Հայաստանի խորհրդարանի փոխխոսնակ Ռուբեն Ռուբինյանն անդրադարձել է Լևոն Զուրաբյանի մասնակցությամբ «Ազատություն» ռադիոկայանի 2 տեսանյութերին և սոցցանցի իր էջում գրել.
«Այսօր Ազատություն ռադիոկայանի երկու տեսանյութ դիտեցի: Առաջինը Լևոն Զուրաբյանի հարցազրույցն էր, որում սույն շատ պետականամետ գործիչը պնդում էր, որ Լեռնային Ղարաբաղում էթնիկ զտում է տեղի ունեցել, քանի որ Հայաստանը չի կատարել Նոյեմբերի 9-ի փաստաթղթի 9-րդ կետը:
Երկրորդը Ազատության ռեպորտաժն էր` նվիրված ՀՀ-ում Ֆրանսիայի դեսպանի որոշ հայտարարությունների, և այս ռեպորտաժում, այո` գուշակեցիք, կրկին Լևոն Զուրաբյանը պնդում էր, որ Լեռնային Ղարաբաղում էթնիկ զտումը տեղի է ունեցել, քանի որ Հայաստանը Ալմա-Աթայի հռչակագրի (կնքված 1991 թվականին) հիման վրա ճանաչել է Ադրբեջանի տարածքային ամբողջականությունը:
Առաջարկում եմ, որպեսզի Ազատությունը շատ չտանջվի և հաղորդաշար բացի`«100 պատճառ, թե ինչու է ամեն ինչում մեղավոր Հայաստանը Լևոն Զուրաբյանի հետ»:
Համոզված եմ, որ հաղորդաշարին մշտապես սիրով կհյուրընկալվեն Էդմոն Մարուքյանը, Ռոբերտ Քոչարյանը, Մարգարիտա Սիմոնյանը, Վլադիմիր Սոլովյովը և այլք»:
ՀԱԿ փոխնախագահ Լևոն Զուրաբյան. «Քաղաքացիական պայմանագրի» ներկայացուցիչ Ռուբեն Ռուբինյանը հակասություն է գտել իմ երկու պնդումների միջեւ, որոնք Ռուբինայնի շարադրմամբ հետեւյալ տեսքն ունեն.
1. «Լեռնային Ղարաբաղում էթնիկ զտում է տեղի ունեցել, քանի որ Հայաստանը չի կատարել նոյեմբերի 9֊ի փաստաթղթի 9֊րդ կետը»։
2. «Լեռնային Ղարաբաղում էթնիկ զտում է տեղի ունեցել, քանի որ Հայաստանը Ալմա֊Աթայի հռչակագրի (կնքված 1991 թվականին) հիման վրա ճանաչել է Ադրբեջանի տարածքային ամբողջականությյունը»։
Նախ, պետք է ասեմ, որ Ռուբինյանը, ամբողջությամբ հավատարիմ լինելով «ՔՊ»֊ի «Սուտասանության կոդեքսի» դրույթներին, անամոթաբար կեղծել է իմ ասածները։ Որպես էթնիկ զտման պատճառ ես խոսել եմ ոչ թե Ալմա֊Աթայի հռչակագրի մասին (որն, ի դեպ, Հայաստանի վերապահումների շնորհիվ, չի ճանաչում Լեռնային Ղարաբաղը Ադրբեջանի կազմում), այլ Նիկոլ Փաշինյանի կողմից 2022 թվականին Պրահայում Լեռնային Ղարաբաղը Ադրբեջանի կազմում ճանաչելու մասին։
Երկրորդ, նոյեմբերի 9֊ի հայտարարության 9-րդ կետի չկատարելը եւ Լեռնային Ղարաբաղը Ադրբեջանի կազմում ճանաչելը ընդամենը նույն քաղաքականության երկու փոխկապակցված տարրերն են, որոնց մերժումով վիժեցվեց Ռուսաստանի «երկու ճանապարհների» կարգավորման պլանը։
Ու այս պրիմիտիվ մանիպուլյացիաների հեղինակն այսօր կարգավորում է հայ֊թուրքական հարաբերությունները։ Պատկերացնում եմ, թե ինչ մեծ հարգանք է վայելում նա իր թուրք գործընկերների մոտ։
Բաց մի թողեք
Ինչո՞ւ են մարդիկ ձգտում դառնալ իշխանական պատգամավոր կամ կառավարության պաշտոնյա
Այ, դրանից հետո հաստատ չի մնա ո՛չ հայրենիք, ո՛չ էլ պետություն
Փաշինյանի բանակցային «մոտեցումը» բնորոշվում է ճակատագրական անկարողությամբ. Օսկանյան