայնքի բնակիչների հետ: