Հուլիսի 11-ին «Հրապարակը» գրել էր, որ Առողջապահության նախարար Անահիտ Ավանեսյանը հետին թվով խայտառակ հրաման է ստորագրել, որով թույլատրել է Զարյա-3 լուսաձայնային նռնակի կիրառումը խաղաղ նպատակներով, ինչը մինչ այդ արգելված էր։
Հիշեցնենք, որ ոստիկանությունը հունիսի 12-ին Դեմիրճյան-Բաղրամյան խաչմերուկում անզեն ու խաղաղ ցուցարարների ուղղությամբ այդ արգելված նռնակներն էր նետել, որի հետեւանքով 100-ից ավելի անձ էր տուժել:
Արգելված հատուկ միջոցը կիրառելուց 16 օր անց՝ հունիսի 26-ին Ավանեսյանը փոփոխություն էր արել «Մարդու նկատմամբ գործադրվող հատուկ միջոցների կիրառման համար թույլատրելի չափանիշները հաստատելու մասին» առողջապահության նախարարի՝ 2012թ-ի ապրիլի12-ի N09-Ն հրամանում եվ արդեն իսկ կիրառված ու արգելված միջոցը ներառել այդ ցանկում։ Ապա հայտնի էր դարձել, որ Ներքին գործերի նախարար Վահե Ղազարյանը նույնպես հունիսի 12-ի դեպքերից ուղիղ մեկ ամիս անց՝ հուլիսի 12-ին, փոփոխություն է կատարել այս տարվա մայիսի 16-ին ընդունված իր որոշման մեջ ու ՀՀ ՆԳՆ-ում հատուկ միջոցների առկայության, դրանց տեսակի ու քանակի մասին տեղեկությունը համարել գաղտնի։
ՆԳՆ-ն երեկ արձագանքել էր այս հրապարակումներին` փորձելով արդարանալ, թե Վահե Ղազարյանը հրամանը ստորագրել է «Պետական գաղտնիքի մասին» ՀՀ օրենքի եւ վարչապետի որոշման պահանջներին համապատասխան։
«Ի պատասխան մամուլում տարածված հրապարակումների՝ հայտնում ենք, որ ՀՀ ներքին գործերի նախարարի 2024 թվականի հուլիսի 12-ի N 55-Լ հրամանը, օրենքով նախատեսված ժամկետում, ստորագրվել է բացառապես «Պետական գաղտնիքի մասին» ՀՀ օրենքի 7-րդ հոդվածի 4-րդ մասի 1-ին և ՀՀ վարչապետի 16․06․2023 թվականի 647-Ա որոշման 23-րդ կետերի պահանջներին համապատասխան։ ՆԳՆ ոստիկանության ստորաբաժանումներում հատուկ միջոցների առկայության, դրանց կիրառման պայմանների, ինչպես նաև քանակի մասին տվյալներն ընդգրկված են եղել ՀՀ ոստիկանության պետի 2020 թվականի հոկտեմբերի 27-ի N 11-Ն հրամանով (ուժը կորցրած է ճանաչվել 21․05․2024թ.) հաստատված ցանկի 50-րդ կետով։ Հավելենք նաև, որ ՆԳ նախարարի 2024 թվականի հուլիսի 12-ի N 55-Լ և 2024 թվականի մայիսի 16-ի N 48-Լ հրամանները հրապարակված են ՆԳ նախարարության պաշտոնական կայքում»,-նշվում է ՆԳՆ պարզաբանման մեջ։
Այս պարզաբանումից, իհարկե, չի հասկացվում, թե ինչու է ՆԳ նախարարը հետին թվով փոփոխություն արել այդ հրամանում եւ մամուլի հրապարակումների հետ ինչ կապ ունի «Պետական գաղտնիքի մասին օրենքի» շրջանակներում է այն ստորագրվել, թե ոչ: Ի վերջո, պարզ չէ, թե առհասարակ` ինչու է այդ փոփոխությունը կատարվել եւ ինչու է թույլատրվել վտանգավոր նռնակների կիրառումը քաղաքացիական բնակչության նկատմամբ։
Բաց մի թողեք
Փաշինյանը կա՛մ չի ըմբռնել բանակցության գործընթացը, կա՛մ միտումնավոր խաբում է. Միրզոյան
Արաբկիրի շուկայի ետնամասում մի սարսափելի իրավիճակ է. Նազարյան
Կոռուպցիոն բացահայտումները շարունակվում են