25/05/2024

«Ես առաջարկում եմ էդ 25.000 տանք Գագիկին, որ ամեն ամիս կոխի…». Կնոջ նկատմամբ բռնություն գործադրող ու «վայելչախոս» ավագանու անդամը

Երևանի ավագանու «Ազգային առաջընթաց» խմբակցության անդամ Պեդրո Զարոկյանը, ինչպես այսօր՝ ավագանու նիստի ժամանակ պարզվեց, ընդունակ է ոչ միայն իրեն հատուկ տոնայնությամբ ու ոճով և, ինչպես ասում են՝ անողոք քննադատել քաղաքապետարանի աշխատանքները, հատկապես՝ «ծախսած միլիոնները», այլ նաև… ձեռքերին ազատություն տալ՝ ծեծի ենթարկել կնոջը։

«Հանրապետություն» կուսակցության անդամ, Երևանի ավագանու համանուն խմբակցության ղեկավար Անի Խաչատրյանն այսօր ավագանու նիստի ժամանակ հորդորեց «Ազգային առաջընթաց» խմբակցության ավագանու անդամ Պեդրո Զարոկյանին որոնել իր անվանումը «Դատալեքս» դատական տեղեկատվական համակարգում։

«Դատալեքս»-ում, իրոք, գտանք ընդդեմ Զարոկյանին ներկայացված հայց, որով տուժող է Իվետա Ղազարյանը՝ Զարոկյանի կինը։ «Պեդրո Զարոկյանին մեղադրանք է առաջադրվել այն բանի համար, որ նա 2019թ. հոկտեմբերի 12-ին Երևան քաղաքի Նորքի 13 փողոցի 44 տան հյուրասենյակում ծեծել և կատարել է այլ բռնի գործողություններ Իվետա Ղազարյանի նկատմամբ»,- նշված է մեղադրական եզրակացության մեջ։ Սույն գործով ուշագրավ զարգացում է տեղի ունեցել. 2020 թ. կայացած նիստում դատարանը ստացել է տուժողի դիմումը, որով վերջինս հայտնել է, որ հաշտվել է ամբաստանյալի հետ ու նրա նկատմամբ բողոք չունի և խնդրել է նաև կարճել քրեական գործի վարույթը:

23.04.2020թ. դատական նիստում ամբաստանյալ Պեդրո Հադանի Զարոկյանը հայտնել է, որ չի առարկում իր նկատմամբ տուժողի հետ հաշտվելու հիմքով քրեական հետապնդումը դադարեցնելուն:

Մեղադրող Մ. Գեղամյանը նույնպես նշել է, որ նման պայմաններում չի առարկում ամբաստանյալ Պեդրո Զարոկյանի նկատմամբ քրեական հետապնդման դադարեցման և քրեական գործի վարույթի կարճման դեմ: Ըստ այդմ էլ դատարանը որոշել է ամբաստանյալ Պեդրո Զարոկյանի նկատմամբ քրեական հետապնդումը դադարեցնել և քրեական գործի վարույթը կարճել՝ ամբաստանյալի հետ տուժողի հաշտվելու պատճառաբանությամբ:

«Դատալեքսում» Ի. Ղազարյանի կողմից ընդդեմ Զարոկյանի ներկայացվել են նաև քաղաքացիական հայցեր, որոնցից մեկը ամուսնալուծության պահանջի մասին է, մյուսը՝ համատեղ ամուսնության ընթացքում ձեռք բերված գույքը բաժանելու, մյուսով էլ՝ երեխայի բնակության վայրը մոր բնակության վայրով սահմանելու պահանջի։

Քաղաքացիական մեկ այլ գործ էլ ընդդեմ Զարոկյանի ներկայացվել է 2016-ին՝ Ռաֆայել Վեքիլյանի կողմից՝ պատիվը, արժանապատվությունն ու բարի համբավն արատավորելու և հրապարակային վիրավորանք հասցնելու կապակցությամբ

