«Գյումրու ընտրություններում իշխանություններն ընդամենը 14 մանդատ են վերցրել, մնացած ընդդիմադիր 4 ուժերը՝ միասնաբար 19 մանդատ, իսկ դա նշանակում է, որ ընդդիմության միասնական լինելու պարագայում կհաղթահարեն պահանջված շեմը եւ միանձնյա առաջատար կլինեն»,- ասում է գյումրեցի գրող, հրապարակախոս Արա Նախշքարյանը` անդրադառնալով մարտի 30-ի ընտրությունների արդյունքներին:
Հրապարակ թերթը գրել է․ Նա նկատում է, որ ՔՊ-ի՝ առաջին տեղում լինելուց չպետք է զարմանալ այն պատճառով, որ նա իշխող կուսակցությունն է:
«Եվ հետո՝ օդում կախված կամ հավաստի լուրերի համաձայն, իրենց համար աշխատել են ԱԱԾ-ն, ոստիկանությունը, կարմիր բերետավորները, քաղաքացիական հագուստով՝ Ջավախքից բերված 2000-2 200 քաղաքացիներ, ու եթե այդքան ռեսուրս կիրառելուց հետո իրենք հավաքել են 14 մանդատի կարգի տոկոս, դա հաղթանակ կոչել պարզապես չի կարելի, որովհետեւ այդպես չեն հաղթում։ Ու եթե անգամ չարյաց փոքրագույնով մտածենք եւ կասկածի տակ դնենք ընդդիմության միասնականությունը, չեմ կարծում, թե «Քաղաքացիական պայմանագիրը» կկարողանա 3 հոգու «գողանալ»․․․։ Բայց դրան չեն գնալու, որովհետեւ, նախ՝ ընդդիմության ցանկը շատ ճիշտ էր կառուցված, եւ յուրաքաչյուր ուժի առաջին տասնյակները երկաթյա բնավորությամբ մարդիկ են, որոնց համար աշխատանքն ու գումարը երկրորդական են, քան պատիվն ու հայրենիքը։ Այսինքն՝ բացառում եմ, որ որեւէ մեկը կգնա իշխանության ճամբար, կամ ինչ կարգի շանտղության բան տեղի ունենա, որ որեւէ մեկը կարողանա փախնել»,- նշում է զրուցակիցս։
Նախշքարյանի կարծիքով, «միանալ» հասկացությունն այս պարագայում երկբեւեռ է․ նախ՝ կոալիցիա կազմելու եւ հետո՝ պարզապես չխանգարելու իմաստով․ «Եթե Մարտուն Գրիգորյանը հանկարծ կոալիցիա չկազմի, եւ ՔՊ-ն էլ որոշի, որ ինքը չի մասնակցելու նիստերին կամ գոնե առաջին նիստին, ընդդիմությունը, որպես այդպիսին, կոալիցիա կազմած 3 թեկնածուները եւ Մարտուն Գրիգորյանի խմբակցությունն առանձին կարող է մասնակցել եւ իր ձայներից մեկը տալ ընդդիմության կոալիցիային, որպեսզի քվեարկությունը ձայների առումով լինի բավարար։ Այսինքն՝ չեմ կարծում, թե Երեւանի սցենարն է կրկնվելու Գյումրիում, երբ «Դոկ» կուսակցությունը փչացրեց ամբողջ իրավիճակը։ Այդ տարբերակն այստեղ չի աշխատելու, որովհետեւ Գյումրին սպեցիֆիկ քաղաք է, եւ գյումրեցիների մեջ հեղինակության մենթալիտետն աշխատում է, իսկ դա զուտ մարդկային որակների մասին է։ Ես, որպես անհատ քաղաքացի, որը ոչ մի կուսակցության չի հարում, կարծում եմ, որ Մարտուն Գրիգորյանը չի «փչացնելու» իրեն, որովհետեւ Մարտուն Գրիգորյանը լուրջ տղա է, լուրջ մարդ է, եւ չեմ կարծում, որ հանուն ինչ-որ բանի իր անունը Գյումրի քաղաքի մեջ գետնով տա»։
