Աստիճանաբար ուրվագծվում է Հովիկ Աղազարյանի «մեղադրանքը»

Աստիճանաբար ուրվագծվում է այն «մեղադրանքը», որն իշխանությանը թույլ կտա՝ վրեժխնդիր լինել «դիվերգենտ» պատգամավոր Հովիկ Աղազարյանից:

«ԱԺ պատգամավոր Հովիկ Աղազարյանի կողմից պետական գաղտնիք պարունակող արտահոսքեր կազմակերպելու վերաբերյալ հրապարակումն ուղարկվել է ՀՀ հակակոռուպցիոն կոմիտե՝ վարույթ նախաձեռնելու հարցը լուծելու»,- ասված է Գլխավոր դատախազության տարածած հաղորդագրության տեքստում:

Ես մեծ դժվարությամբ կարող եմ խոսել այն մարդկանց քաղաքական կամ բարոյական որակների մասին, ովքեր հատկապես 44-օրյա պատերազմից հետո համաձայնել են մնալ Նիկոլ Փաշինյանի թիմում: Բացառություն չէ նաև Հովիկ Աղազարյանը, ով հանուն Փաշինյանի՝ հատել է գրեթե բոլոր «կարմիր գծերը»:

Սրանով հանդերձ, զազրելի է այն հաշվեհարդարը, որն իշխանությունը ծրագրել է Աղազարյանի դեմ:

Ակնհայտ է, որ եթե վերջինս հնազանդ լիներ Փաշինյանի «խնդրանքին», ոչ սեռական սկանդալների «հերոս» կդառնար, ոչ «արտահոսք կազմակերպող» և ոչ էլ՝ «պետական գաղտնիք» հրապարակող:

Գուցե նույնիսկ պետական երկրորդական մի գործ ստանար՝ վարկերը փակելու համար:

Կարող եք Հովիկ Աղազարյանին չզորակցել, բայց անհանդուրժելի է թույլ տալ «37 թվի» վերածնունդը՝ այս ծավալով ու դրսևորումներով: Այսօր Նիկոլի «37»-ը խժռում է Աղազարյանին, վաղը գալու է յուրաքանչյուրի հետևից, ով կհանդգնի Փաշինյանի որևէ կապրիզի ընդդիմանալ:

Սուրեն Սուրենյանց