Ծանրամարտի աշխարհի առաջնությունը տեղի կունենա Երևանում. Հայաստանի հայտը ճանաչվել է լավագույնը

Ծանրամարտի աշխարհի առաջնությունը տեղի կունենա Երևանում:

Այս մասին հայտնել է ՀՀ վարչապետի աշխատակազմի ղեկավար Արայիկ Հարությունյանը՝ նշելով, որ քիչ առաջ Ծանրամարտի միջազգային ֆեդերացիան որոշում է ընդունել 2027 թվականի աշխարհի առաջնության անցկացման իրավունքը տալ Հայաստանին:

«2023-ի Ծանրամարտի Եվրոպայի առաջնության բացման արարողության ժամանակ տեղի ունեցած անմիտ արարքից հետո Ծանրամարտի միջազգային ֆեդերացիան լուրջ մտահոգություն էր հայտնել տեղի ունեցածի առիթով, և սա պատճառ էր, որ մենք չստանանք 2024-ի աշխարհի առաջնությունը, ինչը մեծ հարված էր մեր սպորտին: Բայց ամիսներ տևած մեր հետևողական աշխատանքի արդյունքում այդ խնդիրն էլ կարող ենք համարենք լուծված:

Քիչ առաջ ներկայացրի մեր հայտը, որը համարվեց լավագույնը և անխոս առաջատարը: Սա աշխարհի առաջին առաջնությունն է օլիմպիական մարզաձևից, որը կանցկացվի Հայաստանում»,- նշել է Հարությունյանը:

Ինչպես հայտնի է, նախորդ տարվա ապրիլի 14-ին՝ Երևանի Կարեն Դեմիրճյանի անվան մարզահամերգային համալիրում ծանրամարտի Եվրոպայի առաջնության բացման հանդիսավոր արարողության ժամանակ, դիզայներ Արամ Նիկոլյանն այրել էր Ադրբեջանի դրոշը։

Ծանրորդների համար վճռորոշ դեր ունի Թայլանդում մարտի 31-ին մեկնարկելիք աշխարհի գավաթի խաղարկությունը:

Օլիմպիական ընտրական մրցաշարի առումով այդ ստուգատեսը վերջին վարկանիշայինն է:

Հայաստանը մրցումներում կներկայացնեն Անդրանիկ Կարապետյանը (89 կգ), Սամվել Գասպարյանն ու Գարիկ Կարապետյանը (երկուսն էլ՝ 102 կգ), Վարազդատ Լալայանը և Սիմոն Մարտիրոսյանը (երկուսն էլ՝ +109կգ ): Նրանք մրցավայր կմեկնեն մարտի 30-ին՝ լուսադեմին:

Մեր պատվիրակներից առաջինը ապրիլի 6-ին ծանրահարթակ կելնի Անդրանիկ Կարապետյանը:

Ստուգատեսը կավարտվի ապրիլի 11-ին, իսկ մայիսի վերջերին կհրապարակվի Փարիզի խաղերին մասնակցող ծանրորդների ցանկը: