29/05/2024

Ամբողջ կտավը հյուսվում է մարդկային հույզերից․ լեգենդար «Ժիզել»-ով Երևանում է Անգլիայի ազգային բալետը․ Տեսանյութ

Անգլիայի ազգային բալետը Ակրամ Խանի լեգենդար «Ժիզել» բալետային ներկայացմամբ Երևանում է՝ Երևանի քաղաքապետի հրավերով:

Բալետային ամենադրամատիկ ու ամենախորհրդավոր շուրջ երկդարյա պատմությունը Ակրամ Խանի փիլիսոփայությամբ դարձել է 21-րդ դարի գլուխգործոց: Այստեղ չկան վառ ու ճչացող գույներ. ամբողջ կտավը հյուսվում է մարդկային հույզերից:

Երկու օր և երեք ներկայացում՝ Օպերային թատրոնի բեմում: Թատերախումբը Երևանում է գեղարվեստական, ստեղծագործական, տեխնիկական 90 հոգանոց կազմով:

Հատուկ ներկայացման համար օդային, ծովային և ցամաքային ճանապարհով շուրջ 25 տոննա ռեկվիզիտներ, դեկորացիաներ, լուսային-ձայնային տեխնիկական միջոցներ են բերվել Երևան: Հյուրախաղերին ընդառաջ թատրոնում նաև վերանորոգման, վերազինման և հատուկ կահավորման լայնածավալ աշխատանքներ էին:

Մարմնի լեզուն ամեն անգամ ստեղծագործելու և բացահայտելու նոր հնարավորություններ է տալիս: «Ժիզելը» ստիպում է յուրաքանչյուրին վերապրել այս պատմությունը յուրովի:

Անգլիայի ազգային բալետի երևանյան հյուրախաղերը բացառիկ են ու պատմական: Երևանը 11-րդ մայրաքաղաքն է աշխարհում, որն ընդունում է անգլիական թատերախմբին։

Մշակութային նախագիծը կարևոր է նաև իր կրթական նշանակությամբ՝ հանդիսատեսին մատուցելով միայն բարձրարժեք արվեստ:

Աշխարհի մեծագույն բեմերը նվաճած Ակրամ Խանի «Ժիզելը» տարածաշրջանում ներկայացվեց առաջին անգամ: Նախագծի շնորհիվ տոմսերի վաճառքի ամբողջ հասույթն ուղղվելու է քաղաքապետարանի հաջորդ նոր ու հավակնոտ՝ «Երևան բալետ ֆեստ 2024» ծրագրին, որը կանցկացվի արդեն այս տարվա հունիսին:

Մանրամասները՝ տեսանյութում։