«Եթե Հայաստանն ընտրի եվրոպական ուղին, բավականին ցավոտ գործընթաց կլինի Հայաստանի բնակչության համար». Գալուզին

ԵթեՀայաստանը գնա եվրոպական ընտրության ուղով, դա օբյեկտիվորեն կհանգեցնի այն տնտեսական հարաբերությունների վերանայմանը, որոնք Երևանն այժմ ունի ԵԱՏՄ-ի գծով իր գործընկերների հետ։ Դա, հավանաբար, կլինի բավականին ցավոտ գործընթաց, այդ թվում՝ ցավոք, բնակչության համար։

Այս մասին «Իզվեստիա»-ին տված հարցազրույցում հայտարարել է Ռուսաստանի արտաքին գործերի փոխնախարար Միխայիլ Գալուզինը։

Նրա խոսքով՝ Հայաստանի հետ առևտրաշրջանառությունը անցյալ տարի կազմել է մոտ 12 միլիարդ դոլար՝ ցույց տալով զգալի աճ. «Մենք չունենք և չենք կարող ունենալ որևէ ծրագիր՝ ոտնահարելու Հայաստանի շահերը։ Նա մեր դաշնակիցն է, ռազմավարական գործընկերը, որի հետ մեզ, ինչպես Վրաստանի հետ, կապում է բազմադարյա ընդհանուր պատմությունը, Հայրենական մեծ պատերազմում ընդհանուր հաղթանակը, որի 80 ամյակը, հուսով եմ, միասին կնշենք մայիսի 9-ին»։

ՌԴ ԱԳ փոխնախարարը դարձյալ հիշեցրել է, որ միաժամանակ ԵՄ և ԵԱՏՄ անդամակցությունը անհնար է. «Ուստի մեր հայ գործընկերները, հավանաբար, որոշ պահի ստիպված կլինեն կողմնորոշվել, թե որ ուղղությամբ են շարժվում՝ դեպի Եվրամիությանը ինտեգրում, թե՞ եվրասիական ինտեգրմանը շարունակական մասնակցություն ԵԱՏՄ-ի միջոցով։ Այս անդամակցությունը ակնհայտ օգուտներ է բերում Հայաստանի բնակչությանը»։

Նա նշել է, որ եթե Հայաստանը գնա եվրոպական ընտրության ուղով, դա օբյեկտիվորեն կհանգեցնի այն տնտեսական հարաբերությունների վերանայմանը, որոնք Երևանն այժմ ունի ԵԱՏՄ-ի գծով իր գործընկերների հետ։

«Դա, հավանաբար, բավականին ցավոտ գործընթաց կլինի, այդ թվում՝ ցավոք, Հայաստանի բնակչության համար։ Տրամաբանական է ենթադրել, որ երկրի ղեկավարությունը կբացատրի իր բնակչությանը, թե ինչ կարող է կորցնել ԵԱՏՄ-ից դուրս գալով և ինչ կարող է իրականում ձեռք բերել Եվրամիությանը անդամակցությունից։

Պաշտոնական Երևանում, հուսով եմ, նրանք տեսնում են այս իրավիճակը և համապատասխանաբար գնահատում այն։ Առայժմ Հայաստանը դուրս չի եկել Եվրասիական տնտեսական միության որևէ կառույցից։ Մենք բարձր ենք գնահատում նրա հաջող նախագահությունը ԵԱՏՄ-ում անցյալ տարի՝ 2024 թվականին, այնպես որ մեր համագործակցությունը շարունակվում է։ Երկրի ներկայացուցիչները նաև ակտիվորեն մասնակցում են ԱՊՀ մարմինների բոլոր միջոցառումներին, բոլոր փորձագիտական ​​​​հանդիպումներին»: