Հայաստանի ԱԳ նախարար Արարատ Միրզոյանը խորհրդարանում հայտարարել է, թե «զգուշավոր լավատեսությամբ» կարծում է, որ մոտ ապագայում կհամաձայնեցնեն Ադրբեջանի հետ «խաղաղության պայմանագրի» այն 1-2 կետը, որը համաձայնեցված չէ:
Միրզոյանը հայտարարել է, թե սահմանազատման ու սահմանագծման կանոնակարգի վերաբերյալ ՍԴ որոշումը, ըստ էության հանում է Ադրբեջանի մտահոգությունները Հայաստանի Սահմանադրության առնչությամբ:
Միրզոյանի այդ հայտարարությունն առաջացնում է որոշակի տարակուսանք, քանի որ ՍԴ որոշումից հետո Ադրբեջանը հայտարարել էր հակառակի մասին: Թե ինչի հիման վրա է Հայաստանի ԱԳ նախարարը անում իր հայտարարությունը և արդյո՞ք այդ հայտարարության հիմքում Բաքվից ստացված հստակ ու աներկբա դիրքորոշումն է, պարզ չէ:
Ավելին՝ Արարատ Միրզոյանը հայտարարել է նաև, թե մյուս հարցով՝ ճանապարհների ապաշրջափակման մասով ևս Երևանը ինչ-որ առաջարկներ է փոխանցել Բաքվին, որոնք արժանացել են «կիսապաշտոնական» հավանության:
Ի՞նչ է նշանակում կիսապաշտոնական: Ո՞րն է դա: Եվ ի՞նչ առաջարկներ է փոխանցել Երևանը: Արարատ Միրզոյանը նշել է, որ դրանք ենթադրում են ճանապարհների ապաշրջափակում պետությունների ինքնիշխանության ու իրավազորության լիարժեք ռեժիմով, համաձայն այդ պետությունների օրենսդրության:
Այստեղ առաջանում է հարց՝ ինչո՞ւ Ադրբեջանը մինչ այս չէր համաձայնում հայաստանյան այդ մոտեցումներին, իսկ հիմա «կիսապաշտոնապես ողջունել» է դրանք: Ի՞նչ է փոխվել: Թերևս ակնառու է, որ ԱԳ նախարար Միրզոյանի հայտարարություններում ինչ-որ բան գտնվում է «կիսա» մակարդակում:
Այսինքն՝ ինչպես Ադրբեջանն է «կիսապաշտոնապես» արժանացրել ողջույնի, ըստ Հայաստանի ԱԳ նախարարի, այդպես էլ, կարծես թե, իրավիճակի, Ադրբեջանին արված առաջարկի և հեռանկարի վերաբերյալ նրա գնահատականներն են «կիսատ», ոչ ամբողջական, այսպես ասած՝ կիսաիրական:
Բաց մի թողեք
Իրանը պատրաստ է օգնել, որպեսզի Հայաստանն ու Ադրբեջանը հասնեն խաղաղության համաձայնագրի ստորագրմանը. Սոբհանի
Հանձնառու ենք աջակցել տարածաշրջանում խաղաղությանը. ՀՀ-ում ԵՄ առաքելությունը նշել է 5000-րդ պարեկությունը․ Լուսանկար
Գյումրիի ընտրությունները նշանավորում են գալիք խորհրդարանական ընտրություններում ՔՊ պարտությունը և Նիկոլ Փաշինյանի իշխանազրկումը