Այդուհանդերձ, հնարավո՞ր է, որ, ինչպես նախընտրական շրջանում եղան քաղաքական հետապնդումներ, ձերբակալություններ, նույնը կրկնվի նաեւ հետընտրական շրջանում։ «Նախընտրական շրջանում տեղի ունեցած այդ իրադարձությունները պարզապես վախի մթնոլորտ ստեղծելու իրավիճակներ էին, եւ ուղղակի ուզեցան կոտրել այդ տղային, եւ, մեծ հաշվով, բոլոր 4 թեկնածուների հետ էլ մի բան կատարվեց, սկզբից՝ Վարդան Ղուկասյան, հետո՝ Ռուբեն Մխիթարյան, հետո՝ Կարեն Սիմոնյան, հետո՝ Մարտուն Գրիգորյան։ Այստեղ խոսքը պարզապես փոքրոգության մասին է, ավելի լուրջ բան չկա, ուղղակի իշխանությունն իր հիստերիկ վերարտադրման պահին ուզեցավ ինչ-որ բաներ անել, որն իրենց մոտ չստացվեց, ուզեցան ժողովրդի մեջ վախի մթնոլորտ ստեղծել եւ հասկանալ, թե ինչ կարող է լինել։ Սակայն, քանի որ մեր բոլոր թեկնածուներն էլ գյումրեցի են եւ կանգնած են իրենց մայր հողի վրա ամուր ու վստահ, իրենք՝ ոչ մեկն էլ դրա մասին մտածելու խնդիր չունեն։ Նախօրեին Մարտուն Գրիգորյանի շտաբից ձերբակալություններ, առեւանգումներ էին տեղի ունեցել, բայց, ամեն դեպքում, դա էլ չի օգնելու։ Գյումրին ապացուցեց, որ կարելի է ընտրություններով ջախջախել բոլորին եւ հասնել բուն նպատակին։ Այն կարծրատիպը, որ մեր մեջ պիտի կոտրվեր, կոտրվեց Գյումրիով ու նաեւ՝ Փարաքարով»։
Ի դեպ, գյումրեցիներն այս ընտրություններում նաեւ որոշակի սիմվոլիկա են տեսնում․ 7 տարի առաջ մարտի 31-ին Նիկոլ Փաշինյանն ու իր թիմը Գյումրիից քայլելով եկան իշխանության, ու 7 տարի հետո նույն թիմը պարտվեց Գյումրիում։ «Ես դեռ 15 օր առաջ իմ ֆեյսբուքյան էջում գրեցի՝ Գյումրիով եկար, Գյումրիով էլ գնալու ես, դա ես քեզ խոստանում եմ․․․․ ու կարծես այդ խոստումը կատարվեց, հիմա չգիտեմ՝ դա մարգարեությո՞ւն էր, թե՞ պարզապես սրտի անհատակ ցանկություն, որ տեղի ունեցավ, բայց կարեւորը՝ որ իրականացավ»,- ասում է գրողն ու նկատում, որ «Քաղաքացիական պայմանագիրը» Գյումրիում, որպես այդպիսին, հեղինակություն չունի։
«Մենք մեղավոր չենք, որ, ընդհանուր վիճակից ելնելով, քաղաքի հիմնական բնակչությունն անաշխատունակ է, եւ ինչ-որ մարդկանց իրենց կողմը քաշելու ձեւերն ավելի հեշտ էին, որովհետեւ օրվա հացի որսի դուրս եկած մարդկանց համար ինչ էլ տան, կլինի։ Սակայն նորից եմ նշում՝ Գյումրին շատ սպեցիֆիկ քաղաք է եւ շատ սիրում է մշտապես անակնկալներ մատուցել իշխանություններին։ Այստեղ, երբ տեղի են ունեցել ընտրություններ, գրեթե միշտ հաղթել է ընդդիմությունը, որովհետեւ մարդիկ ոչ թե իշխանություններին չեն սիրում, պարզապես, իրենց ընդհանուր վիճակից ելնելով, հասկանում են, որ իշխանությունները ոչինչ չեն անում իրենց համար եւ անընդհատ իրենց թելը թելում են, որ ի՞նչ անեն։ Սա է խնդիրը»,- նկատում է զրուցակիցս։
