Ադրբեջանում խորհրդարանական ընտրություններից մի քանի օր առաջ սպանվել կամ մահացել է ընդդիմադիր թեկնածուն

Օգոստոսի 25-ի երեկոյան Ադրբեջանի ՆԳՆ Բարդայի տարածաշրջանային վարչությունը հաղորդագրություն է տարածել, որ ժամը 19:00-ի սահմաններում Ջեբրայիլի շրջանի տարածքում տեղի է ունեցել ճանապարհա-տրանսպորտային պատահար. Nissan մակնիշի մեքենան շրջվել է, ինչի հետեւանքով վարորդը ծանր մարմնական վնասվածքներ է ստացել եւ տեղափոխվել Ֆիզուլիի հիվանդանոց, չնայած բժիշկների գործադրած ջանքերին, նրա կյանքը փրկել չի հաջողվել:

Պաշտոնական հաղորդագրության մեջ նշված է, որ տուժածը Բաքվի համալսարանի դասախոս, պրոֆեսոր Նասիման Յաղուբլուն է: Ադրբեջանի առողջապահության նախարարության հաղորդագրության համաձայն՝ նա ստացել է գանգուղեղի փակ եւ կրծքավանդակի բութ վնասվածք, բազմաթիվ կոտրվածքներ: Կլինիկական մահը, ըստ ,,Թուրքանի,, աղբյուրների, արձանագրվել է ժամը 18:43-ին:

ՃՏՊ-ի եւ մահվան արձանագրման ժամկետների տարբերությունն ակնառու է. եթե Յաղուբլին, որ պաշտոնական վարկածով ավտոմեքենան անձամբ է վարել, վթարի է ենթարկվել ժամը 19:00-ի սահմաններում, ապա, նկատի ունենալով նրան Ջեբրայիլից Ֆիզուլի տեղափոխելու եւ բժիշկների միջամտության հանգամանքները, մահը պետք է արձանագրվեր առնվազն ժամը 20:00-ի սահմաններում: Կամ պետք է ընդունել, որ նա հենց ՃՏՊ-ի վայրում է մահացել:

«Թուրանը» հայտնում է, որ Յաղուբլուն «Մուսավաթ» կուսակցության «դիվանի» որոշմամբ Միլլի մեջլիսի պատգամավոր է առաջադրվել Ջեբրայիլ-Կուբաթլու ընտրատարածքից եւ վերադառնում էր ընտրողների հետ հանդիպումից:

Նույն աղբյուրի տեղեկությամբ՝ Յաղուբլուն 1993թ. «կամավոր անդամագրվել է Ադրբեջանի զինված ուժերին եւ նշանակվել «Ադրբեջանական բանակ» թերթի խմբագիր: Մասնագիտությամբ նա բանասեր-լրագրող է: Թեկնածուական ատենախոսություն է պաշտպանել «Ադրբեջանի անկախությունը եւ Մամեդ Էմին Ռասուլզադեն» թեմայով, իսկ դոկտորականը նվիրված է ադրբեջանական վտարանդիության մամուլին:

Այսօրվա Ադրբեջանում Մամեդ Էմին Ռասուլզադեն եւ անցյալ դարասկզբի մյուս բոլոր գործիչները պաշտոնապես հարգի չեն: Երկրի եւ ազգային պետականության «վերածննդի օր» է նշվում հունիսի 15-ը. 1993թ. այդ օրը Հեյդար Ալիեւը Նախիջեւանից տեղափոխվել է Բաքու եւ ընտրվել Գերագույն խորհրդի նախագահ:

Քաղաքական փոխատեղությունը կատարվել է «Մուսավաթի» ներկայիս առաջնորդ Իսա Գամբարի միջոցով. նա Գերագույն խորհրդի նախագահի պաշտոնից հրաժարական է տվել՝ Հեյդար Ալիեւի համար հարթելով իշխանության վերադարձի ճանապարհը: Միլլի մեջլիսի արտահերթ ընտրություններին «Մուսավաթը» շուրջ 50 ընտրատարածքներում թեկնածուներ է առաջադրել, ԿԸՀ-ն գրանցել է 25-ին, որոնցից մեկը՝ Նասիման Յաղուբլուն, արդեն չկա:

Ջեբրայիլ-Կուբաթլի ընտրատարածքում, ինչպես առհասարակ քառասունչորսօրյա պատերազմից հետո Ադրբեջանի վերահսկողությանն անցած բոլոր շրջաններում, փաստացի ընտրողներ չկան: ԿԸՀ-ն որոշել է այդ տարածքներում «շարժական ընտրատեղամասեր» ստեղծել: Դա «քվեարկության կարուսելի» օրինականացում է:

Անկախ աղբյուրները հայտնում են, որ այդ շրջաններում սոցիալական խոր դժգոհություն է դրսեւորվում. մարդիկ աշխատանք չունեն, պատերազմից չորս տարի անց ոչ ոք նույնիսկ հասանելիք հողակտոր չի ստացել, արոտավայրերը տնօրինում են «պատերազմի հերոս» գեներալները:

Այդ իրավիճակում «Մուսավաթի» թեկնածու Յաղուբլուն կարող էր իշխանության համար լուրջ մրցակից լինել: Եվ քաղաքական առումով նրա բացակայությունը ձեռնտու է Ալիեւի վարչախմբին: Տեղի է ունեցել պատահա՞ր, թե՞ քաղաքական սպանություն: «Մուսավաթը» դեռեւս Յաղուբլուի հետ կատարվածին չի անդրադարձել: Բայց Իսա Գամբարը կխոսի՞: