26/06/2024

Առկա է հրավիրվածների ցուցակ․ ՆԳՆ անվտանգության վարչության պետը՝ կաթողիկոսի մուտքը Սարդարապատ արգելելու մասին

«Համապատասխան ձևով առկա է հրավիրվածների ցուցակ, մնացածը դիմեք գրավոր, թող պատասխանեն»:

Այս մասին ՆԳՆ շենքի մոտ լրագրողների հետ զրույցում ասել է ոստիկանության ներքին անվտանգության վարչության պետ Վաղինակ Մարտիրոսյանը՝ պատասխանելով հարցին, թե ինչո՞ւ է Սարդարապատի հուշահամալիրում փորձ արվել կասեցնել Ամենայն հայոց կաթողիկոսի այցը։

Ոստիկանության ներքին անվտանգության վարչության պետ Վաղինակ Մարտիրոսյանը ՆԳՆ շենքի մոտ Վազգեն Գալստանյանի հետ հանդիպման է դուրս եկել ՆԳՆ խոսնակ Նարեկ Սարգսյանի հետ և նշել՝ ՆԳ նախարար Վահե Ղազարյանը հանդիպում ունի և չի կարող հանդիպել Գալստանյանի հետ, ինչպես վերջինս պահանջում է:

Վաղինակ Մարտիրոսյանը Վազգեն Գալստանյանին հորդորել է ոստիկաններին չթիրախավորվել՝ նշելով, որ ծառայողական քննություններ են ընթանում:

«Ոստիկանների կողմից կատարված գործողությունների, որոնք ենթադրում են կարգապահական խախտումներ, մեկ տասնյակից ավելի ծառայողական քննություններ կան: Նույն ձև քրեական վարույթներ կան հարուցված»,- ասել է Մարտիրոսյանը։

Նիկոլ Փաշինյանը Ազգային ժողովի բակում լրագրողների հետ զրույցի ընթացքում անդրադարձավ երեկ Սարդարապատում կաթողիկոսի հետ տեղի ունեցած միջադեպին։

Հիշեցնենք՝ երեկ նրա այցի ժամանակ Սարդարապատի հուշահամալիր էր այցելել Ամենայն հայոց կաթողիկոս Գարեգին Բ-ն: Իրավապահները արգելել էին նրան և որոշ հոգևորականների բարձրանալ դեպի հուշահամալիր, քանի որ պետական միջոցառում էր ընթանում, իսկ Գարեգին Բ-ն դրան չի ցանկացել մասնակցել, ինչպես այլ պետական միջոցառումների, որը անցկացվում է երկրի բարձրագույն ղեկավարության մասնակցությամբ:

Փաշինյանը նախ պարզաբանեց, թե ինչու են ոստիկանները արգելել կաթողիկոսի մուտքը․ «Կաթողիկոսի կողմից ղեկավարվող քաղաքական շարժումը նախորդող օրը և երեկ պետական արարողակարգային միջոցառումներին խոչընդոտելուն ուղղված գործողություններ էր արել, և երբ վեհափառ հայրապետը մոտեցել է արարողակարգային միջոցառման վայր, հրավեր չի ունեցել, մենք էլ տեղեկություն չենք ունեցել, որ նա ակնկալում է հրավեր։ Ոստիկանությունն էլ պարզապես փորձել է ճշտել՝ արդյոք վեհափառ հայրապետը եկել է իր քաղաքական կողմնակիցների և իր կողմից ղեկավարվող շարժման նախաձեռնած խոչընդոտող և սադրող գործողությունները շարունակելո՞ւ, թե՞ այլ նպատակով»:

Փաշինյանը իր խոսքում շեշտեց՝ ՀՀ ցանկացած քաղաքացի ունի ազատություն ու իրավունք մասնակցելու որևէ շարժման․ «Երբ ոստիկանությունը ստացել է հավաստիացումներ, որ այցը ունի միայն արարողակարգային նպատակ, ապահովվել է վեհափառ հայրապետի մուտքը Սարդարապատի հուշահամալիրի՝ պետական արարողակարգային միջոցառման տարածք»։

Նիկոլ Փաշինյանը կարևորեց, որ խնդիրը որևէ շարժման մասնակցելու կամ չմասնակցելու մեջ չէ, այլ այն, թե այցի նպատակը ո՞րն է եղել՝ պետական արարողակարգային միջոցառումը խոչընդոտե՞լը, թե՞ ոչ․ «Էլի եմ ասում՝ նրա կողմից ղեկավարվող շարժումը դրանից առաջ արել էր խոչընդոտելուն միտված կամ առնվազն այդպիսի խոչընդոտներ ստեղծելու պայմաններ ձևավորող գործընթաց»։