Ընտրությունների արդյունքի վրա, ըստ Նախշքարյանի, որոշակի ազդեցություն է ունեցել նաեւ Փաշինյանի նախընտրական այցը Գյումրի, երբ մատ է թափ տվել գյումրեցիների վրա, ասելով՝ առնետները դուրս են եկել նկուղներից եւ ուզում են մասնակցել ընտրությունների․ «Կա նաեւ դա, եւ հետո՝ էշություն դուրս տալն ամենահեշտ բանն է։ Ինքը կանգնեց Գյումրու մեջտեղն ու ասեց՝ Գյումրու ընտրություններին մասնակցում է 300-350 միլիոն դոլարի ապօրինի ձեռք բերված գույք․․․․ ամբողջ Մուշ թաղամասի բնակարանաշինության վրա ծախսվել էր 200 մլն դոլար, այդ ի՞նչ 300-350 մլն է, ի՞նչ հորինած բան է․․․ թե՞ որ նախընտրական շրջան է, ով ինչ ուզենա, կարող է ասել․․․»։
Ա․ Նախշքարյանն ասում է՝ ՔՊ-ի վերջին հանրահավաքին Գյումրիում արդեն ինչ-որ չափով արդյունքները կանխատեսելի էին։ «Իրենց փակման միտինգին քաղաքում լուրեր էին պտտվում, որ Նիկոլը գալու է, մինչեւ անգամ ասացին՝ 3 օր մնալու է Գյումրիում, բայց ՔՊ-ի վերջին միտինգին հերիք չէ՝ Նիկոլը չէր եկել, գումարած դրան՝ բոլոր եկածները բերված էին, Գյումրու պարագայում՝ դպրոցներից, հիվանդանոցներից եւ քաղաքապատկան ՀՈԱԿ-ներից, իսկ մարզերի ու Երեւանի պարագայում՝ Ամասիայից, Աշոցքից, Արթիկից, Երեւանից ու այլ տեղերից։ Էլ չասեմ, որ բավականաչափ մարդ էլ չկար, այսինքն՝ գյումրեցի շատ քիչ կար, եւ իրենց վերջին հանրահավաքից պարզ էին արդյունքները, դրա համար Նիկոլը հասկացել էր իրավիճակը, ու որ գա, իր գալով էլ ավելի է փչացնելու իրավիճակը, դրա համար չեկավ, որ չխայտառակվի, չնայած ինքն ի սկզբանե խայտառակված էր, դրա համար հույսները դրեցին վերին էշելոնում նստած փոքրիկների վրա, եւ ստացվեց այն, ինչ ստացվեց։ Ավելին՝ ընտրությունների օրով այդ մարդիկ իրենց շատ լկտի պահեցին քաղաքի մեջ, մինչդեռ ընդդիմադիր ոչ մի թեկնածու իրավիճակը չփորձեց լարել, հիմնական լարումը տեղի ունեցավ ՔՊ-ի կողմից, որովհետեւ իրենք ցայտնոտի մեջ էին եւ արդեն զգացել էին, որ հաղթանակի շանս չունեն։ Ի՞նչ է նշանակում՝ Նավակ ճոճողը գիշերով Գյումրիում աղջիկներին, լրագրողներին է հայհոյել, բա որ այդ աղջիկներից մեկի եղբայրը հանկարծ գար ու քեզ տեսնե՞ր․․․, իրենք պարզապես իրենց գլոբուսից դուրս էին եկել ու չէին հասկանում, թե ինչ է կատարվում, դրա համար խմել էին, որ չհասկանան, թե իրենց հետ ինչ կկատարվի»,- եզրափակում է զրուցակիցս։
Բաց մի թողեք
«Երբեք չէր հանձնվում, ուներ շատ նպատակներ և երազանքներ». Դերենիկ Խաչատրյանն անմահացել է սեպտեմբերի 30-ին. Լուսանկարներ
Մարտուն Գրիգորյանը խոսել է․ Ինչ սպասել ․․․
Արցախը Ադրբեջանի կազմում չի լինելու, ՔՊ-ն էլ Գյումրիում քաղաքապետ չի ունենալու