1.000.000 ՀՀ դրամ գումար բռնագանձելու և ներողություն խնդրելուն պարտավորեցնելու պահանջի մասին։ Դիմելով դատարան՝ Ռ. Վեքիլյանը հայտնել է, որ ինքը 25.12.2015թ. հանդիսանում է ՍՊ ընկերություններից մեկի տնօրենը և բնակվում է Երևանի Հյուսիսային պողոտայի շենքերից մեկի բնակարանում։ Հիշյալ ընկերությունը զբաղվում է կոմունալ ծառայությունների մատուցման գործունեությամբ և սպասարկում է մասնավորապես նաև այն շենքը, որտեղ բնակվում է Զարոկյանը։ Ընկերության մատուցվող ծառայությունների վերաբերյալ սպառողների հետ համապատասխան պայմանագրեր կնքելու անհրաժեշտության մասին ինչպես ինքը, այնպես էլ ընկերության այլ աշխատակիցներ բազմիցս բարձրաձայնել են շենքի բնակիչներին, սակայն առաջարկները քննարկման առարկա չեն դարձել, ինչի արդյունքում նույն շենքի բնակիչների մի մասի առաջարկով նույն խնդիրը բարձրաձայնել է շենքի համատիրության կառավարիչը՝ համատիրության էլ. փոստի hyusisayin6@mail.ru հասցեից նույն շենքի բնակիչների էլ. փոստի հասցեներին ուղարկելով առաջարկություն՝ 5-օրյա ժամկետում բնակիչներից տեսակետներ ու առաջարկություններ ստանալու ակնկալիքով՝ բնակիչների և իր գլխավորած ընկերության միջև կնքվելիք պայմանագրի պայմանների վերաբերյալ։ Առաջարկն էլեկտրոնային փոստի միջոցով ուղարկվել է շուրջ 70 հասցեատերերի:

Պեդրո Զարոկյանն ի պատասխան վերը նշված առաջարկի՝ էլեկտրոնային փոստի միջոցով նույն օրը լատինատառ հայերենով վիրավորական խոսքեր է գրել և ուղարկել էլեկտրոնային համապատասխան հասցեով, իսկ պատճենը՝ մյուս բնակիչների էլեկտրոնային հասցեներով, որով վիրավորել է իր պատիվն ու արժանապատվությունը։ Հայցվորը մեջբերել է Զարոկյանի հաղորդագրության բովանդակությունը. «Ես առաջարկում եմ էդ 25.000 տանք Գագիկին, որ ամեն ամիս կոխի Վեքիլյանի (մարմնի մասի ժարգոնային անվանում-խմբ.) մեջ մեր շենքի բակում բոլորի դիմաց։ Այլ կերպ համաձայն չեմ 25.000 դրամ մուծեմ։ Պեդրո»: Նշված նամակը 22.07.2016թ. դրությամբ ընթեռնելի է եղել և մինչ օրս ընթեռնելի է բոլոր բնակիչներին։ Տվյալ դեպքում պատասխանողի հրապարակած արտահայտությունը նսեմացնում է իր պատիվը, ուղղված է կոնկրետ իրեն և հրապարակային է, քանի որ այն հասանելի և ընթեռնելի է մոտ 70 անձանց»:

Դատարանը, սակայն, վճռել է Վեքիլյանի հայցն ընդդեմ Զարոկյանի մերժել: Մերժման հիմքերից մեկը եղել է հայցային վաղեմությունը՝ բաց է թողնվել ՀՀ քաղաքացիական օրենսգրքով ամրագրված մեկամսյա ժամկետը: Եվ բացի դրանից՝ հայցվորի կողմից ի հիմնավորումն վիրավորական արտահայտություններ իր հասցեին հնչած լինելու հանգամանքի, Դատարանին ներկայացրել է լատինատառ նամակ էլեկտրոնային կայքից, որի կապակցությամբ Դատարանը, հիմք ընդունելով ՀՀ քաղաքացիական դատավարության օրենսգրքի պահանջը, քննարկման առարկա է դարձրել այն՝ օրենսդրությամբ սահմանված կարգին համապատասխանեցնելու և հայերեն պատշաճ թարգմանությամբ Դատարանին ներկայացնելու հանգամանքը, մինչդեռ հայցվորի կողմից այդպիսին չի ներկայացվել:

Նշենք, որ Զարոկյանը ծնվել է Թեհրանում, 1986թ. Իրանից տեղափոխվել է ԱՄՆ, Հայաստան է տեղափոխվել 2009թ.-ին։